Людмила Афанасьевна Рочева Нуви сӑӊхум район Касум вошн вәӆ. Ӆўв 1974-мит оӆ вўш эвӑӆт пәӆьницайн рәпитӆ. Ӆўв лекщитты нєӊа Ольга Александровна Скибая нётман вәӆ. 

Людмила Паштӑр кәртӑн сєма питӑс па єнмӑс, ай пура оӆӆаӆ Паштӑр кәртӑн мӑнсӑт. Ӑӊкеӆ — Александра Ива­новна, ащеӆ — Афа­на­сий Алексеевич Гриш­кинӊӑн. Ӆўв ащеӆ Вуӆаӊ Отечественной ӆаӆь пу­райн Ленинград фронт хуща ӆаӆясӑс. Щи пийн ӆаӆь пӑта пурмӑсӑт вєрты заводӑн рәпитӑс. Юхӆы тәп 1946-мит оӆн кєрӆӑс, ар мевӆ пос тӑйс. Ӆаӆь пийн пиӆӊӑн колхозн хўӆ веӆпӑсӆуман вәсӊӑн.  

Эвие айӆат пура вўш эвӑӆт каркама вәс, юӆн ӑӊкеӆа нётӑс, щӑӆта вошн вәӆты пирӑщ имета нётты ӊхиӆӑс, хуята тўт х тәты мосӆ па картыйн ваньщты, хуята па йиӊк тәты. Щит ӆавӑрт ӆаӆь оӆӑт вәсӑт, имет атэӆт хӑщсӑт. 

Ӆўв ай пура оӆӆаӆ ма нәмӆӑӆэ, тәп м ясӑӊӑн путӑртӑӆ:

- Щи пурайн ма вәс, вошӑӊ мир рәпитсӑт, хӑт­ӆӑн – колхозн, щӑӆта – юӆн, вән ёха арсыр рәпата вєрты нётсўв. Мисӑт, ӆовӑт, ошӑт кашӑӊ хотн вәсӑт, мисӑт пәсты, турн сэвӑрты па па арсыр рәпатайт юӆн вәсӑт. Ӆўӊӑн ӑӊкет- ащет турн сэвӑрты хӑрн рәпитсӑт, няврємӑт нёт­сӑт, сӑран хопӑтн мӑнман хурамӑӊ ар сувӑт арӑт ари­сӑт. Рәпитты етшӑты пийн мўӊ няврэмӑт пи­ӆа Аса певӑӆты хәхӑӆсўв. 

Людмила Афанасьевна сєма питум мўвӆ иса нәм­ман тӑйӆӑӆэ, рәтӆаӆ оӆӑ­ӊӑн путӑртӑӆ, Евдокия упеӆ Полӊавӑтн вәс, ай яйӆ Паштӑр кәртӑн вәс. 

Людмила Поӆнавӑт кәртӑн нивӆ класс ет­шуптӑс, интернатн вәс. Ӑшкола етшуптумаӆ пийн 1971-мит оӆн Ём­воша мӑнӑс па леккара вәнӆтыйӆты питӑс. Нӆ оӆ пийн училища етшуп­тӑс. Имухты 1974-мит оӆн Касум воша рәпитты китсы. Ӆўв тӑта рәпитты па вәӆты хӑщӑс. Икия мӑнӑс, пухӆаӆ сєма питсӑт, 1977-мит оӆ вўш эвӑӆт щӑта пәӆьницайн рәпитӆ.   

Пәӆьницайн ар рәпата, щи вєр сӑмӑӊа тӑйты мосӆ. Мўӊева кӑрты кеӆ хўват путӑртӑӆ, итәх хӑннєхуята прививкайт ӆоньщтӑты мосӆ, итәх хӑннєхуята диспансеризация вєрты мосӆ.  

- Кашӑӊ хӑтӆ ӆўӊӑтты па нєпека хӑншты мосӆ, муй арат хӑннєхә юхтыӆӑс. Щӑӆта тыӆӑщ сухӑнтыйн ищи нєпекӑт вєрӆум, муй арат хуят хун вой муй па мәш тӑйӆӑт, муй арат прививка омӑссум. Шєӊк мәшитӆӑт ки, Нуви сӑӊ­хум воша пәӆьницая китӆӑ­ӆўв, – лупӑӆ ӆўв.

Людмила Афанасьевна хиӆэт тӑйӆ, няврємӆаӆ па хиӆэӊӑӆ пиӆа иха вәӆӆӑт. Лупӆ, оӆ мӑр рәпитӆ па рўтьщӑты мӑнӆ.  

Ветъяӊ оӆ рәпитмаӆ мӑр ӆўв ар м вєр Касум вошн вәӆты кашӑӊ хотӑӊ ёха вєрӑс. Кәртӑӊ мирн ӆўв сӑмӑӊа тӑйӆы па ӆўв ищи ма хӑннєхуятӑт вәйтӆӑӆэ. 

Тӑм товийн Ас нопӑтты тылӑщ 28-мит хӑтӆӑн ӆўв 70 оӆа йис. Ма ӆӑӊхаӆум ӆўвеӆа вўща ясӑӊ китты, ар м па хошум ясӊӑт лупты щи вуӆаӊ вєрӆ пӑта. Хотӑӊ ёхӆаӆ пиӆа Тәрум ащийн ат ӆавӑӆӆыйт! Тӑӆаӊ ёш, тӑӆаӊ кўр!

Путӑр хӑншӑс:
Светлана Рандымова