Ас нопӑтты тыӆӑщн 24-25-мит хӑтӆӊӑнӑн Санкт-Петербург вошн вуӆаӊ мирхот вәс, хута Россия мўвевн вәӆты арсыр ясӊӑт ӆєрамтты вєрӑт оӆӑӊӑн учёнойт путӑртсӑт. Мирхот Увӑс мўв, Сибирь па Дальний Восток шуши мирӑт Ассоциация па шу­ши мирӑт благотворительной фонд ёх ӆэщӑтсӑт. 

Тӑм ванӑн Югра мўв кәща ими Наталья Комарова арсыр мир оса тӑхет кәщайт пиӆа вәйтантыӆӑс. Ёмвош округ сыр-сыр айӆат ёх тӑхи кәща нє Юлия Трушкова путӑртсӑӆэ, муй­сӑр әмӑщ етнхотӑт ӆыв ӆэщӑтыйӆсӑт. 

Ван хӑтӆуп тыӆӑщн 2018-мит оӆн иса рәт ясӊӑт мӑӊхӑтӆ вєрты ӆпн «Рәт ясӑӊ – ан ху­ӆӑты юхан» нємуп әмӑщ вәйтантупсэт ӆэщӑтсӑт. Щирн рәт ясӊӑтн арсыр мир эвӑӆт няврємӑт арӑт па ӆўӊӑӆтупӑт ванӆтӑ­сӑт. Щи тумпи вән хуя­тӑт ищи ӆыв ясӑӊӆаӆн путрӑт ӆўӊӑтсӑт.

Ас нопӑтты тыӆӑщ 21-митн «Финно-угорской тови – 2019» вән мӑӊхӑтӆ пурайн «Финно-угрӑт йис вәӆупсы ӆавӑӆты вєр» нємпи хӑр рәпитӑс.

Ёмвошн шуши мир пиӆа Россияйн рәпит­­ты Венгрия мўв Посол ики Норберт Конкой «Торум Маа» йис пур­мӑсӑт шавиман тӑйты тӑхийн вәйтантыӆӑс. 

«Торум Маа» тӑхийн рәпитты хәйӊӑн Вячес­лав Кондин па Анатолий Брусницин ай павӑрт хотӑӊ, нянь кәрӑӊ, ӆу­пасӑӊ ай кәртые ванӆ­тӑсӊӑн. Еӆӆы Венгрия мўв Посол ики Норберт Конкой нянь кәр эвӑӆт каврум нянь сӑрн нух таӆӑс. 

Ас нопӑтты тыӆӑщ 29-митн Омск вош эвӑӆт Ёмвоша «Николай Пирогов» нємпи леккар тўтӑӊ хоп юхтӑс. Тӑӆ мӑр ӆўв щӑта йиӆпатсы.

«Центр профпатоло­гии» нємпи леккар хотн айкеӆӑт тәты хә Евгений Машаров лупӑс, кӑт хӑтӆ мӑр щи тўтӑӊ хопа иса мосты пурмӑсӑт тәты питӆыйт, щи юпийн 31-мит хӑтӆӑн имухты округев хўваттыйн мӑнӆ.

Тӑта мосванӑн Ас нопӑтты тыӆӑщ 21-мит хӑтӑӆн Ёмвошн айкеӆӑт ӑкӑтты хӑннєхуятӑт мўв-авӑт ӆавӑӆты вєрӑт тәты департамент кәща ӆӑӊкӑр хә Егор Збродов па Югра мўв «База авиационной и наземной охраны лесов» кәща хә Иван Шевцов пиӆа вәйтантыйӆсӑт. Щи мирхот мӑнум пурайн айкеӆ ӑкӑтты ёхӆўв уша вєрсӑт, муй щирн округев вәнтӑт тўт питты вєрӑт эвӑӆт ӆавӑӆӆыйт. 

Сырыя Е. Збродов путӑртӑс, хуты тӑм хӑтӑӆн мўӊ окру­гев ӆуватн нємуӆты тўтн питум муй тўтн ӆєты тӑхи ӑнтәм. 

