Йиӆуп оӆ мӑӊхӑтӆӑт пурайн «Хӑтӆ» нєм­пи хӑнты па вухаӆь мирӊӑн театр ёх «Югор­ка. Телепортация» нємпи моньщ аӆьсӑт.

Тӑм моньщӑн Ищки Ики «Tik-Тok» нєм­пи социальной сеть хуща мосты утӑт вантты вєритӆ, нух хӑншты па щив китты па аӆьты, лоньщӑӊ пухие йога вєрман нумсӑӊа па щомӑӊа йиӆ, Югорка по­хатур имухты па ипўӆяӊ па тӑхетн тывты хошӆ. Тәп моньщӑн атум утӑт ищи вәӆӆӑт, ӆыв Йиӆуп оӆ постӑты ӑн ӆӑӊхаӆӑт па иса муй вєрӆӑт, ӆәӆн па ёх ищи Йиӆуп оӆ мӑӊхӑтӆ ӑн пос­тӑсӑт.

Щимӑщ нєм тӑйӆ киника, мӑта ут оӆӑӊӑн мўӊ ван хӑтӆуп тыӆӑщ 23-мит хӑтӆӑн «Торум Маа» музейн уша вєрсўв. Щит кӑтӊӑн хӑншсӑӊӑн: философской наукайт доктор, А.И. Гер­цен нємуп Российской государственной педагогической университет профессор хә Игорь Леонтьевич Набок (Санкт-Петербург вош) па культурология кандидат нє, округ вәнӆтӑты вєр тәты институт доцент Наталья Ивановна Величко (Ёмвош).

Тӑм вәйтантупсы «Торум Маа» музей научной рәпатнек На­талья Краснопеева пўншӑс:

Ван хӑтӆуп тыӆӑщ 22-митн катра йис пурмӑсӑт шавиты «Торум Маа» тӑхийн «Хуӆта ма ӛшєм мӑнӆ…» ӆўӊӑтты вәйтантупсы вєрӑнтсы. Щӑта хӑнты мир поэт хә Матвей Новьюхов оӆӑӊӑн путӑр вәс.  

Тӑта мосванӑн ван хӑтӆуп тыӆӑщ сухӑнтты кємн Сўмӑтвош районӑӊ декоративно-прикладной творчества па шуши мирӑт хот йитн вәӆты па рәпитты нєӊӑт нємасыя хурамӑӊ ванӆтупсы ӆэщӑтсӑт па щимӑщ нємн ӆўвеӆ кантсӑт «Сўмӑтвошӑӊ вєрӑнтты нєӊӑт ёнтум тўтщаӊӑт». 

Ёмвошн ван хӑтӆуп тыӆӑщн 18-19-мит хӑтӆӑтн «Точка кипения» нємуп тӑхийн «Югра хуща йис пурмӑсӑт вєрты вєрӑӊ ёх» вән мирхот вәс, тӑмӑщ мирхот кашӑӊ 3 оӆ вєрӑнтыйӆӆа.

Мирхота юхтум ёх Югра кәща грант вух унтасн ӑкӑтсайт, щи вєр нємӆ «Хӑнты-манси йис вєрӑт: ӆыӆӑӊ вәӆупсы». Тӑм вєрн сыры лекцияйт ӆўӊӑтсайт, ёх вєрӑӊ тӑхия ӑктӑщийӆсайт, ванӆтуп­сэт вєрӑнтсайт.

Тӑм оӆ Югра мўвн йиӆуп щирн арсыр вєрӑт ӆэщӑтты Мўвтєӆ вєр мӑнӑс. Тӑм әмӑщ вәнӆтӑты хӑр кӑт щирн ӆэщӑтман вәс: интернет хўват онлайн щирн па итәх ёх вәйтантупсэта мойӊа юхтыйӆсӑт. Щит па хон пєлӑк мўвӑт па Россия мўв эвӑӆт йиӆуп вєрӑт әхтыйн хуятӑт, ӆыв саттэӆа вєр тӑйты ёх, кәщайт, научной рәпатнекӑт, йис пурмӑсӑт ӑкӑтты па шавиман тӑйты хӑннєхуятӑт, йис шўкщӑты вєрӑт вәты имет-икет па ӑӆ ёх, мӑта хуятӑта сыр-сыр хурамӑт вєрты щир әмӑщ.

Ван хӑтӆуп тыӆӑщ 8-12-мит хӑтӆӑтн Ём­вошн увӑс мир кӑсупсы вәс.

Нуви сӑӊхум район Касум вошн «Прометей» нємпи культура хот рәпитӆ. Кәщая щӑта Наталья Алексеевна Канева вәӆ. Кўлуп хот вошӑӊ мир пӑта рәпитӆ, щӑта мӑӊхӑтӆӑт пурайн әмӑщ етнхотӑт ӆэщӑтӆыйт, хӑнты па рўщ щирн якӑт якӆыйт, арӑт ариӆыйт.

Няврємӑт па вән хуятӑт кўлуп хотн хӑнты па рўщ щирн якты вәнӆтыйӆты щир тӑйӆӑт. Ӆывты щи вєра Евгения Бойко вәнӆтӑӆ. Тӑм оӆ товийн ма ӆўв пиӆэӆа вәтаӊа йисум. Ӆўв 2012-мит оӆ вўш эвӑӆт кўлуп хотн рәпитӆ. 

Ас потты тыӆӑщ 26-мит хӑтӑӆн Ёмвошн «Торум Маа» йис пурмӑсӑт шавиты хот йитн «Арсыр вєнш хурасуп Вурщӑк рәт ёх» ванӆтупсы щи тӑхийн рәпитты хӑннєхәйт вошӑӊ мир пӑта ӆэщӑтсӑт.

Иха юхтум мир еӆ­пийн музей хотн рәпитты нє Ирина Ксе­но­фонтова тәс айкеӆӑт вєрӑс. Сырыя ӆўв путӑртӑс, хуты тӑм хӑтӑӆн мсыева мўӊ вәӆты-хоӆты щирӆўв уша павӑтты оӆӑӊӑн мосӆ йис пура вєрӑт нәмты. 

Ван хӑтӆуп тыӆӑщ 5-мит хӑтӆӑн мир ӆуват вән мирхот вәс. Ёх кўтэӆн карты щўӊкӑт мухты путӑртсӑт. Щи мирхот 180 арсыр мўвӑтн вәӆты ёх ӆэщӑтсӑт, щит ха пиӆтӑщум мира нётӑсты ёх. Тӑм мирхот щурсаӊ карты щўӊкӑт мухты мўвев ӆуваттыйн вантса. Кашӑӊ хӑннєхә тӑм путрӑт рәт ясӑӊӆаӆн хәӆӑнтсӑт. Ёх путрӑт рўщ муй па английской ясӑӊ мухты 100 муӆтас ясӑӊа тулмащтӑсайт. Щи кўтн хӑнты ясӊев ищи мўв ӆуваттыйн сащӑс. Федосья Лельхова, Зинаида Лонгортова, Тимофей Молданов па Татьяна Молданова хӑнты ясӑӊа тулмащтӑсӑт.