№ 7 (3643) - 2024

Вән кєр тыӆӑщ 1-мит хӑтӆ вўш эвӑӆт Россия мўвевн ай­ӆат пухӑт армияя слу­житты мӑнты вєр оӆ­ӊитсы. Кашӑӊ ай­ӆат пуха срочной щирн служитты мӑнты мосӆ, тәп итәх хуятӑт граж­данской служба щирн служитты щир тӑйӆӑт. 

Гражданской щирн служитты щир тӑйӆӑт: щи хәйт, хуйтата рәт миреӆ йис вәӆупсы щирн армияя мӑнты па пушкан ёша вў­ты ӑн рӑхӆ; вәнт кәртӑтн вәӆты шуши хуятӑт. Щи айӆат пухӑта армияя мӑнты кана государственной рәпитты тӑхийн кӑт оӆ мӑр рәпитты мосӆ. 

Мўӊ Россия па Югра мўвевн «Малое и среднее пред­при­ни­мательство» нацпроект рәпитӆ. 2023-мит оӆн щи вєра округев хущи 7 млрд арат шойт вух єсӑӆсы. Щи оӆӑӊӑн айкеӆӑт ӑкӑтты ёха Ёмвошн РИЦ «Югра» тӑхийн округев кәща ӆӑӊкӑр хә, экономической развития департамент кәща хуят Сергей Афанасьев путӑртӑс.

Ӆўв ясӑӊӆаӆ щирн 2021-2023-мит оӆӑт мӑр округевн пред­приниматель ёх хәӆум щурӑса ара йис. Сыры щит 59 щурӑс хуят вәс, ин тӑм па 62 щурӑс 184 хуята йис. Югра мўвн ӆыв ма нётӆыйт. Юхи хӑщум оӆӑтн ӆыв саттэӆа вєр тӑйты ёх ар, щит 83% ара йис. 

«Шєӊк м па мосты вєр мўӊ округев кәщайт вєрсӑт», - щиты нёхмӑс мӑнєма Нуви сӑӊхум вош эвӑӆт Ёмвоша тынєсты-ӆәтӑсты хӑра юхтум рўщ ими Дарья Видеман. Тӑмӑщ  хӑрӑт, вантэ, кашӑӊ оӆ суханты кємн Экспоцентр нємуп тӑхийн Ёмвошн мӑнӆӑт. Тыв округев ӆуватн вәӆты хӑннєхуятӑт ӆыв щиреӆн ӆэщӑтум ӆєтутӑт-пурмӑсӑт пиӆа юхтыйӆӆӑт. 

Тӑта хәӆум хӑтӆ мӑр мсыева вошӑӊ хӑннєхәйт пиӆа тынєсӆӑт, ӆәтӑсӆӑт па щитэӆн юхӆы пєӆы ӆыв вәӆты тӑхиӆаӆа айӆтыева мӑнӆӑт.
Муй щирн сыр-сыр ты­нєсты вєрӑт вәӆӆӑт, щи оӆӑӊӑн тӑм тӑхия юхтум нє Дарья Видеман инь­щӑссєм.

Ай кєр тыӆӑщ 28-мит хӑтӑӆн Ёмвошн округев Дума хотн Тюменской область, Югра па Ямал мўвӊӑн арсыр йиӆуп поступсэт вєрты депутат ёхӆўв 35-мит мирхот вәс. Щи вәйтантупсы видеоконференция щирн вєрсы па щӑта Югра Дума хот кәща Борис Хохряков, депутатӑта вәӆты хәйӊӑн Еремей Айпин па Александр Сальников рәпитсӑт. Тӑм мирхот мӑнум пурайн Тюменской область па Ямал мўвӊӑн депутатӑт ищиты арсыр мосты айкеӆӑт вєрсӑт. 

Ёмвошн Югорской государственной университетн вән кєр тыӆӑщн кимӑтмит хӑтӆӑн наука щирн ӑктупсы вәс. Тӑм ӑктупсы Югорской государственной университет хуща вәӆты «Высшая школа права» па «Союз криминалистов и криминологов» ёх ӆэщӑтсӑт.

Щи вєрӑт оӆӑӊӑн путӑртты щира тыв арсыр тӑхет эвӑӆт мир ӑкумсӑт, щит Россия Минобрнаука арсыр мў­вӑтн айӆат ёх вәнӆтӑты хӑннєхәйт, поступсы ӆэ­щӑтты щира рәпитты ёх, сўтӑт тӑхийн рәпитты мир, Югра па Российской Федерация арсыр мўвн государственной па му­ниципальной тӑхетн кә­щая рәпитты ёх. 

Тӑмхӑтӆ ма Виталий Юрьевич Сигильетов оӆӑӊӑн хӑншӆум. Ӆўв Вах юхан хӑнты хә, тәп м арат оӆ па хон пєлӑк Венгрия мўвн рәт ясӊӑӆ ӆєрамтман рәпитӆ.

Ай пурайӆ

Сўмӑтвошн Искусствайт ӑшкола хот вәӆ, мӑта тӑхийн няврємӑт сыр-сыр хурӑт хӑншты вєрӑта Светлана Прокопьевна Новьюхова иса 2020-мит оӆ вўш эвӑӆт па ин тӑмхӑтӆ вәнты вәнӆтуман рәпитӆ. Муй щирн ӆўв щи ӑшколайӆ хуща рәпиттыя питӑс па мӑта тӑхи хуща вәнӆтыӆӑс, щи вєр оӆӑӊӑн тӑм айкеӆєм хуща нємасыя еӆӆы хӑнштыя вўтьщӑӆум.

Мосӆ луптыя, хуты Светлана 1998-мит оӆн Тюмень вошн сєма питӑс.   

Щиты няврємӑт рәт ясӑӊа па литературая вәнӆтӑты ёх вән мирхотн ар пўш лупсӑт. Щит ай кєр тыӆӑщ 28-мит хӑтӆӑн Ас-угорской научной институт хуща вәс. 

Тӑм пўш вән мирхот «Ёмвош округевн тӑм йисн йиӆуп щирн рәт ясӑӊа па литературая вәнