№ 13 (3577) - 2021

Кашӑӊ оӆ рәт ясӊӑт, шуши мир культура, йис вєрӑт әхтыйн тўӊщирӑӊа кӑпӑртты хуятӑт Юван Шесталов нємпи мойӆупсыйн кӑсӆӑт. Мосӆ лупты, хуты тӑм вухӑӊ кӑсупсы 2013-мит оӆ вўш эвӑӆт тәты питсы. 

2021-мит оӆн 20 тӑхи эвӑӆт хуятӑт щив нєпек китыйӆсӑт, щит нивӑӆ рәпитты па оса тӑхи па 12 – хӑннєхә. 

Югра мўвн шуши мир оса па вой-хўӆ веӆпӑсӆӑты нӆ тӑхи грант вух ёша павӑтсӑт. Тӑм кӑсупсы мўв иӆпи питы вуй вўты па мўв-авӑт вантман тӑйты департамент ёх ӆэщӑтсӑт. 

Нуви сӑӊхум район «Люкан» нємпи оса тӑхи хуятӑт «Вўӆы тӑйты вєр нух аӆумты» щирн «Вўӆы сухӑт, ӆўвӑт, оӊтӑт эвӑӆт вєрум пурмӑсӑт» нєм хўват и миллион шойт нётупсы вух ёша павӑтсӑт.

Лыпӑт єнумты тыӆӑщ 24-мит хӑтӆӑн «Югра» нємпи айкеӆӑт ӑкӑтты хотн округ мир мӑӆты вєрӑт тәты департамент кәща хә Алексей Добровольский, щи департамент нємасыя совет тӑхия ӆуӊум хә Александр Громут па округ инфекционист нє Людмила Катанахова пиӆа вәйтантупсы вәс. Тӑм хӑтӆӑн коронавирус мәш эвӑӆт прививка ӆоньщты вєр оӆӑӊӑн путӑр вәс.

Вәщ тыӆӑщн оӆӑӊ хӑтӆӑн йиӆуп поступсы єтӑс, муйсӑр йиӆуп нётты вухӑт сухуптӑты питӆайт. Тӑм вухӑт сухуптӑӆайт няврєм атэӆт єнмӑӆтӑты ёха па ӆавӑрта вум имета, щиты хӑнты щирн лупӆа няврємӑӊа йиты вўтьщӑты имета. 

Щи оӆӑӊӑн ванкўтӆы йис вәӆупсэв, шуши мир рәт ясӊӑт ӆавӑӆты щира нємасыя экспертной совет мирхот пурайн путӑртсы. Щит лыпӑт єнумты тыӆӑщ 30-мит хӑтӆӑн вәс. Щи мирхот округ общественной па внешней связят вєрӑт тәты департамент кәща нє Елена Шумакова тәс.

«Хӑнты ясӑӊ» па «Луима сэрипос» газе­тайӊӑн кәща ӆӑӊкӑр нє Н. Вах мўӊ рәпа­таев оӆӑӊӑн ай тәс:

Кашӑӊ хӑннєхәя вәӆтаӆ пӑта, вух ёша павӑтты пӑта рәпитты мосӆ, рәпата тӑхи вәйтты мосӆ. Щи вєрӑтн рәпата кӑншты хотн рәпитты ёх нётӆӑт.

Хӑннєхәя мостӑты рәпата вәйтты нётты, щит и вєр, щи киньща тӑм рәпата кӑн­шты хотӑт па сыр-сыр вєрӑт вєрӆӑт. 

Вәщ тыӆӑщ 30-митн Россия мўв президент хә Владимир Путин ӑӆ мир пиӆа путӑртӑс. Ӆўв вәӆупсэв арсыр вєрӑт оӆӑӊӑн иньщӑссы.

