№ 2 (3494) - 2018

Мӑнум он юхи хӑщум тыӑщн округ кәщайт хотн вәйтантупсы вәс. Щӑта путӑр мӑнӑс, муйкєм арат няврєм 2017-мит он сєма питӑс. Щи мирхот округ кәща ӑңкӑр хә Всеволод Кольцов тәс. ўв лупӑс, хуты Россия мўв правительства кәща ӑңкӑр нє Ольга Голодец ястӑс: «Кәщайта иса муй мос вєрты, ән аршӑк няврєм сєма ат питӑс».

Ас хӑты тыӑщ 10-мит хӑтӑн айкеӑт эщӑтты ёх мирхота ӑктӑщийсӑт, ән айке тәты, муй арата пенсия вух єнмӑ па муйсӑр вухӑң нётупсэт 2018-мит он мӑты питыйт. Щи вєр пӑты тыв округ мир нўшайт па арсыр нётупсэт эщӑтты тӑхи кәща нє Светлана Давиденко, Югра мўв пенсионной вєрӑт вантман тӑйты тӑхи кәща ӑңкӑр нє Ольга Турнаева па округев хўваттыйн пенсионной тӑхийн нётупсы вухӑт артаӑты кәща Надежда Суродеева вохсыйт.

2018-мит о 18-19-мит хӑтңӑнӑн Югра мўв кәща нє Наталья Комарова рәпата щирн Нягань вошн па Манстӑр район Приобье кәртӑн вәс. Оӑңмит хӑтӑн аӑңсаты ўв Нягань вош кәща хотн мирхот ӑктыӑс. Тӑта няврємӑт па айат ёх вәнтӑты тӑхет оӑңӑн путӑртсы, ән кашӑң ӑшкола и смена щирн ат рәпитӑс. Щи тумпи хӑннєхә вәты хотӑт хәлы, щит хӑннєхә юхитыйты йиңкӑт па пасыр мусаты утӑт йипатты вєр оӑңӑн путӑртсы. Мос ястӑты, хуты тӑм мирхота кашӑң район па вош кәщайт юхтыйсӑт па айке тәсӑт, муй щирн ыв мўван тӑм вєрңӑн эщӑтыйт.

Ас хӑты тыӑщ 19-мит хӑтӑн Ёмвошн социальной развития Департамент хущи вәты па мәшӑң ёх пӑта арсыр нётупсэт эщӑтты Общественной совет хӑннєхуятӑт мирхот вєрсӑт. Щи пурайн ияха ӑктӑщум хуятӑт епийн Станислав Кононенко кәщае лупӑс, муй щирн юхи хӑщум 2017-мит он рәпитсӑт па мӑта вєрӑт яма тўңматсӑт.

Йиуп о епийн айкеӑт ӑкӑтты хуятӑт Ёмвош пәьница няврємӑт лекщитты па ямӑты тӑхия мойңа ӑктӑщийсыйт, ән вантӑты, хутыса тӑта пушхӑт лекщитыйт.

«Хӑнты ясӑң» оӑңмит газетайн ай павӑтсўв, ван хӑтуп тыӑщн шуши мир Ассамблеяйн «Об организации первичной медико-санитарной помощи в местах традиционного проживания и традиционной хозяйственной деятельности коренных малочисленных народов Севера в Ханты-Мансийском автономном округе — Югре» нємуп мирхот мӑнӑс.

Кашӑң о округ дума кәща хә Борис Хохряков айкеӑт хӑншты ёх пиа вәйтантупсы вєрӑнтӑ. Щӑта ўв путӑртӑ, муй щирн о мӑнӑс, муйсӑр вєрӑт депутатӑт о мӑр эщӑтсӑт па муй ыв йиуп он вєрты питӑт.

«ЮграТур 2016» нємуп вантупсыя Томской область Парабель вош эвӑт вет хуят юхтыйсӑт. Щитӑт кўтн селькупӑт вәсңӑн, щит Юрий Тобольжин па Ирина Коробейникова. Юрий опращ хә — Тоболда Нимгодин — кӑнащ, катра йисн ўв Тогурской инородческой мўвн вәс. Ирина — шуши мир культура нух аумты хот рәпатнек.

Нефтеюганской районӑн 33 вәнт шуши вә, хута хӑнтэт шуши мир йис вєрӑт авӑман, вой-хў вепӑсуман, воньщумутӑт ӑкӑтман вәӑт. Щӑта 87 хӑннєхә вә. Мӑнум он ма хӑнты хә Николай Прокопьевич Кайнов пиа вәтаңа йисум, щит «Соровские озёра» нємпи вәнт шуши ух хә.

