№ 21 (3585) - 2021

Ай тӑхет потты тыӆӑщ 27–мит хӑтӑӆн Югра мўвев кәщаит хотн шуши ёх вєрӑт ӆэщӑтты щирӑтн видеоконференция мӑнӑс. Щи вән мирхот кәщая Александр Новьюхов вәс. 

Ԯўв путӑр­тӑс, хуты ко­ронавирус мәш вєр пӑта тӑм пўш VII-мит Mўвтєӆ мир вўӆы ӆавӑӆты ёх конгресс тәп вән кєр тыӆӑщ 2022-мит оӆн Ёмвошн вєрӆы. Щи тумпийн йиӆуп алфавит, кашӑӊ ясӑӊ, пос хӑншты пӑта арсыр м поступсэт вўсыйт.  

Ай тӑхет потты тыӆӑщ 15-мит хӑтӑӆн Ёмвошн айкеӆӑт ӑкӑтты «Югра» тӑхийн теле­виденияйн, радивайн, газетаитн рәпитты хуятӑт округев информационной развития департамент кәща ӆӑӊкӑр нє Лариса Шанаулина, Тюменской область, Югра па Ямал федеральной служба государственной статистика кәща ӆӑӊкӑр хә Валерий Ярлов па Югра мўвев общественной па внешней связят департамент гражданской инициативӑт тӑхи кәща ӆӑӊкӑр хә Александр Пономаренко пиӆа вєрум мирхотн иха вәйтантыйӆсӑт па путӑртсӑт.  

Кашӑӊ оӆ васы мӑнты муй па Ас потты тыӆӑщӊӑнӑн Югра мўв налоговой вєрӑт тәты тӑхи кәща нє Ольга Литова айкеӆӑт ӆэщӑтты ёх пиӆа вәйтантыйӆ, ӆәӆн налог сухуптӑты вєр оӆӑӊӑн йиӆпа лупты. Щиты тӑм сўсн мўӊ интернет хуща онлайн щирн кәща нє пиӆа путӑртсўв.

Сырыя имущественной налог оӆӑӊӑн путӑр вәс. Вантэ, Югра мўв кашӑӊ хӑннєхәя, мӑта ёх вәӆты-хоӆты хот, мўв хӑр муй па карты әхӑӆ тӑйӆ, нємасыя хӑншум пищмайт китты питӆыйт, ӆәӆн нємӑӆт хӑннєхә налог сухуптӑты вєр аӆ юрємӑсӆэ. 

Мєт кєн па сора ӑкмум пенсия вухӑт оӆӑӊӑн уша вєрты пищ, щит:

- карты щўӊкӑт мухты лўӊӑтты кан сайт хот йитн «Личный кабинет» Россия пенсионной фонд  хуща: www.pfr.gov.ru;

- кӑншты «Единый портал государства» па муниципальной вєрӑт хуща: www.pfr.gov.ru.

Электронной щўӊкӑт мухты пищ вәӆ уша вєрты кан лицевой счёт ПФР хуща, щӑта ӑкмум пенсия вухӑт оӆӑӊӑн иса вєрӑт хӑншман вәӆӆӑт па хӑншман, муй тӑхийн щи вухӑт вәӆӆӑт.

Тәх щос щимӑщ вєр вәӆ, хӑннєхә пенсия вухӑӆ ӆўв ёшӑӆа вўты пищӑӆ ӑнтә. Мосӑӊ ӆўв мәша йис, ӑӆ рўтьщӑты тӑхия мӑнӑс муй па рәт ёхӆаӆ хуща мойӊа вәӆ па па вєрӑт вәӆӆӑт. Щирн пенсияйн вәӆты хӑннєхә нумӑс ат пунӆ, мӑта хуята ӆўв вухӆаӆ вўты рӑхӑӆтӑӆӆэ па щи хӑннєхәя ӆўвеӆа нємасыя нєпек хӑншты мосӆ. 

