Щи оԯӑңӑн округ дума депутатӑт мӑнум тыԯӑщ 27-митн Ёмвошн мирхотн путӑртсӑт. Тӑм хӑтԯӑн дума 56-мит мирхот мӑнӑс.
Тӑм оԯн округ бюджет вәна йис. Округева 2016-мит оԯ мӑр 180,3 миллиард шойт вух йиԯ, щи кўтн арсыр вєрӑта 206 миллиард шойт вух сухуптӑԯы. Йиԯпа ювум 3,8 миллиард шойт вух щи вєрӑта мӑнԯӑт: Югра мўв мир хотӑтн мӑты вєра, Сәрханԯ вошн перинатальной пәԯьница омӑстыя, войт єнмӑԯты хуятӑта нётты пӑты, вәнт юх эвӑԯт хот павартӑт ԯэщӑтты вєра, «Югорский фонд капитального ремонта» тӑхия па вәнтӑн тўт хәрӑтты щира.