Ар мирн коронави­рус вевтам мәш эвӑӆт пуртән ӆоньщтӑты вєр оӆӑӊӑн иньщӑссы. Мўв хо­нэв юхӆы ястӑс, хуты щи атум мәш эвӑӆт прививка вєрты мосӆ, ӆәӆн сора­шӑк щи мәш йира ат мӑнӑс. Тӑмхӑтӆ мўӊ хущева нӆ пуртән ӆоньщтӑты щир вәӆ. Щи пуртәнӑт учёной ёхн мсыева нух артаӆӑсыйт па вантсыйт. Ищиты хон хәев лупӑс, хуты ӆўв «Спутник V» нємпи пуртән ӆоньщтӑс. 

Югра мўв кәща нє Наталья Комарова вәщ тыӆӑщ 2-мит хӑтӆӑн онлайн щирн округн вәӆты хӑннєхуятӑт пиӆа вәйтантыӆӑс. Щи вәйтантупсыйн путӑртсы, муй оӆ мӑр округевн вєрсы, мӑта нўша вєрӑт тўӊмат­сыйт, муй хуӆна ӑн ӆэщӑтсы па вєрты мосӆ. 

Тӑм ванӑн вәщ тыӆӑщ хәӆмит хӑтӆӑн округ кәща нє Наталья Комарова Нефтеюганск вош хӑннєхуятӑт пиӆа онлайн щирн путӑртӑс.   

Ӆўв лупӑс, хуты ты­ӆӑщ мӑр «Инци­дент» нємпи вєр мухты Нефтеюганск вош хӑннє­хуятӑт нивӑӆъ­яӊ муӆтас арсыр иньщӑ­супсы кит­сӑт. Ӆыв вош хулэт, хот пўӊӆӑт, ӊхты ӛшӑт ӆэ­щӑтты оӆӑӊӑн хӑншсӑт. 

Тӑм Вуӆаӊ Отечественной ӆаӆьн ӆаӆясум ёх нємӑт мўӊева Лянтор вош эвӑӆт Галина Лаптева китӑс. Ӆыв хуӆыева Сәрханӆ район Пим юхан пўңӑӆн вәнт шушетн вәсӑт. Ӆыв нємӆаӆ иса нәмты питӆӑӆўв. 

Тайбин Яков Терентьевич – ӆаӆь эвӑӆт юхи юхтӑс, 1953-мит оӆн ӑнтәма йис, Тўтливум-яун юханӑн шавиман вәӆ.

Вуӆаӊ Отечественной ӆаӆь 1941-мит оӆн лыпӑт тыӆӑщ 22-мит хӑтӆӑн оӆӊитсы. Щи ӆавӑрт пура мўӊ мўвев иса мирӑт пӑта мєт суртӑӊ пурая вәс. Мўӊ увӑс мўвевн кашӑӊ хоттєӆ ёх хойсы. Увӑс мўвев эвӑӆт ар щурӑс хуят вуӆаӊ ӆаӆя тәсы. Ӆыв кўтэӆн ма щатьщащєм Иван Ефимович Покачев вәс. 

Тӑта мосванӑн Сўмӑтвошн вәӆты па кўтуп ӑшколайн вәншӑк няврємӑт физической культура вєрӑта вәнӆтӑты айӆат хӑнты хә Илья Сергеевич Новьюхов оӆӑӊӑн айкеӆ китсы. Сырыя, вантэ, иса вәнӆат хӑннєхуятӑт, мӑта хәйт-нєӊӑт ӑшколаитн муй па арсыр тӑхетн няврємӑт вәнӆтуман рәпитсӑт мўӊ Югра округев «Хӑнты ясӑӊ» газетаевн мкєм арат айкеӆ хӑншийӆсўв. Щи хӑннєхәйт кўтн айӆат няврєм вәнӆтӑты ёх иса ӑнтәм вәс.

Татьяна Алексеевна Сайнахова (Неттина) – щит ма щащєм вән упи, Щекурья кәртӑӊ нє. Ӆўв Сўмӑтвош район Хосум кәрт эвӑӆт вәс. Ӑӊкеӆ нєм ӑн вәӆўв, вантэ, катра пурайн нєм хән путӑртсы, тәп путӑртсы, муйсӑр тӑхи эвӑӆт. Ӑӊкеӆ Сўмӑтвош район Шаганы кәрт эвӑӆт вәс, ащеӆ Алексей Николаевич Неттин вәс. 