Пенсия вўты дове­ренность нєпек вєрты пӑта ар пищ вәӆ:

- нотариус мухты ёш посн па печатян пунты, ай вошн нотариус ки ӑнтәм – вош кәщайт хуща щи кана вәӆты хӑннєхә ёш пос па печать ат пунӆ;

- хӑннєхә рәпитты муй па вәнӆтыйӆты тӑхеӆ хуща ёш посн пунӆа;

Россия мўв вух ӆўӊӑтты тӑхи нєпек щирн, йиӆуп 2022-мит оӆн оӆӑӊ няврєм єнмӑӆты щира нётупсы вух аршӑка вєрӆы.

Интӑм 1,5 оӆ ӆуват вўша йиты тёпие єнмӑӆ­ты щира тыӆӑщ мӑр ёша вўты нётупсы вух 7083 шойт, мєт вән нётупсы па 29600 шойт арат вәӆ. Йиӆуп оӆ вотас тыӆӑщ вўш эвӑӆт оӆӑӊ няврєм єнмӑӆты щира нётупсы вух 5,8 арат процента нух єнумӆ. Щиты 7083 шойт кана 7494 шойта йиӆ. Ищиты 29600 шойт кана 31282 шойт ёша вўты питӆӑт.

Тӑӆаӊтєӆн тӑм нётуп­сэта Россия мўв бюджет эвӑӆт 169,5 миллиард шойт вух єсӑӆӆы.

Вәщ тыӆӑщ оӆӑӊмит хӑтӆ вўш эвӑӆт Россия мўв Пенсионной тӑхета 8-16 оӆ ӆуват няврєм атэӆт єнмӑӆты ӑӊкия-ащия нётупсы вух ёша павӑтты щира вохты нєпек китты мосӆ.

Тәп тӑмӑщ нётупсы каш­ӑӊ хоттєӆ ёха хән вўты рӑхӆ.

Атэӆт няврєм єнмӑӆты ӑӊки-ащи – щит хән кимит хуятӆ ӑнтәма йис, вәшӑс, няврєм сєма пи­тум нєпека ӑн хӑншман вәӆ. Мосӆ вәты, алимен­тӑт ёша павӑтты пурайн тӑм нётупсы вух ёша вўты ӑн рӑхӆ.

Мосӆ ястӑты, 8 оӆ вўш эвӑӆт 16 оӆ вәнта няврєм атэӆт єнмӑӆты ӑӊкия-ащия нётупсы вух тәп тыӆӑщ мӑр ай вух ёша вўты хоттєӆ ёха сухуп­тӑты питӆы. 

Вән кєр тыӆӑщ 1-мит хӑтӆ вўш эвӑӆт васы мӑнты тыӆӑщ 1-мит хӑтӆ вәнты Югра мўвев ӆуваттыйн хӑнты, вухаӆь, юрн ясӊӑт щирн «Йис кәртӑт вәӆупсы» нємпи кӑсупсы ӆэщӑтман вәс. Няврємӑта кәртӑт оӆӑӊӑн рәт щирн путрӑт хӑншты мосӑс па щитӑт рўщ ясӑӊа тулмащтӑты.

Ӆапӑт тыӆӑщ мӑр редакцияева 46 путӑр юхтӑс, мўӊ атэӆта вант­сўв, муй щирн 6-12 па 13-18 оӆӑт ӆуват эвет-пухӑт хӑншсӑт. Путрӑт Нуви сӑӊхум, Сўмӑтвош, Нижневартовской, Ёмвош, Кондинской районӑт, Ём­вош, Советской, Мегион па Югорск вошӑт эвӑӆт китсыйт.

Югра хуща поступсы хӑншса, муй тӑхета 2022-мит оӆн округев тӑйты вухӑт мӑнты питӆӑт. Па 2023-2024-мит оӆӊӑна ищи план хӑншман вәӆ. Тӑм нєпек мухты иса пўш вухӑт хӑннєхәйт вәӆты вәӆупсыя мӑнӆӑт.

