№ 13 (3601) - 2022

Тӑм оӆ лыпӑт тыӆӑщ 22-мит хӑтӑӆн округ кәща нє Наталья Комарова Юван Шесталов нємпи премия хоӆумтум ёх мойӆӑсӆэ. Иван Николаевич Шесталов нємпи вухӑӊ премия 2012-мит оӆн округ правительства ёх ӆэщӑтсӑт. Щи пура вўш эвӑӆт кашӑӊ оӆ мєт апрӑӊ, вєрӑӊ па нумсӑӊ йис вєрӑт ӆєрӑмтты шуши мир пириӆы, ӆәӆн вухӑӊ премияйн катӆуптӑты. 

Мурманской область хуща лыпӑт тыӆӑщн 20-26-мит хӑтӆӑтн, арсыр увӑс мир айӆат ёх пӑта, тарнӑӊ пӑнт хўват «По следам той войны (Патриотическое волонтёрство)» шәшупсы вєрӑнтса. Тӑмӑщ вєр Елена Алмазовая нумӑса питӑс, ӆўв Мурманской область хуща Кольской мўв саамӑт ассоциация хуща рәпитӆ. Щи нумӑсн тӑйты вєр Любовь Саламащенко ӆэщӑтты питӑс, ӆўв ищи щи мўвн увӑс мир пиӆа рәпитӆ.  

Лыпӑт тыӆӑщ 30-митн Ёмвошн округ дума депутатӑт 10-мит мирхота ӑктӑщийӆсӑт.  Тӑм пўш мирхот кәщая Дума кәща ӆӑӊкӑр нє Наталья Западнова вәс. Сырыя ӑктӑщум хуятӑта ӆўв айкеӆ тәс, хуты лыпӑт тыӆӑщ 28-мит хӑтӑӆн Тюменской Дума кәща Сергей Корепанов ӑнтәма йис. Щи пӑта округ Дума мирхотн оӆӑӊӑн минута молчания вєрсы, тәп щи пийн путӑр тәсы.

Фермая ма тунят от ёхытсым. Ота хотна анта йит мис пуста питмем вуш эвыт. Там мар кашинг ий мис эвыт 1700 литра эсымйингк пуссым. Ма вусым ясынг кашинг мис эвыт пуста там от мар 2050 литра эсымйингк. Отшуп мар ма пуссым 1130 лит­раны. Матым ясынг, что вуим ястыпсэм тарматтэм.

Сит тохытпи хус хатл туватты унта ма хут мис поших энмыттысым. Ин­там ма кашинг мис эвыт 8-9 литра пустым, а имот­ты мисыт эвыт 12-13 литраны.

Ма хутым ота исым хун пивты вохсарыт тайты ферманы заведующая ру­питта питсым. Отынг от мар мунг шимит вохсар эн­мыттытсув.Отынг от ма рупитта питмем артны, туп 3 вохсар пошихны ка­шинг ий нэ вохсар ухтыя энмытсытсув. Маха от мунг – 3,5 пошихны, а там от – 3,69 пошихны кашинг ий нэ вохсар эвыт энмыт­ты­сув, Вальча Айваседа па Полина Филатова ямыс рупитсынгын. Тын пяты вохсар пошихны кашинг нэ вохсар ухтыя энмытыснгын.

Вохсар поших яма энмытымем пата ма Все­союзной сельско­хозяй­ственной выставкая янг­сым па медальны масаим.

Ёмвош район Согом кәртӑн ма хӑнты хә Василий Гордеевич Сургучёв пиӆа вәтаӊа йисум. Ӆўв ай пура вўш эвӑӆт ин вәнты хўӆ веӆпӑсӆуман вәӆ, иха ки ӆўӊӑтты – щит 60 оӆ мӑр. Оӆӊӑӆн ащеӆа нётӑс, ӑшкола пийн колхозн рәпитты питӑс. Щи пӑта ӆўв вуӆаӊ мевӆ посӑтн, «Ветеран труда России» нємн мӑсы. 

Щиты Дарья Даниловна Лаптандер пут­рӑӆ оӆӊитсӑӆэ. Ма ӆўв пиӆэӆа тӑм ванӑн вәтаӊа йисум.