Ас нопӑтты тыӆӑщн Ёмвошн «Югра» нємуп айкеӆӑт ӑкӑтты  тӑхийн телевиденияйн, радивайн па газетаитн рәпитты хӑннєхуятӑт Югра мўвев хотӑт омӑсты департамент кәща хә Андрей  Кривуляк па социальной развития департамент хущи рәпитты нє Людмила Низамова пиӆа вәйтантыйӆсӑт па арсыр айкеӆӑт уша павӑтсӑт. Тӑм мирхотн вән кәщайт путӑртсӑт, муй щирн 2019-мит оӆн ар няврємӑӊ айӆат хоттєӆ хӑннєхуятӑт ипотека щирн ӆәтум хотӆаӆ пӑта тәп иӆєм пўш сухуптӑты вухӑӊ нётуп­сыйн ма мӑӆыйт.    

Ас нопӑтты тыӆӑщ 15-мит хӑтӑӆн иса мўвӑтн вәӆты мир Мўвтєӆ хоттєӆ ёх емӑӊхӑтӆ постӑӆӑт. Тӑм мӑӊхӑтӆ 1993-мит оӆ лыпӑт хойты тыӆӑщн ООН нємуп Генеральной Ассамблея кәща ёх поступсы щирн ӆэщӑтсы, ӆәӆн хоттєӆ ёх нў­шайт оӆӑӊӑн уша вєрты па щитӑт тўӊматты.

Югра мўв кәщайт ун­тасн тӑм оӆн тӑӆаӊ «Хот­тєӆ ёх апӑт хӑт» эщӑтсы. Щиты Ас но­пӑтты тыӆӑщ 15-митн округ ӆуваттыйн кашӑӊ вош пәӆьницайн веӆщи сєма питум пушхӑт тӑхи хуща ӑӊкет па тёпиеӆаӆ пӑта мӑӊхӑтӆ вєрсы.

Ас нопӑтты тыӆӑщ 21-мит хӑтӑӆн Ёмвоша хӑнты, вухаӆь ясӑӊӊӑна няврємӑт ӑшколайтн па колледж хуща вәнӆтӑты ёх ӑктӑщийӆсӑт. Тӑм вән мирхотн путӑртсӑт щи оӆӑӊӑн, муй иты ӑшколайтн няврємӑт рәт ясӊӑт вәнӆтӑӆӑт. 

Ас нопӑтты тыӆӑщ 30-митн Ёмвошн округ дума депутатӑт 29-мит мирхотн  ӑктӑщийӆман 19 вєр нух вантсӑт.

Ӆыв щи хӑтӆӑн 2018-мит оӆ бюджет вє­рӑт оӆӑӊӑн путӑртсӑт. Округ вухӑт мир нало­гӑт эвӑӆт 15 миллиарда аршӑка йисӑт. Ияха ки ӆўӊӑтты, мӑнум оӆ мӑр бюджетэва 270 мил­лиард шойт вух йис. Щи кўтн 233 миллиард шойт вух тӑруптӑсы. 36 миллиард шойт вух – щит профицит (юхтум вухӑт эвӑӆт хӑщсӑт). 

Щи тумпи депутатӑт тӑм оӆ хәӆум тыӆӑщ мӑра ми­юм бюджет оӆӑӊӑн пу­тӑртсӑт. Дума кәща хә Б. Хохряков лупӑс, щи вухӑт план щирн тӑ­руптӑсыйт.

Угут кәрта яӊхмємн ма хурамӑӊ кӑрӑщ кирмӑщ хот шиваӆӑсум, щи хот пўӊӑӆн няврємӑт юнтсӑт, щирн ма имухты уша вєрсєм, щит хӑнты няврємӑт вәӆты-хоӆты хот. Щив ӆуӊмємн ма няврємӑт вантман тӑйты нє Мария Анатоль­евна Дмитриева пиӆа вәтаӊа йисум. Ӆўв тӑм хот аӆяс па имухты айкеӆ тәс.

