№ 7 (3595) - 2022

Ай кєр тыӆӑщ 30-31-мит хӑтӆӊӑнӑн Ямало-Ненецкой округ Пуӆӊавӑт вошн «Ялякоця» (хӑнты щирн «тӑр хӑтӆ») нємпи кимит няврємӑӊ вән мӑӊхӑтӆ-кӑсупсы вәс. 

Ай кєр тыӆӑщ 21-мит хӑтӆ – щит Мўвтєӆ мир ӆўӊтупсэт хӑншты ёх хӑтӆ, щирн Москва хон вошн Россия мўвев хӑншты ёх «Поэт года», «Писатель года» нємпи литератур­ной премияйӊӑн ёша хоӆумсӑт. 

Щив вет щурӑс муӆтас хӑншты ёх ӆыв стихӆаӆ, путӑрӆаӆ китсӑт. Щит эвӑӆт мєт м хӑншты 300 хуят пирисы. Щи ёх кўтн мўӊ хӑнты хәев Вячеслав Юрьевич Кондин, ӆўв «Поэт года» премия хоӆумтӑс. Ин ӆўв хәӆум «Бессмертный полк», «Любовь», «Рыбачка» стихӆаӆ «Поэт года» киникайн хӑншман вәӆӆӑт.

Югра хуща вәӆты хотӑт омӑсты департамент тӑхийн поступсы нєпек вәӆ, муй вўрн округевн вәӆты увӑс мир йиӆуп хотӑт ёша павӑтты пищ тӑйӆӑт. Щи ясӑӊ мӑнӆ щи хуятӑт оӆӑӊӑн, мӑта ёх 2014-мит оӆ ван хӑтӆуп тыӆӑщ 31-мит хӑтӆ вәнта хот ӆәтты муй хот омӑсты  вух вохты нєпекӑт хӑншсӑт. Щи вухӑт мӑӆыйт кан хот омӑсты муй па кан хот йит вән вошӑтн ӆәтты пӑта.

Тӑм мӑнум 2021-мит оӆн тӑмӑщ вух 395 семьяяӊ хӑннєхә ёша павӑтсӑт, иса мира 1254,98 млн вух ортса.

Ёмвошн ай кєр тыӆӑщн 25-мит хӑтӆӑн Россия мир йис вәӆупсы нух ӆэщӑтты оӆ оӆӊит­са. Тӑм оӆ мӑр Югра мўвевн сыр-сыр вєрӑт нух ӆэщӑтӆайт па йиӆуп вєрӑт вєрты питӆайт, Россия ӆуват вєрӑт мўӊ мўвевн па вєрӆўв.

Устав поступсы щирн, «Титул» нємуп ак­ционерной тӑхи кәща ёх 2022-мит оӆн вән кєр тыӆӑщ 26-мит хӑтӑӆн вән мирхот ӆэщӑт­ты вўтьщӑӆӑт.

Щи мирхотн кәщайт путӑртӆӑт:

- Муй щирн па хуты тӑм юхи хӑщум оӆ мӑр ӆыв рә­питсӑт, муй щирн ӆыв ву­хӑт аршӑка вєрсӑт, мӑ­та тӑхета вух сухуптӑсӑт.
- Аудитор хә йиӆпа пи­риты вєр оӆӑӊӑн.
- Кәща ёх совет йиӆпа пириты вєр оӆӑӊӑн.

Ай кєр тыԯӑщ 24-мит хӑтӑӆн Ёмвошн Югра мўв арсыр мирӑт пурмӑсӑт вєрты хотн няврємӑт па айԯат ёх пӑта «Ремёсла и промыслы: прошлое и настоящее» нємпи XVII-мит межрегиональной ԯўңтупсы па вєрӑнтты хӑр вәc. Тӑм вәнӆтӑты хӑр 2004-мит оӆ вўш эвӑӆт Ёмвош ремёслайт хотн рәпитты ёхн ӆэщӑтты питсы. Щи пура вўш эвӑӆт кашӑӊ оӆ Россия па Югра мўв вошӑт, вән па ай кәртӑт эвӑӆт вєртутӑң няврємӑт арсыр мирӑт йис па йиԯуп пурмӑсӑт оԯӑңӑн ԯўңтупсэт ԯўңӑтӆӑт па ванԯтӑӆӑт, муй щирн щитӑт вєрты мосԯ.

