№ 1 (3517) - 2019

Ешӑк хӑнты мир, йиуп о пиа! 

Сәрхан мўвн Оңар юхан пўңӑн юкан авиеа авӑман Надежда Ивановна Покачева вә. Тӑм хӑнты ими вәнт кәртӑн вә. Ин ищки тӑ хӑтӑтн вўыеа пиа кәртыеӑн ёнтӑсман омӑс. ўв аще щирн мущаң рәт ёх эвӑт вәӆ.

 «Хӑнты ясӑң» газета ўңӑтты тынӑң ёх! Ин округ мирев Йиуп о емӑңхӑт епийн ям па хошум ясңӑт мўңева китсӑт па иса хӑнты мирева 2019-мит он тӑаң, ям, уяң, тащӑң вәупсы ӑңхаӑт. Ин щитӑт ўңтаты.
Округ Дума депутат, шуши мирӑт Ассамблея кәща хә Еремей Данилович Айпин: 
– Рәт мўвн вәты тынӑң мир!  Йиуп 2019-мит о па Рождество емӑңхӑтӊӑн пӑта сӑм вўш эвӑт йиты хошум ясңӑт китум!
Тӑм мӑнум он арсыр әмӑщ вєрӑт па йиуп щирӑт тывийсӑт. 
Йиуп о нынана уй ат тә, Рождество хӑтӑтн рәт ёхӑн пиа сӑмӑңа вәаты. 

Сәрхан мўвн Им лор пўңӑн вәнт кәртӑн юкан вўыеа авӑман Сергей Васильевич Кечимов вә. ўв йис щирн юх анӑт, ыйт, әхӑт, нарӑсъюхӑт, торсапъюхӑт па па утӑт тәса вєрты хош. Щи тумпи тӑм ики Пўпи якты хот арӑт, ўңӑтупӑт, моньщӑт, йис путрӑт вәэ. ўв айат ёх пиа ванкўты вәйтантый. Ин йиуп 2019-мит о юхтум хӑтӑтн нынана вўщайң ясңӑт сәрхан хӑнты ики Сергей Васильевич Кечимов китӑс:
– Ешӑк хӑнты мирєм, йиуп о пиа нынты!
Вой тӑйты, вўы авӑты ёхам 
Хорӑң тащӑн, войң тащӑн ат єнумӑт,

Ас потты тыӑщ 30-митн округ шуши мир ассамблея хуща вәйтантупсы вәс. Щӑта «2019-мит о – щит Мўвтє шуши мир ясңӑт о» нємпи вєр оӑңӑн путӑр мӑнӑс.

Ван хӑтуп тыӑщ 7-митн Ёмвошн 12-мит пўш Ищки икет, оньщӑң эвет па моньщӑң ёх ӑктӑщийсӑт. Интӑм 21 команда Манстӑр, Нуви сӑңхум, Нефтеюганской районӑт, Ёмвош, Нижневартовск, Сәрхан, Когалым, Нефтеюганск, Урай, Северодвинск, Миасс, Оренбург, Нарьян-Мар вошӑт, Татарстан мўв эвӑт вәсӑт. Щи тумпи па хон пєлӑк Белоруссия, Китай, Сирия мўвӑт эвӑт мойң ёх юхтыйсӑт.
Щи вән емӑңхӑта Ёмвошӑң ёх па мойң хуятӑт няврєма пиа юхӑтсӑт. Великий Устюг вош эвӑт юхтум вуаң Ищки Ики вўща вєрӑс:

«Почётный житель города Нефтеюганска» нєм тӑйты хӑнты ими Ольга Ефимовна Скакунова: 
– Хӑнты ясӑң» газетайн рәпитты хуятӑта, Ёмвош, Ваньщавӑт, Понавӑт, Касум вошӑтн вәты рәт ёхама па әйңӑама Йиуп о емӑңхӑт пиа ям вўща ясӑң китум. Тынӑң хӑнты ёх, йиуп о нынана уй, амӑт ат тә. Муй нын ӑңхаты, иса ат тыв. Хўв нәпӑтн вәаты! Тӑаң ёш, тӑаң кўр!

Хӑннєхә правайт вәнььты емӑңхӑт епийн ван хӑтуп тыӑщ хәтмит хӑтӑн «Югра» нємпи айкеӑт ӑкӑтты хотн округев уваттыйн хӑннєхә правайт хўват уполномоченной ими Н. Стребкова, няврємӑт правайт вантман тӑйты нє Т. Моховикова па ыв саттэа вєр тәты ёх правайт хўват уполномоченной вухаь хә Н. Евлахов пиа вәйтантупсы вәс. Кәщайўв айке тәсӑт, хутыса тӑм он округ мир правайт вантман тӑйсӑт па муйсӑр нўшайт тўңматты щир вәс.