М.А. Дмитриева кӑт нєпек тӑйӆ, и щирн ӆўв хӑтӆ мӑр ай няв­рємӑт вантман тӑйты нє, кимит нєпек щирн – математика па инфор­матика урокӊӑн тәты нє. Ӆўв 18 оӆ Угут кәртӑн интернат хуща рәпитӆ. 

Вәс ки Артанзеев хӑнты мир кӑнащ хә, хуты хәнты ӆўв рәтэӆ хуща учёной нє питӆ – щит Софья Владимировна Онина. Вантэ, ӆўв аӊкаӊкеӆ Анас­тасия Захаровна Пырысева, эвеӆ опращнємӆ Ар­танзеева вәс. Щит Кунавӑтской мўвев хӑнты кӑнащ рәт. Тӑм ванӑн С.В. Онина 50 оӆа йис.

Касум вошн вўӆєӊ ёх мӑӊхӑтӆ пурайн арсыр ванӆтупсэт рәпитӆӑт. Щи пурайн вошӑӊ мир ёнтум ӆәмӑтсухӑт, ар­сыр пурмӑсӑт ванӆтӑ­ӆӑт па тыныӆӑт. Щиты мойӊ хуятӑт шуши мир йис вєрӑт оӆӑӊӑн уша павӑтӆӑт.

Тӑм оӆн щи мӑӊхӑт­ӆӑн ма Касум няврємӑт вәтаӊа вєрсум, ӆыв щи пурайн арсыр мосты пурмӑсӑт тынысӑт. Ин щи няврємӑт оӆӑӊӑн еша хӑншӆум.

Тӑм оӆ вән кєр тыӆӑщ 22-митн Марина Андреевна Кане­ва (Ерныхова) ветъяӊ оӆа йис. Ӆўв Нуви сӑӊхум район Касум вошн вәӆ, ар оӆ мӑр ӆап­кайн рәпитӆ.

Тарнӑң хўв йис пурайн Конда юхан вухаь мир вурщӑк хошум мўв эвӑт юхӑттыйн нємасыя мӑңхӑт вєрӑнтсӑт. Тӑмӑщ әмӑщ мӑӊхӑтӆ «Торум Маа» музей хуща рәпитты ёхн 2009-мит о вўш эвӑт Ёмвошн вєрты питса.

Тӑм йисн няврємӑт рәт ясӑӊа вәнӆтӑты ӆавӑрт вәӆ. Хутысаты щи вєр Удмуртияйн вєрӆы, щи оӆӑӊӑн «Билингва» нємуп тӑхи кәща нє Татьяна Геннадьевна Волкова III-мит Мўвтєӆ ху­до­жественной культура мирхотн (2017) па Год языков коренных народов в России (2019) нємуп вәйтантупсыйн ай павтӑс. Мо­сӑӊ, ӆўв путрӑӆ хӑнтэта па ву­хаӆята, хуйтат няврємӑт вәнӆ­тӑӆӑт, әмӑщ ӆўӊӑтты питӆ.  

Удмуртской ясӑӊӑн путӑртты әмща йис 

Ас нопӑтты тыӆӑщ 20-25-мит хӑтӆӑтн Ёмвошн «Финно-угорской тови – 2019» нємпи айӆат ёх пӑты Мўвтєӆ вән вәй­тантупсы вәс. Тӑм арӑӊ-якӑӊ мӑӊхӑтӆ кӑт щирн ӆэщӑтсы: оӆӑӊ – «Югра мўв финно-угрӑт вәйтантупсы», кимит – «Мисс студенчества Финно-Угрии – 2019».

Щиты вет хӑтӆ мӑр вошев нюр айӆат ёх пӑта мӑӊ­хӑтӆӑӊ хӑра йис. Россия мўв арсыр вошӑт па па хон пєлӑк Венгрия, Финляндия па Эстония мўвӑт эвӑӆт мойӊа юхтум ёх пӑ­та арсыр вәйтантупсэт, ӆўӊ­туп­сэт, етнхотӑт, арӑӊ-якӑӊ вє­рӑт, мирхотӑт, ванӆтупсэт, вәнӆ­тыйӆты хӑрӑт ӆэщӑтсыйт.