№ 20 (3656) - 2024

Ай тӑхет потты тыӆӑщн 10-мит хӑтӆӑн карты щўӊкӑт мухты «Югра мўвн вўӆы тӑйты ёх вухн нётты питӆайт» нємпи онлайн вебинар мӑнӑс. Щӑта вәсӑт: Ёмвош округ оса тӑхет па айӆат ёх вєрӑт тәты департаментӑн увӑс мирӑт пиӆа рәпитты нє Екатерина Сапожникова, «Касум Ёх» тӑхи менеджер ими Марина Кабакова, «Рахтынья» община юриста вәӆты нє Елена Савчук, «Касум ёх» тӑхи кәща нє Елена Федотова.  

Государства хуща увӑс мира нётты щира «Ус­тойчивое развитие ко­ренных малочисленных народов Севера» прог­рамма вәӆ. Щи нєпек мухты вўӆы тӑйты ёха нётты пӑта кӑт пищ вәӆ:

Тӑм ванӑн Югра мўв Роспотребнадзор тӑхийн рәпитты кәщайт айкеӆ  вєрсӑт, хута путӑртсӑт, муй щирн хӑннєхәя хоньщупсы мәшӑт юхӑтты кємн мӑӆтыйӆты рӑхӆ. Щи пӑта ӆыв округ пәӆьница хотӑтн вәӆты тохтур ёхӆўва партсӑт, ӆәӆн ОРВИ па грипп нємуп мәш вєрӑт шимӆа йиты пӑта ай кәртӑтн па вән вошӑтн вәӆты-хоӆты хӑннєхуятӑта щи вєр пӑта мосты уколӑт мсыева  ат вєрсӑт. 

Ёмвошн профпато­логия Центр нємуп тӑхийн рәпитты ай па вән тохтурӑт иха мирхота ӑктӑщийӆсӑт па нәмӑссӑт, хутыса па муй щирӑтн еӆӆы вәӆты-хоӆты хурасн рӑхӆ щимӑщ вєр ӆэ­щӑтты, ӆәӆн округевн вәӆты айшӑк кәртӑта ӊхты па хӑннєхәйт мәш вєрӑт артаӆӑты па уша павӑтты. 

Вантэ, сўс муй тӑӆ пурайн тывеӆт-ту­хеӆт Югра мўвев ӆу­ваттыйн нємасыя ӊхты тохтурӑт вәӆӆӑт. Щи ёх­ӆўв округ хўватн омӑсты кәртӑта па вошӑта иса машинаитн тӑӆ ӛшӑт вєрты кємн тәтьӆяӆыйт. Кашӑӊ хўв тӑхийн ӆыв сыр-сыр хӑннєхәйт пиӆа вәйтантыйӆӆӑт па мәш вєрӑт тўӊщирӑӊа вантӆӑт.

Ешӑк шуши мирӆўв! «Хӑнты ясӑӊ» па «Луима сэрипос» газетайӊӑӆўв хӑншты хуятӑт «Югра ӆыӆӊуптӑты» оса тӑхи ёх пиӆа округ ӆуваттыйн вәӆты мир пӑта «И рәт – и рәпата», вухаӆь щирн «Акв рут – акв рупата» нємпи йиӆуп кӑсупсы ӆэщӑтсӑт.

Щиты 2024-мит оӆ васы мӑнты тыӆӑщ оӆӑӊмит хӑтӆ вўш эвӑӆт хӑнты, вухаӆь па рўщ ясӊӑтн хӑншум и рәпата тәты па йис вєрӑт тәса тӑйты хоттєӆ ёх оӆӑӊӑн путрӑт мўӊева китты мосӆ.
Тӑм йиӆуп кӑсупсы 2024-мит оӆ васы мӑнты тыӆӑщ оӆӑӊмит хӑтӆ вўш эвӑӆт оӆӊитсўв.