Понавӑт вошн вәты нє Альбина Матвеевна Фирсова: 
– Вўща вәаты, «Хӑнты ясӑң» газетайн рәпитты ёх! Йиуп 2019-мит о емӑңхӑт епийн ма ӑңхаум нынана, әхсӑңа вәты хуятӑта, ям ясңӑт лупты. Ма ӑңхаум нынана тӑаңа вәты, таксара рәпитты! Нєпекӑн мўң иса пурайн авӑўв па ўңӑтўв. Нын газетайн мухты Югра мўвев иса мира ищи хошум ясңӑт лупум. Мўң – хӑнты мир – округев арсыр вошӑтн, кәртӑтн рәт ёх, вәтаң ёх тӑйўв. Мўң – и вән семья! Иса хуятӑта тӑаңа, уяңа, яма вәты ӑңхаум!  Кашӑң югорской семья уяңа-пищӑңа ат вә!

Вера Николаевна Айваседа, Покачи вош пўңӑн вўт кәртӑн вәты па ёнтӑсты нє:

– Ма Покачи вош пўңӑн вўт кәртӑн вўы тащєм авӑман вәум. Ма – вўєң нє, щирн шєңк ӑңхаум, ән вўєң ёх тащӑт вәна ат йиӑт.

Зоя Ильинична Сандрина (Ребась), Ямал мўв, орвош район, Муши вошӑң буркайт ёнтӑсты нє:
– Мўң, хӑнтэт, йистєн хў, вой вепӑсуман, вўы тащ авӑман вәўв, щирн ӑңхаум, ән йиуп он аршӑк хў, вой ат вәс, вўы тащӑтн ар пєши сєма ат пит. 
Ма – ёнтӑсты нє, вўы кєп эвӑт хошум хӑншӑң буркайт ёнтум. Хӑнты хӑншет – щит йис вәупсэв вўш эвӑт хӑщум хурамӑң хурӑт. Вўєң ёх эвӑт кєпӑт әтум, щирн шєңк ӑңхаум, ән вўы тащӑт вәншӑка ат йисӑт. 

Светлана Ивановна Рандымова, Касум кәрт, киникайт ўңӑтты хотн рәпитты нє: 

– Вўща вәаты, «Хӑнты ясӑң» газетайн  рәпитты ёх! Мос лупты, газетайн  рәпитты мир, хӑншты ёх вән вєр вєрӑт, мўң хӑнты ясңев сӑмӑңа тӑйэ, рәт ясңев еы тәэ. Шуши мирев вәупсы олӑңӑн айкеӑт хӑншӑт.

Ирина Кузьминична Фирсова, Нуви сӑңхум вош, Россия мўв народной мастер:
– Нуви сӑңхум районӑн вәты шўкщӑты имиета Йиуп 2019-мит о пиа хошум вўща ясңӑт китум! Тӑаңа-уяңа вәаты, ән йиуп он аршӑк ям па хурамӑң пурмӑс ат вєрсӑты. Вєрӑнтты вєрӑн сӑм вўш эвӑт ат йи. ән тыйты, ёнтӑсты йинтпӑн унтасн арсыр хурамӑң па әмӑщ пурмӑсӑт ат тывӑт. ән нын вәупсӑн мосты щирн ат мӑнӑс. Нын тыюм, ёнтум, вєрум хурамӑң пурмӑсӑн рәт ёхӑна, әхӑсӑна амӑт па уй ат тәӑт.
 

Сўмӑтвошн няврємӑт хӑт мӑр авӑты хотн лекщитты нєңа рәпитты ими Ксения Ивановна Юрьева:
– Тӑм ванӑн Сўмӑтвош районэв 95 оа йис, щирн Сўмӑтвошн вәты хуятӑта вўща ясӑң китум. Щи тумпи ывеа, Нуви сӑңхум район Ваньщавӑт кәртӑн па округ уваттыйн вәты хӑнты мирева Йиуп 2019-мит о емӑңхӑт пиа ям па хошум ясӑң лупты ӑңхаум, ән йиуп о ывеа ар амӑт ат тәс. Кашӑң хота уй ат уңӑ. Иса хуятӑт уяңа, тӑаңа, яма ат вәӑт! 

Нижневартовской район Варьёган кәрт шуши мир пурмӑсӑт шавиты хотн методиста рәпитты нє Зоя Спиридоновна Казамкина:

 – Ма хӑнты мир кўтн сєма питсум, єнумсум, Ёмвошн ыв пиӑа институтн вәнтыйсум, ин па ыв пиӑа рәпитум. Йиуп о емӑңхӑт вўраңӑн ма пиӑма вәнтыум эвета, пухӑта, Варьёган кәртӑң мира па иса хӑнты хуятӑта ям па хошум ясңӑт лупты ӑңхаум.

Ван хӑтуп тыӑщ 14-16-мит хӑтӑтн Сытомино пўңӑн Любовь Николаевна, Иван Игоревич Кузнецовңӑн па Константин Ефимович Сенгепов вәнт шуши кәртӑтн Пўпи якты хот вєрӑнтсы. Щив 50 мутас хуят ӑктӑщийӑс. 