Ӄӱнтә ма тьэтьтэтьәм,
Әнәӆ Ӆьӑӆьа мән,
Ма сӓма әнтә питәм!
Топ ма тьи вӓрәт вӱйәм,
Нумәӆта – Нум Торәми лэйләм!
Тьэтьтэтьәм вӓнҷа ӆэйӆәм,
Ӆӱв вӓнҷәл Әнтә пәӆ!
Тьэтьтэтьәм сэм ӄӆәнтәм, 
Сӓр Сәм той!

Вонәӆ нрәки пӑнтәӽ,
Тьэтьтэтьәм лэйэӆта йәӽ,
Рӑӽәм мәӽнам, 
раӽәм йоӽнам,
Вват рӑӽәм мәӽнә мәйи!

Ӆаӆьн нух питум хӑтӆэв муӆты хўваттыйна вәс, 
Ратэв хуща хӑщ па 
раӊнум лавум пўла вәс, 
Тўтн ёсум мўвӑт, хиш
 пәсӑӊ вантсўв, -  
Щи хӑтӆэв мўӊ пӑкты 
кємн ванамтсэв. 

Припев:

Ӆаӆьн нух питум хăтӆэв
Сэля єпăӆна пушса…
Тӑм вән мӑӊ хӑтӆэв,
Ухӑӆ нувия вотса.
Тӑм амтупсы,
Иса сєм йиӊкӑн увса. 
Ӆаӆьн нух питум хӑтӆэв! 
Ӆаӆьн нух питум хӑтӆэв!
Ӆаӆьн нух питум хӑтӆэв!

«Вәнт пєлӑк мўв поступсы щирн» – щимӑщ литературной вәйтантупсы Ёмвошн «Шесталовской лўӊтупсы» мӑнум пурайн Саранпауль вош эвӑӆт юхтум рўщ писатель хәев Владимир Квашнин киникайт ӆўӊӑтты хотн лыпӑт тыӆӑщ 24-мит хӑтӑӆн вошӑӊ хӑнє­хуятӑт пӑта шєӊк әмща ванӆтӑс. Мосӆ лупты, хуты тӑм хӑннєхә сыр-сыр стихӑт па ар путрӑт тәса ӆэщӑтӆ. «От сердца – к сердцу» (2014), «Синегорье» (2019), «Коготь Манараги» (2019) нємуп киникайт хӑншӑс па хӑннєхуятӑтн ӆўӊӑтты щира єсӆӑс. 

Учёной мир лыпӑт тыӆӑщн 21-мит хӑтӆӑн «II Шесталовские чтения» научно-практической мирхотн рәпитсӑт. Карты щўӊкӑт мухты мўвев араӆ пєлӑк па па хон пєлӑк ёх тӑта путӑртты па хәӆӑнтты пищ тӑйсӑт. Путӑр пленарной мирхот эвӑӆт оӆӊитса, мӑта тӑхия хуӆыева иха ӑктӑщсӑт, итәх ёх карты щўӊкӑт мухты, итәх хуятӑт хот йитӑтн омӑсман.  

Щиты лупӑс «Опаӆь тўт» («Увӑс тўт») нємпи ариты тӑхийн ариты па арӑт хӑншты ими Раиса Сергеевна Шишкина. Ӆўв мкәртӑн вәӆ. Ма ӆўв пиӆаӆа «Ван рәтӑт» нємпи ариты, якты, етнхот аӆьты мӑӊхӑтӆ пурайн вәтаӊа йисум. Щит Ӆорвош район Хӑнты-Муши кәртӑн вәӆӆяӆ.

