Новости

Югра мўвев сєма питум хӑт вўш эвӑт 85 о постӑты пӑты округевн хўваттыйн интернетн www.uht85.pф нємуп сайт эщӑтсы.

Щит пӑты мўң мўвевн вәты кашӑң хӑннєхә «Югра мўва мойупсэт мойа!» нємпи вєр хўват арсыр мойупсэт эщӑтты па щив китты щир тӑй. Хурамӑң арӑт, әмӑщ якӑт, путрӑт, стихотворенияйт па па әмӑщ вєрӑт Югра мўва мойӑты рӑх.

Ван хӑтуп тыӑщн «Стратегия социально-экономического развития Ханты-Мансийского автономного округа-Югры до 2020 и на период 2030 года» нємуп Общественной тӑхия ӑнум ёх рәпата сухнӑ. Щи ут Ёмвош округ-Югра губернатор поступсы вўраңӑн ван хӑтуп тыӑщ 2012-мит он пўншсы па щӑта рәпитум ёх хәум о мӑр хәскєм вуаң вєр югорчанӑт вәупсы оӑңӑн нух вантсӑт.

Югра мўв кәща нє Н. Комарова поступсыйн ёш пос пунӑс, мӑта ут хўват округ правительства тӑхийн яртъяң ӑңкӑр хуят ўв пиэа рәпитты пит.  

Мєт оӑң ӑңкӑр хәя Геннадий Бухтин павӑтсы. ўв контрольно-надзорной тӑхи, государственной имущества вєрӑт тәты департамент, государственной заказ департамент па Югра мўв ветеринарной служба тӑхи вєрӑт тәты па нух вантты пит.

Лыпӑт хойты тыӑщн Венгрия хон пєлӑк мўвн Бадачоньтомай нємуп вошн XIII-мит Мўвтє мирӑт финно-угорской писателят мирхот мӑнӑс. Щимӑщ  вєр пӑта нивӑъяң мутас хӑннєхә Финляндия, Эстония, Германия, Венгрия, Франция, Чехия, Румыния хон пєлкӑт па Россия мўвев, щит:  Мордовия, Коми, Марий Эл, Карелия, Удмуртия, Пермской край,  Ленинградская область, Югра па Ямал мўв округңӑн эвӑт юхтыйсӑт.

Васы мӑнты тыӑщ 29-30-мит хӑтңӑнӑн Ёмвош «Югра Экспо» хотн «Энергоэффективность – стратегический вектор развития» нємпи XV-мит межрегиональной вантупсы эщӑты. Тӑм вәйтантупсы хотӑт хошмӑты, нуви тўт вущитты, каврум па потум йиңк мӑты вєрӑт тәты департамент па «Центр энергосбережения Югры» тӑхеңӑн унтасн вєры.

Тӑмхӑт йиуп щирн хӑнты ясӑңӑн хӑншты вєр нух ванты. Мўң, общественной связят Департамент хуща рәпитты ёх, нын эвӑтӑна иньщӑсты ӑңхаўв, йиуп хӑншты па ўңӑтты вєр нынана мәстӑ муй ӑнтә. Муй щирн интӑм хӑншўв, муй щирн йипа хӑншты мос, вєрум анкетайн нын кашащты утӑна пос вєраты.

Ван хӑтуп тыӑщ 23-мит хӑтӑн 1994-мит он Генеральной Ассамблея ООН тӑхи поступсы вєрсӑт кашӑң о вәйт ор тыӑщ 9-мит хӑтӑн иса мўвӑтн шуши мирӑт емӑңхӑт постӑты щира.

Вәйт ор тыӑщ оӑң хӑт вўш эвӑт Югра мўв округев уватн «Хўӑң хӑт» нємуп тыӑщ арсыр мәш ямӑты тӑхет па пәьницайт эщӑтӑт. Щит пӑта тохтўрӑт сыр-сыр вәйтантупсэт ӑ хӑннєхуятӑт пиа вєрты питӑт па ывеа айке тәты, муй щирн хў сә воиң мәшӑңа а йиты.

Кашӑң хӑт Югра мўв ай тўтӑң хопӑтн яңхты вєрӑт вантман тӑйты инспектор ёх юханӑт хўват хопӑтн вантыйман яңхӑт. Щиты ўң пура вўш эвӑт 655 ювра вєр нєпека нўх хӑншсы. Мєт ар – йиңк хўват хопн яңхты щир нємасыя нєпека тўңщирӑңа эщӑтман ӑн вә.

Мўвтє увӑс мирӑт емӑңхӑт епийн, мӑта ут 1994-мит он ООН тӑхийн шуши мир вєрӑт әхтыйн рәпитты ёх унтасн постӑты питсўв, Югра мўв правительства мирхотн шуши мир рәт ясӑң, литература па культура вєрӑт вәнтӑты пӑты Концепция нєпек поступсыя вўсы.

Тӑм нєпек эщӑтсы, ән Югра мўвн вәты хӑнтэт, вухаят па юрнӑт иса щир тӑйсӑт рәт ясңӑт вәнтӑты па щи вєра вәнтыйты.

Вәйт ор тыӑщ 14-16-мит хӑтӑтн Югорский университет пўңӑн РФ культура заслуженной нє Мария Волдина па исторической наукайт кандидат Тимофей Молданов мир юрн хот вєрты вәнтӑты питӑт. Щит ын «Фольклорная мастерская по сохранению, развитию и популяризации традиционной культуры обско-угорских народов» вєр вўраңӑн эщӑтӑңӑн.

Округ правительства мирхотн поступсы нєпек вўсы, ән прожиточной минимум тӑта вәты хуятӑт пӑта вәншӑка вєрты.  

Округ кәща нє юкана вәты нє Н. Комарова ясӑң щирн тӑм вєр потребительской корзина тын эвӑт ванты. Щи тынӑт вәншӑка йиӑт ки, прожиточной минимум вух ищи нух єнум. Щит ай тыӑщ вух вўты, пирӑщ хуятӑт па социальной вух вўты ёх нётты кєша вєры.