2018-мит о етшӑтыйн Ёмвошн айкеӑт ӑкӑтты ёх округ дума кәща хә Борис Хохряков пиа вәйтантыйсӑт. ўв путӑртӑс, хутыса округ дума депутатӑт мӑнум о мӑр рәпитсӑт.

Ван хӑтуп тыӑщ 18-митн РИЦ «Югра» нємуп хотн «Пенсионное и социальное обеспечение югорчан» вєр оӑңӑн рўтьщӑты вухӑт мӑты хот кәща Татьяна Зайцева ай павтӑс.

Муйсӑр рўтьщӑты вухӑт вәӑт

Тӑм ванӑн Ас потты тыӑщ 30-мит хӑтӑн рәпатаем щирн Сўмӑтвош район кәща ӑңкӑр нє Ирина Викторовна Чечёткина пиа нємасыя вәйтантыйсум па путрємӑсум, хутыса ыв хущеа хӑннєхуятӑт вәӑт. Вантэ, ван хӑтуп тыӑщн Сўмӑтвош район луватн вәты мир районэӆ 95 оа ювум емӑңхӑтэ пориӑты питӑт. Муй щирн ыв хущеа хуятӑт тӑмхӑт вәӑт, муйсӑр нўшайт тӑйӑт, щи оӑңӑн ўве иньщӑссєм.

Ас хӑты тыӑщ 3-мит хӑтӑн 2019-мит он ариты нє Софья Алексеевна Шесталова 50 оа йис.

«Торум Маа» нємпи катра пурмӑсӑт авӑты хот 30 о постум пурайн Ёмвоша ар мойң ёх юхтыйсӑт. ыв кўтэн Хӑнты-Муши кәртӑң музей кәща нє Алла Васильевна Конева вәс. ўв редакцияева юхтыӑс па мин путӑртсумн.
– Алла Васильевна, нӑң рәпатаен оӑңӑн путӑрта.

VIII-мит Всероссийской Югорской полевой музейной биеннале нємуп мирхот вәум пурайн Ёмвошн «Таежные промыслы» (по материалам этноэкспедиций 2011-2018 гг.)» нємуп вантупсы вәс. Щӑта Илья Абрамов – щит этнограф па хурӑт вєрты хә – хурӑт вантӑсыйт. Щитӑтн вўєң мир па вой-хў вепӑсӑты ёх, щӑта ыв хота па мўв хурасӑт вәӑт. 

50 о мӑнӑс щи вўш эвӑт, хән юхи хӑщум артӑн Сәрхан районӑн Сытомино кәрт пўңӑн Пўпи якты хот вєрӑнтсы. Щит Дарко-Горшково кәртӑн вәс, ин тӑм кәртӑн нємхуят па ӑн вә. Вәната ювум хуятӑт щи хӑт яма нәмэ: хӑнты арӑт, хурамӑң якӑт.  

Апа, кашӑң хӑннєхә пӑта ван хӑтуп тыӑщ – щит пура, хән мўң о мӑр эщӑтум вєрўв, нумӑсўв тәса етшуптӑты ӑңхаўв. Щи тумпи тӑм юхи хӑщум тыӑщн мєт ар сыр-сыр вәйтантупсэт, вәнтӑты хӑрӑт, мирхотӑт па па утӑт вєрыйт. Щиты мӑнум о ван хӑтуп тыӑщ 14-16-мит хӑтӑтн «Югра ыңуптӑты» оса рәпата тәты тӑхийн «Наследие Югры» нєм-пи округев мўв йис вєрӑт тәты тӑхи ёх унтасн әмӑщ вәйтантупсы вәс. 

Ёмвошн ван хӑтуп тыӑщн олюпн хур хӑншты ики Геннадий Райшев музей хотн хӑншӑң йиңӑт, хинтӑт, воньщпӑт, онтпӑт аӆьты вантупсы вәс.  Тӑта мир шуваӑты кєша «Торум Маа» йис пурмӑсӑт тӑйты хот эвӑт па Амня вош эвӑт арсыр тунты эвӑт ёнтум утӑт тәсыйт. Щӑта ёх катра йис воньщпӑт, йиңӑт па сәнӑт вантсӑт. 

«Югра многонациональная» нємуп мирхот вәум пурайн ай эвет-пухӑт авӑты па вәнтӑты ёха «Этноигротека – как одна из форм народной педагогики» нємуп мирхот вєрӑнтсы. Щӑта «О педагогике мансийской игры» нємуп путӑр Виктор Прокопенко (Екатеринбург) путӑртӑс. ўв «Народные виды спорта» нємуп тӑхийн УрГПУ хущи рәпит, педагогической наука тохтўра па профессора вә. Щи ики тумпи Татьяна Волдина, Светлана Попова, Надежда Молданова па Евдокия Нёмысова юнтутӑт оӑңӑн ай павӑтсӑт. Николай Тасьманов мирхотӑң мир хӑнты юнтутӑтн юнтты вәнтӑс.