Щи оӆӑӊӑн уша йис округ дума 7-мит мирхотн, мӑта ут ай кєр тыӆӑщ 31-мит хӑтӆӑн Ёмвошн вәс. Депутатӑт хәс муӆтас вєр нух вантсӑт. Мирхотн па кәща ёх кўтн Россия мўвев сенатор хә Алек­сандр Новьюхов вәс. 

Вет оӆ юхӆы ай кєр тыӆӑщн Сўмӑтвошн «Тўтӑӊ хопие» нємпи хӑтӆ мӑр ай няврємӑт тӑйты вән хот пўншсы. Щӑта Люд­мила Лео­нидовна Обухович кәщая йис. Тӑм ванӑн ма ӆўв пиӆэӆа вәйтантыйӆсум па путӑртсум.

- Людмила Леонидовна, мєт сыры лупа, муй щирн щи хот омӑссы.

-  Сўмӑтвош – щит вән районной вош, щирн щи­мӑщ вән хот шєӊк мосӑс.  «Сотрудничество» поступ­сы щирн тӑм вән кӑт нар­тупӑӊ па хурамӑӊ хот омӑссы. 

Ларьякской район Нижне-Вартовской рыбозавод гослов брига­да 1959 от отынг квартал планыт 163 процента тарматсытэ. Тув квартала таис план 130 центнер, а государствая 216 центнер хут мас. 

Мосл лопта, татымтак бригада ёх хотна така ан рупитсыт. М.А. Ельцов звено, матайны утл 4 хоят квартал марн 115 центнер хут ветыс. Там звенаны яма рупитсыт: А.П. Ершов, И.А. Соснин, Г.И. Годенов.

Ёмвош районӑн шуши мир вәӆты кӑт кәрт вәӆ, щит Кышик па Согом. Тӑм ванӑн ма Согом кәрта ӊхсум. Ин хӑншӆум, хутыса щӑта шуши мирӑт вәӆӆӑт, щи оӆӑӊӑн мӑнєма путӑртӑс кәрт кәща хә Григорий Владимирович Полуянов.

Хӑнты семьяйн єнмӑс

Там ванны ий мот­ты хатл ру­пута парым пирны хо­тэ­ма ёх ёхытсым. Маттырны хотемны Ём вош район Кышик курт «1 май» колхоз эвыт моторист курсая ёхтым Молданов Иван Григорьевич па Крюков Владимир Трофимович китынтак айтат хойн­гын омыссынгын.

Тәнӆуп тыӆӑщн ма Нижневартовской районӑн вәӆты ай кәрта ӊхсум, щӑта По­качев хотӑӊ ёх вәӆӆӑт. Кәртӑӊ кӑт­ӊӑн – щит Вячеслав Геннадьевич па Еле­на Николаев­на По­качевӊӑн.

Щи кәрта мўӊ кәртӑӊ ёх вәӆупсы вантты щира ӊхсўв. Тӑм оӆ Россия ӆуваттыйн «Йис вәӆупсы нух ӆэщӑтты оӆ» па иса мўв ӆуваттыйн «Шуши мир кан ясӊӑт нух ӆэщӑтты яӊ оӆ» вєрӆы. Тӑм мӑӊхӑтӆ щира кәрта веӆ­пӑсӆӑты па вўӆы тӑйты вәнтӑӊ-мўвӑӊ тӑхет эвӑӆт мир юхӑтсӑт. 

Щи ӆавӑрт рәпатайӆ 2020-мит оӆ вўш эвӑӆт Ӆорвош район пәӆьницайн рәпитты тохтур хә Александр Леонтьевич Нензелов Йиӆуп Уренгой вошӑӊ пәӆьницайн тәсӆэ. Ӆўв унтасӑӆн ар хуят мӑӆсӑт, ин ӆўвеӆа вән пәмащипа лупӆӑт.