Кӑт пўш оӆ мӑр, щит вән кєр тыӆӑщ па васы мӑнты тыӆӑщӊӑнӑн 7-мит хӑтӆӊӑнӑн Россия мўв хўваттыйн ӑӊкия йиты имет мӑӊхӑтӆӊӑн постӑты питса. Щи вєр пӑта тӑм ванӑн Ёмвош «Югра» нємпи айкеӆӑт ӆэщӑтты хотн «Ӑӊки па пушхие» нємуп вәйтантупсы мӑнӑс. 

Мўӊ кўш вән вошӑтн вәӆӆўв, тәп вошн вәӆты м па әмӑщ! Вантэ, вошэвн кашӑӊ пурайн муӆты әмӑщ вєр ӆэщӑтӆы, кўш мӑӊхӑтӆӑт, кўш кӑсупсэт па ӆўӊтупсэт, кўш якты па юнтты хӑрӑт. 

Диана – ар няврємӑӊ хоттєӆ ёх эвӑӆт вәӆты эвие. Ӑӊкеӆ нємӆ Анна, ӆўв – хот рәпата вєрты ими. Ащеӆ – Михаил, нуви тўт мӑты, хот хошмӑӆты, потум па каврум йиӊк мӑты тӑхийн рәпитты хуят. 

Тӑм оӆн Диана мєт сырыя ӆәӊханьщуп сый хәӆӆяс па парта вўтпия омсӑс.

 Ма имухты ӑшколам, вәнӆтӑты нєӊєм сӑмӑӊа тӑйты питсум. Ма ар няврєм пиӆа ӆәхсӑӊа йисум. Мӑнєма ӑшколайн м па әмӑщ. Кашӑӊ хӑтӆ сора ӑшколая хәхӑӆӆум, – питы сємуп эвие лупӑс. 
Ӆўв веӆщи вәнӆтыйӆты оӆӊитӑс. Рәт (хӑнты) ясӑӊ урок пурайн «Мўӊ иха рәт щухал пўӊӑӆн» хура­мӑӊ хур хӑншӑс.

Тӑм оӆ тәнӆуп тыӆӑщн Касум мўва ӊхмємн Евгений Кириллович Лозямов пиӆа вәтаӊа йисум па ӆўв пиӆэӆа вәӆупсэӆ оӆӑӊӑн путӑртсумн. Евгений Кириллович вўӆы тащ тӑйӆ, вой-хўӆ веӆпӑсӆӑӆ. Ӆўв Касум тый ӆор хуща вәӆ. Ӆўв лупум щирӑӆн, щит Катра йис тарум тащ кӑкӑртум мўв. Вурӊа нӛрум Касум тый хуща, и мўв пєлӑк Пин тыйт, Тәрум юхан тыйт, щи мўв кўтлупн щӑта щи вўӆыӆаӆ-войӆаӆ пиӆа вәӆ.

Ӆўв вәӆупсэӆ оӆӑӊӑн щиты путӑртӑс: 

Хӑнты нє Тамара Алексеевна Лобоцкая (эви опращ нємӆ Юрьева) Сўмӑтвошн вәӆ. Тӑм пўш вәйтантыйӆмємн ӆўв вәӆупсэӆ па рәпатайӆ оӆӑӊӑн путӑртӑс. 

Ӆўв Сўмӑтвош район Сәпӑсӆӑӊ кәртӑн сєма питӑс. Ӑӊкеӆ – Алек­сандра Алексеевна Юрьева – вән хӑнты се­мьяйн єнмӑс. Хән Тамара кимит шәп оӆа йис, ӑӊкеӆ йиӊка рӑкнӑс, ӑнтәма йис. Щирн Тамара аӊкаӊкеӆн єнмӑӆсы. Щиты ӆўв аӊ­каӊкеӆ оӆӑӊӑн лупӑс: 

Ёмвошн округ мир творчества хот хуща ай тӑхет потты тыӆӑщн 18-мит хӑтӆӑн ӑктупсы вәс, рўщ щирн «Школа наставничества по сохранению нематериального этнокультурного достояния Югры».