Щи вєрӑт оӆӑӊӑн путӑртӑс вух ӆўӊӑтты департамент кәща, округ кәща лӑӊкӑр нє Вера Дюдина. Ӆўв ясӊӑӆн, щи государственной пос­тупсэт мир вєрӑт ма ӆэщӑтты пӑта вєрӆайт, щи вєрӑт кәщайӆўвн иса пўш вантман тӑйӆайт. Щи вєрӑта 70 % вух мӑнӆ, щит 2022-2024-мит оӆӑтн. Щӑӆта па вух ӆутаӆ кӑсӆы йиӆ, щи пӑта индек­сация мосӆ, тӑм оӆӑтн щит 4 % питӆ.

Оӆ мӑнӑс, хуты мўӊ, «Хӑнты ясӑӊ» газетаевн рәпитты ёх, Таисья Степановна Себурова такӆы хӑщсўв. Ӆўв вәӆупсэӆ мӑр хӑнты газетайн рәпитӑс, щи сӑмӑӊ вєрӑӆа ар ӛр мӑс. Тӑм хӑтӆ вәнты мўӊ нәмӆўв, муй щирн ӆўв мўӊев газетайн рәт ясӑӊӑн әмӑщ айкеӆӑт, путрӑт хӑншты, тәса хурӑт вўты вәнӆтӑс. Ин хӑншты пурайн ӆўв ясӑӊӆаӆ па партупсэӆаӆ нәмман ши тӑйӆӑӆўв. Интӑм хӑнты газетайн рәпитты ёхӆўв ӆўв оӆӊӑӆн щиты лупсӑт.

Владимир Енов:

Тӑмхӑтӆ Ваньщавӑт кәртӑӊ ёх оӆӑӊӑн хӑншты ӆӑӊхаӆум. Нина Ивановна (эви опращ нємӆ Бессонова) па Михаил Мартемьянович Букариновӊӑн кӑтӊӑн вәӆупсӑн тӑм ай хӑнты кәртыенӑн мӑнӑс. 

Нуви сӑӊхум район Касум вошн вәӆты хӑнты нє Людмила Семёновна Фомичева 35 оӆ мӑр пәӆьницайн лекщитты нєӊа рәпитӑс. Интӑм рўтьщуман арсыр хӑнты пурмӑсӑт ёнтӑӆ. 

Ӆўв Семён Тихонович па Елена Николаевна Хаймазовӊӑн хоттєӆ ёх хущи сєма питӑс. Кӑтӊӑн кӑт эви єнмӑӆсӑӊӑн. Людмила Семёновна вән эвия вәс. Кимит эвӑн Екатерина Семёновна Лазарева интӑм Манстӑр районӑн Вән Аӊкӆум вошн вәӆ.

Тӑм ӆўӊӑн ма Сәрханӆ мўв Русскинская кәрт пәӆьницайн Тамара Сидоровна Тэвлина (опращ нємӆ Сардакова) 37 оӆ мӑр хӑрщия мир лекщитмӑн па ипуӆяӊ кәща кана рәпитум хӑнты имие оӆӑӊӑн хӑншсум. Интӑм па ӆўв эвеӆ – Людмила Николаевна Покачева (Тэвлина) оӆӑӊӑн ай павӑтты вўтщийӆӆум. 

Людмила Николаевна 33 оӆ мӑр кәртӑӊ мир мӑӆман, атӆ-хӑтӆ ӆыв тӑӆаӊа вәӆты щирӑт вант­ман ешӑк ӑӊкиеӆ вә­нӆ­тум щирн вәӆ. Рәпа­тайӆ оӆӑӊ нєпекн (рўщ щирн «трудовая книжка») щит мєт оӆӑӊ па тәп и рәпата тӑхи хӑншман вәӆ.