Ма пиӆєма рәпит­ты нє мӑӆтыйӆты щира округ пәӆьницая ӊхӑс, юхӆы кєрӆӑс па лупӑс, хуты щӑта ар оӆ юрн ими рәпитӆ. Ма имухты щив мӑнсум, Дарья Дани­ловна вәйт­сум. Ӆўв щиты путӑр­тӑс:

 Ма 1964-мит оӆн Ямал пәхӑрн юрн хоттєӆ ёх хуща сєма питсум, ӑӊ­кєм-ащєм хўӆ па вой веӆ­пӑсӆуман вәсӊӑн. Мўӊ семьяевн нӆ няврєм вәс. Ӑӊкєм оӆӑӊмит икеӆ эвӑӆт кӑт хуят, кимит хә эвӑӆт ищи кӑт пушхие сєма питсӑӊӑн, ит – щит ма. Айтєӆн нӛрумн єнумсум, ӑӊкєма нётсум.

Лыпӑт тыӆӑщ 18-мит хӑтӆӑн Ванзетур кәртӑн «Мань хап» нємпи кӑсупсы мӑнӑс, щӑта нух питум хуят Сўмӑтвош район кәща эвӑӆт Кубок мойӆупсыйн мӑсы. Кӑсупсы Ванзетур кәрт 90 оӆа вмаӆ пӑта вєрӑнтсы. Щив Сўмӑтвош район арсыр ай кәртӑт эвӑӆт мир юхӑтсӑт.

Тӑм ванӑн Ёмвошн «Торум Маа» нємпи тӑхийн «III Шесталовские чтения» нємпи мирхот вәс. Щит вухаӆь мир поэт Юван Шесталов шәӊӑт нәмӑӆмӑты пӑта ӆэщӑтсы, тӑм оӆн ӆўв 85 оӆа ӆәӆн йис. 

Мирхотн учёнойт, путрӑт хӑншты ёх па па хуятӑт ӑктӑщийӆсӑт. Щӑта шуши мирӑт лите­ратура па ясӊӑт оӆӑӊӑн путӑртсӑт.

Мўвтєӆ мир мирхот

Юван Шесталов – вухаӆь мир кўтн оӆӑӊмит поэт, ӆўв 80 муӆтас путӑр хӑншӑс. Мирхот пўншты пурайн «Хӑнты ясӑӊ» па «Луима сэ­рипос» газетайӊӑн кә­ща нє Светлана Динисламо­ва лупӑс:

Касум кәртӑн йис пурмӑсӑт ӑкӑтты па шавиты тӑхи вәӆ. Щӑта «Касум ёх» тӑхийн кәртӑӊ па мойӊ мир пӑта арсыр әмӑщ вєрӑт, вәнӆтӑты хӑрӑт, ванӆтупсэт, мӑӊхӑтӆӑт ӆэщӑтыйӆӆыйт. Щив юхтыйӆты имет па айӆат ёх пўнӑӊ сух, кепӑӆ, хўӆ сух, тунты эвӑӆт сыр-сыр пурмӑсӑт ёнтты па вєрты вәнӆтӑӆыйт. 

«Касум ёх» тӑхийн кашӑӊ рўть­щӑты хӑтӆӑн мойӊ мир пӑта әмӑщ вєрӑт вєрӑнтӆыйт. Щиты тӑм ва­нӑн «Тӑӆаӊ ёш, тӑӆаӊ кўр» вєр ӆэщӑтыйӆсы. Щӑта рәпитты нєӊӑт юхтум хуятӑт пиӆа сўмӑт вәш па тунты ӑкӑтты ӊхсӑт. Щӑӆта шай ка­вӑртсӑт па тунты эвӑӆт анӑт ёнтсӑт.

Россия ӆуват «Устойчивое развитие этнокультурного сектора» III-мит вән мирхота мўӊ Югра мўвев эвӑӆт хӑнты ёх ӊхсӑт. Тӑм вән мирхот ар мир ӛрн ӆэщӑтсы, щит сыр-сыр мир ӆәхсӑӊа, ма вәӆты Ресурсной центр тӑхи хуятӑт, Россия арсыр мир Ассамблея па РФ Общественной палата ёх унтасн. 