Ай тӑхет потты тыӆӑщ кимит хӑтӑӆн Ёмвошн «Торум Маа» йис пурмӑсӑт шавиты хотн вухаӆь мир ӆўӊтарӑт хӑншты хә Юван Шесталов нәмӑӆмӑсы. Тӑм кўтн, вантэ, щи поэт шәӊӑт пӑта ӆэщӑтум хот йит 10 оӆ юхӆы пўншсы. Щи пӑта йис пурмӑсӑт ӑкӑтты хотн рәпитты хӑннєхуятӑт нємасыя вошевн вәӆты хәйт па нєӊӑт иха щив вохсӑт па арӑӊ-путрӑӊ етнхот вєрсӑт. 

Ин йиӆуп вәӆуп­сыйн апрӑӊ па вєрӑӊ шуши ёхӆўв унтасн вән рәпата вєрӆы, ӆәӆн хӑнты, вухаӆь па юрн мир йис вә­ӆупсы оӆӑӊӑн тә­са айкеӆ тәты па тўӊ­щираӊа щитӆ ванӆ­тӑты. Хутыса йистєӆн вән ёхӆўв вәсӑт, мӑӊхӑтӆӑт, якты хотӑт, йис мӑӊ вєрӑт, рәт ясӊӑт па культура ӆєрамтты щирӑт оӆӑӊӑн уша щи вєрӆўв. 

Вән рәпата увӑс мир­ӆўв йис вәӆупсы ӆєрамтты щира «Торум Маа» йис пурмӑсӑт шавиты хот рәпатнекӑтн ӆэщӑтӆа. Әмӑщ ванӆтупсэт тумпийн тӑта рәпитты апрӑӊ па нумсӑӊ нєӊӑт-хәйт сыр-сыр мосты вәнӆтӑты хӑрӑт, мирхотӑт, ӆўӊтупсэт, йис мӑӊхӑтӆӑт ма па тәса ӆэщӑтӆӑт. 

Тӑм пўш вән кєр тыӆӑщ 13-мит хӑтӑӆн Сәрханӆ вошн вәӆты шуши мирӑт «Вурӊа хӑтӆ» пориӆӑсӑт. Щи хӑтӑӆн ма «Катра Сәрханӆ» нємуп историко-культурной тӑхи хуща вәсум па рәпатам щирн сыр-сыр айкеӆӑт ӑкӑтсум. Щи киньща арсыр хӑннєхуятӑт пиӆа вәйтантыйӆсум па м хўв путрємӑсум.

Щиты лупӑс мари мир ёнтӑсты нє Эмма Анатольевна Семёнова-Гришкина – ӆўв «Муро сем» («Ар сув») тӑхийн ариты па ӆәмӑтсух ёнтты нєӊа вәӆ. Мин Марий Эл мўв Моркинской район Шереганово кәртӑн вәйтантыйӆсумн па путӑртсумн.

Ӆўв лупӑс:

Увӑс вўӆы – хурамӑӊ войе, ӆўв пєӆэӆа хўв мӑр әмӑщ вантты. Кантеров хот пўӊӑӆн нӛрумн вўӆыӆаӆ веӆщи єтум па хӑтӆ пєӆы таӆӑсты ванши турн ӆєрӑт ӆєӆӑт. Па йис пура вўш эвӑӆт щи хурамӑӊ войт кўтн питы, нуви, хупшат ӆыӆӑӊ похлӑт сєма питӆӑт – щит ӆыв пушхиеӆаӆ. Вўӆы омӑсты пура шиваӆӑты ёх, аӆпа, ма итєма и нумӑсн вәӆӆӑт: щит мєт хурамӑӊ пура, хур иты пура. 

(Тӑм путӑр оӆӑӊ шәп «Хӑнты ясӑӊ» газета 19-мит номерн ӆўӊтаты!)