Ёмвош район Кышик вошн ма Светлана Васильевна Фатеева пиӆа вәтаӊа йисум, ӆўв ӑшколайн йис пурмӑсӑт ӆавӑӆман тӑйты тӑхийн кәщая вәӆ. Ӆўв мӑнєма путӑртӑс, хутыса щи тӑхи рәпитты оӆӊитӑс, муйсӑр ванӆтупсэт ӆўв щӑта ӆэщӑтӆ.

Васы мӑнты тыӆӑщн 21-мит хӑтӆӑн Ёмвошн округев художественно-экспертной советн вәӆты ёх ӑктӑщийӆсӑт. Щи совета пириюм ёх йис пурмӑсӑт тәса па хурамӑӊа вєрты щирӑт вантман тӑйӆӑт. Вєрум утӑт мўӊ Югра мўвев хуща тәп щи совет пийн нємасыя мосты йис пурмӑса ӆўӊӑтӆайт.

Экспертной Совет лӑӊкӑр нєӊа Надежда Молданова вәӆ. Щи со­ветн этнографӑт, искус­с­тво­ведӑт, йис пурмӑсӑт вєрты ёх, культура де­пар­тамент хуща рә­питты хуятӑт вәӆӆӑт, иса 15 хуят. Тӑм пўш итәх совет ёх карты щўӊкӑт мухты путӑртсӑт.

Ай тӑхет потты тыӆӑщ 13-мит хӑтӑӆн Ёмвошн округев киникайт ӆўӊӑтты вуӆаӊ хотн рәпитты нєӊӑт вухаӆь мирев поэт шәӊӑт Андрей Семёнович Тарханов нәмӑӆмӑты пӑта нємасыя вәйтантупсы вєрсӑт. Тӑм м па тєвӑӊ сўс пєлӑк хӑтӑӆн ӆўв ӆәӆн араттєӆн 85-мит оӆа йис. 

Вухаӆь поэт хәев ар­сыр хӑннєхуятӑтн ищиты нәмӆы. Щи пӑта Югра мўвев ӆуватн кашӑӊ оӆ мӑр сыр-сыр вәйтантуп­сэт, кӑсупсэт муй ванӆ­тупсэт ӆўв оӆ­ӊӑӆн иса ӆэщӑт­ӆыйт па вєрӆыйт. 

Тӑм ванӑн Венгрия мўвн учёной нєм павӑтум вәтаӊ ӆәхӑс нєӊиев Чилла Хорват мўӊева пищма китӑс. Нєпекн ӆўв оӆюпн хурӑт хӑншты, нарӑсты хӑтн юнтты па ариты хуят Бела Мариаш оӆӑӊӑн айкеӆ тәӆ. 

Па хон пєлӑк Венгрия мўвн тӑм ики хурӑт хӑншты вєр киньща мєт ма ариты, нарӑсты хӑтн нтты па путрӑт хӑншты мирн вәӆы. Вантэ, Бела Мариаш «Tudosok» (рўщ ясӑӊӑн – учёной хуят) нємпи нарӑсты ёх кўтн мєт апрӑӊ хәя вәӆ. Мир кўтн ӆўв Доктор Мариаш нєм тӑйӆ.

Имуӆтыйн вәтща мўв авӑтн, вәтща щўӊ авӑтн ими хиӆы щащеӆ пиӆа йис вўшӑт эвӑӆт иха вәӆӆӑӊӑн-хоӆӆӑӊӑн. 

Щиты вәӆтэӆ-хоӆтэӆ кўтн щащеӆ ими ӆўвеӆа тӑмиты щи путӑртыйӆ:

 Нӑӊ, хиӆые, ӆєваса хўв тӑхия хотэн эвӑӆт аӆ ӊха! 

Щи ясӑӊӆаӆ ма лупм­аӆ пийн щащеӆ имийн сотпӑӊ кєшийн кантӆы па вәншъх эвӑӆт арсыр вәнт вой нёӆӑтн тәса вєрӆы, ӆёмъ­х эвӑӆт нёвӑщ ӛхӑӆн тўӊщирӑӊа мєнытӆы.