Ай кєр тыӆӑщ сухӑнты хӑтӆӑн «Торум Маа» тӑхийн «Ӆапӑт Тәрум ортум мўв, хәт Тәрум ортум мўв» ванӆтупсы вєрӑнтсы. Щӑта Тўкъякӑӊ кәрт ёх оӆӑӊӑн путӑр вәс. Тӑм вәйтантуп­сыя Ефим Пятников па Дмитрий Лельхов рәт ёх ӑктӑщсӑт. Вән рәт хн Лельховӑт, Пятнико­вӑт, Гришкинӑт, Юминӑт, Себуровӑт рәт ӆєрӑт шиваӆӑты рӑхӆ.

Ай кєр тыӆӑщ 19-мит хӑтӑӆн Сўмӑтвош шуши мирӑт вєрӑнтты тӑхийн рәпитты нєӊӑт нємасыя литературной вәйтантупсы ӆэщӑтсӑт. Щимӑщ етнхот хӑнты мирев моньщӑт па йис путрӑт хӑншты хәя Владимира Енова кантсӑт. Вантэ, тӑм пўш 20 оӆа йис, хуты ӆўв щимӑщ моньщӑт пиӆа рәпитты вўянтӑс па киникайт рәт па рўщ ясӊӑтн хӑншӑӆ. 

Хўӆӑӊ нянь вєрты пӑта вән нуви хўӆ пири­ӆы, щит сәх, кӑры, вўнш муй мухсӑӊ хўӆ.

Нянь шум дрожжи пиӆа вєрӆы, нянь вєрты иты. Нянь шум нух йиты пурайн хўӆ ӆэщӑтты рӑхӆ. Ӆыӆӑӊ хўӆ вўты мосӆ, щи хўӆ ки ӑнтәм, сўӆӑӊ хўӆ вўты ищи рӑхӆ. Тәп ӆўвеӆ 6-8 щос мӑра потум йиӊка пунты мосӆ. 
Хўӆ нхӑсты, ваньщты мосӆ. Тәп ӆыпи утӑт вўщ­кӑты рӑхӆ, хўӆ ӆўвӑт пиӆа па ух иса хӑйты, щиты нянь єпӆӑӊа йиӆ.

Тӑта мосванӑн ай кєр тыӆӑщ 22-мит хӑ­тӑӆн Ёмвош округев киникайт ӆўӊӑтты хот йитн арсыр вошӑӊ библиотека кәщайт иха юхтыйӆсӑт па вән вәйтантупсы нємасыя вєрсӑт. 

Тӑм мирхот пурайн ӆыв путӑртсӑт, муй щирн 2021-мит оӆн рәпитсӑт, «Культура» нємуп нац­проект вєрӑт вєрсӑт па хуты еӆӆы «Пушкинской карта», креативной муй иса йиӆуп щирӑтн вәӆты па рәпитты питӆӑт.

Тӑмхӑтӆ мўӊ хӑнты ясӑӊ газетаев 65 оӆ пос­тӑты вўраӊӑн ӆапӑтмит иньщӑсупсы хӑнш­ӆўв. 

Юхӆы ясӑӊ тыв китаты: khanty-yasang-65@mail.ru .

7. Мӑта оӆ вўш эвӑӆт «Хӑнты ясӑӊ» газета хущи путрӑт йиӆуп пукваит пиӆа хӑншты питсыйт?
 

Мўв-хӑры воиен па тухӆӑӊ ай вой, вурщӑк вәс. Имуӆтыйн и­ха вәйтантсӑӊӑн па путрємӑсӊӑн:

- Мин, – лупӑӆ, – ӆәхса вєрӑсӆумн, ӆәхса вәӆӆумн. Ӆєтут ха ӑкӑтӆумн, тӑӆ шӑнш ӆєты ӆєтут. Нӑӊ нӑӊ щиренӑн ӑкта, ма па ма щирємн ӑкӑтӆум. Щӑӆта ха ӆєты питӆумн, атэӆт муй. И хәмн ӆєтутӑт ху­ӆаӆӑт, па и хәмн ӆєтутӑт оӆӊитӆумн.