Ӆўв пиӆаӆа путӑрт­мємн ма уша вєр­сум, хуты ӆўв ван хӑтӆуп тыӆӑщ 7-мит хӑтӆӑн 1962-мит оӆн Ӆорвош район Ващ юхан ов (Восяхово) кәртӑн сєма питӑс. Раиса щиты ӑӊкеӆ-ащеӆ оӆӑӊӑн путӑртӑс: 

Тўташӑк ма хӑр тўт пәсӑӊ шиваӆӑсум. Ӆўв мўв сух эвӑӆт ӆаӊ­кӑсман, ай вот рўвн ӆакки тәӆа, кўрӊӑӆам кєрӑтман. Ешавәӆ каврум хошум йиӊк яньщты питӆўв хўӆ веӆты ёх мӑӊхӑтӆӑн. Нӑӊ хўӆ веӆты тәс ёх вєншӑт шиваӆӑӆӑн. Щи­кўш веӆпӑсӆӑты тәсӑт, тәп мўӊ хон хуятӆўвн, па хонӑт хуятӑтн ӑн вәйт­ӆыйт. Шитамн вәӆӆӑт – хўӆ веӆӆӑт. Муӆтас путӑр, муӆтас ясӑӊ ӑнтәм. Шитамеӆ щи хурасуп шитам, ищимет Вән Ас мӑӆӑӊ мӑӆӑт. Вәнт сый хәӆӑнтман, йиӊк сый хәӆӑнтман вәнтӑт омӑс­ӆӑт. Нӑӊ муӆты пурайн вантсэн, муй хурпи Ас нўмпийн Тәрум ӆуӊӑӆ?

Ма Тәрумӆор вошн сєма питсум па єнумсум. Щӑта ванӑн, Тәрум ӆор вәӆ. Щӑта 200-250-кєм хӑннєхә вәӆ. Кәртӑн кӑт оӆ и пўш вўӆєӊ ёх вўӆы әх­ӆӑтн кӑсӆӑт. Ӆўӊ пу­райн Тәрум­ӆор воша мойӊ ёх юх­тыйӆ­ӆӑт. Тәрум ӆор – щит похатур сӑмӆ. 

Ма ӑӊкєм-ащєм пиӆа вәнт шушийн вәӆ­ӆум. Ащєм нємӆ Андрей Николаевич Аликов, ӑӊ­кєм – Светлана Ниписовна. Ма нивӑӆмит класс ет­шуптӑсум, Касум вошн вәнӆтыйӆӆум, ин­тер­натн вәӆӆум. Вәнт шу­шєм мос­ман тӑйӆєм. Итәх пурайн мўӊ Вўтвоша ӊ­хийӆӆўв. Вўӆы тащ тӑйӆўв. Тӑӆ пурайн мўӊ «Буран» нємпи тўтӑӊ хопн вўӆэт ӆавӑӆты ӊхӆўв.  Ӆўӊ пу­райн ӆыв юхи ӑкумӆӑт, вантэ, вәнтӑн шєӊк ар пєӆӊа-нямӑӆт па пирум. Юӆн мўӊ ӆывеӆа пәсӑӊ вєрӆўв. Ма ӑӊкєма нянь вєрты нётӆум, нянь шум вєрӆум, щӑӆта кәра нянь омӑсӆум.

Ма Тәрумӆор вош пўӊӑӆн єнумсум, 14 оӆа йисум. Ӑӊкєм-ащєм вўӆы ӆавӑӆман вәӆ­ӆӑӊӑн, щирн ма хўв мӑр вәнт кәр­тэвн вәӆӆум. Оӆ мӑр вўӆэт ӆавӑӆӆўв. Щи тумпи хўӆ веӆпӑсӆӑӆўв. Сўс пурайн вар омӑсӆўв па хәӆум-нӆ тыӆӑщ мӑр хўӆ веӆ­ӆўв. Щӑта ев, сорт па мевты веӆӆы. Веӆум хўӆ мўӊ суӆыӆўв, тӑӆ пурайн щит ӆєӆўв, щитн вў­ӆыӆўв ӆапӑт­ӆўв, щӑӆта ампӑта кавӑрт­ӆўв.  

Йис пурайт вўш эвӑӆт па ин тӑм хӑтӆэв вәнты мўӊ хўӆӑӊ-ӆаӊтӑӊ Асэв питӑрн вән па хурамӑӊ авӑт лоӊӑӆн и ай хӑнты кәртые омӑсӆ.