Лыпӑт тыӆӑщ оӆӊиттыйн Кондинской район «Этнопарк Силава» нємпи рўтьщӑты тӑхийн «Рәт мўвев ӆыӆ рўв» шуши мир мӑӊхӑтӆ вєрӑнтсы. 

Щӑта округев ар­сыр вошӑт па кәр­тӑт эвӑӆт якты-ариты ёх ӑктӑщийӆсӑт. Рўтьщӑ­ты тӑхи кәщая Ольга Алек­сандровна Фомичёва вәӆ. Аӆӑӊӑн мойӊ ёх ву­хаӆь щирн Хӑтӆ Имия пойкщӑсӑт, ӆыв вохсӑт, ӆәӆн иса мир тӑӆаӊа, ма ат вәсӑт, еӆӆы тәп уяӊ, хӑт­ӆӑӊ хӑтӆӑт ат юхӑт­сӑт. 

Щи пийн юхтум мир соӆамӑтн ӆапӑтсыйт, кав­рум шайн яньщӆтӑсыйт. Щит хӑтӆӑӊ хӑтӆ вәс. Мойӊ ёх пӑта арсыр тӑхет эвӑӆт юхтум ёх яксӑт па арисӑт. 

Мўӊ хӑнты мирев кўтн тӑм йисн ар нумсӑӊ па рәт миреӆ па культураеӆ пєӆы сӑмӑӊ хуятӑт вәӆӆӑт. Ӆыв сыр-сыр мосты әмӑщ вєрӑт ӆэщӑтӆӑт, йис вєрӑт нух аӆумӆӑт па шавиман тӑйӆӑт. Щит йис арӑт, якӑт, йис путрӑт, пурмӑсӑт ӑкӑтӆӑт, шўкщӑты-ёнтӑсты вєрӑт уша вєрӆӑт па айӆат ёх щи ута вәнӆтӑӆӑт. Ӆәӆн еӆӆы вәӆты айӆат хуятӆўва мўӊ хӑнты мирев щирӑт ат хӑщсӑт.

Тӑм ванӑн мўӊ редакцияева вәтаӊ финно-угровед хә Юрий Владимирович Андуганов шәӊӑт Ярослав хиӆэӆ рәпитты юхтӑс. Ӆўв кӑт финно-угорской мирӊӑн эвӑӆт, ӑӊкеӆ – мари нє, ащеӆ – вепс хә. Ипўш ӆўв ӆаӆясум рәтӆаӆ оӆӑӊӑн путӑртӑс.

Юрий Владимиро­вич Андуганов аӊ­щащеӆ Валерий апщеӆ ай тәс:

 Ижбулатовӊӑн щащєм па щатьщащєм вет пух тӑйсӑӊӑн. Иштуган вән пухӑн ай пурайн ӑнтәма йис. Вайтук Андуганов «I Гигант» нємпи колхозн оӆӑӊ­мит тракториста вәс. Советско-финской ӆаӆьн ӆаӆясӑс. Вуӆаӊ Оте­чест­венной ӆаӆь пурайн Ста­линград вош ӆавӑӆман ӑнтәма йис. 

Тӑмхӑтӆ мўӊ «Хӑнты ясӑӊ» газетаев 65 оӆ постӑты вўраӊӑн хәӆумхущъяӊмит иньщӑсупсы хӑншӆўв. Юхӆы ясӑӊ тыв китаты:  khanty-yasang-65@mail.ru.

13. Мӑта оӆн «Ленин пӑнт хўват» газета кәща хә Григорий Лазарев 55-мит тӑӆа йис па рўть­щӑты мӑнӑс?
 

«Ленин пӑнт хўват» па «Хӑнты ясӑң» катра газетайт ванттємн ванкўты нєпека нух хӑншум хӑнты мир йис арӑт, путрӑт, моньщуптэт, амамӑтщет шиваыйӆум. Щитӑт хурамӑӊ йис хӑнты ясӊӑтн хӑншман вәӆӆӑт. Товийн ма катра газетайт эвӑӆт амамӑтщет йиӆпа нух хӑншийӆсум. Интӑм еӆӆы «Ленин пӑнт хўват» газетайн 1977-мит оӆ вәйт ӆор тыӆӑщ 6-мит хӑтӑӆн 33-мит номерн вәӆты амамӑтщет ищипа хӑншты нумса юхӑтсум.