Айат па таксар хӑнты хә Иосиф Покачев кашӑң товийн нємасыя «Вўєң, хў па вой вепӑсӑты ёх» кӑсупсэта яңхӑ. ўв ӑнтә вўыйн кирум әхӑтн кӑсӑ, тӑм хӑннєхә рәт мирӑ айшӑк хә ёх кўтн ӛра-щома тәса вантӑ па артаӑ. Мос лупты, хуты Иосиф Покачев тӑмхӑт 29-мит рәт щирн ўңӑтты мўвӑн, мӑта тӑхи 150 километра вўшн тӑм Русскинской кәртые эвӑт Сәрхан районӑн вә. ўв рәт мўвӑ пўңӑн тӑта мосванӑн мўв ипи тащ кӑншты тӑхи рўщӑт йиуп Имиор нємуп месторождения пўншсӑт па ин щи ут хущи арсыр рәпатайт эщӑтӑт.

Ас хӑты тыӑщ 13-мит хӑтӑн Россия мўв уватн Айкеӑт кӑншты ёх емӑңхӑт постӑы, щит пӑта ин ма вўтьщӑум нынана хӑнты ясӑңӑн  айкеӑт эщӑтты хӑннєхә оӑңӑн хӑншты. ўв ӑнтә хошум ар йитпи хот ыпийн ӑ щиты омӑс па ўйпӑң шӑншман тыӑщ вух тәрум пӑты хоумтӑ, ўв ар о мӑр хурамӑң айкеӑт вєрман хӑнты ёх кўтн тўңщирӑңа па вещката рәпит.

Нягань вошн «День рода» нємуп емӑңхӑтӑн Светлана Гавриловна па Александр Владимирович Курбатовңӑн имеңӑн-икеңӑн пиа вәйтантыйсум. ын нәлам шуши мир емӑңхӑтӑта юхтыйӑңӑн, хән щитӑт вошн вєрӑнтыйыйт.

Ван хӑтуп тыӑщ 16-митн 2017-мит он вухаь мир учёной ими Анастасия Ильинична Сайнахова 85 оа йис. «Югра ыңуптӑты» оса тӑхи хотн вәйтантупсы вәс. Щив юхтум мир нәптӑ вәна ювум имия ар хошум ясӑң лупсӑт.

Нуви сӑңхум вош районӑн антӑң Ас, хўӑң Ас пўңӑн Понавӑт вош вә. Хўв йис тєӑн тӑта хӑнты мир вәсӑт. Вантэ, воше нєм хӑнты щирн пона юхан па авӑт ясӑң эвӑт тывӑс. Щӑта союм хонӑңӑн йис вўш эвӑт ай хӑнты кәртыенӑн Ас ёх Нёмысовӑт, Туполевӑт, Сызаровӑт па Тарлинӑт вой-хў вепӑсуман вәсӑт. Тӑ пурайн мир вәнтыты яңхийсӑт. Понавӑт шєңк вєра катра вош. Йис нєпекӑтн хӑншман вә: Пётр I хон ики 1714-мит он поступсы унтасн Понавӑт вошн Тәрум хот омӑсса.

Ас потты тыӑщн Ёмвошн Югра писателят тӑхи 20-мит оа ювум емӑңхӑт постӑсы. Щи пурайн ямкєм ар хӑннєхә округев па Россия арсыр вошӑт эвӑт тыв киникайт хӑншты ёх вәйтантупсыя юхтыйсӑт. ыв кўтэн ма Альбина Семёновна Кузьмина пиа вәйтантыйсум па ўв пиэа путрємӑсум, муйсӑр вєрӑт литература щирн вошен йипа эщӑтсӑт.

Мӑнум о ван хӑтуп тыӑщ округев емӑңхӑт пурайн Екатеринбург вош кӑши-мәш тӑйты ёх ямӑты хотн «Ариты вєр — тӑаңа вәты щирєм» нємпи арӑң вәйтантупсы мӑнӑс. Тӑта мәшӑң хуятӑт ещат оперной щирн арӑт ариты нє, сыры оӑтн Югра мўвн вәты имие Раиса Александровна Квашнина арӑт вантӑс.

Тәня юхи хӑщум тыӑщн Югра мўвӑң опера арӑт ариты ими Софья Шесталова «Избранное» нємпи киника єтӑс. Щит ўв вухаь мир поэт Юван Шесталов шәңӑт 80 оа йиты пӑты эщӑтӑс.

Иисус сєма питум емӑңхӑт епийн Мегион вошн йис пурмӑсӑт ӑкӑтты па шавиман тӑйты «Югра» нємуп хот пўңӑн вошӑң шуши няврємӑт ияха ӑкӑтсыйт. Пушхӑт пӑты тӑта моньщ иты Казамкинӑт вәнт кәрт нємпи әмӑщ юнтӑң хӑр эщӑтсы. Няврємӑта увӑс мир йис вєрӑт вантӑсыйт, юнтӑң па ӛращты вєрӑта вәнтӑсыйт. Щӑта кашӑң няврємие ёшңӑан ай хурамӑң мойупсы вєрӑс.

Йиуп о юхӑтты єпн ван хӑтуп тыӑщ 30-мит хӑтӑн 2017-мит он Ёмвош районӑн Кышик па Цингалы вошӑтн няврємӑт мӑвӑң мойупсэтн катуптӑсыйт. Щиты «Добрый Югорчанин» па «Дед Мороз Единоросс» нємуп вәйтантупсэт эщӑтсайт.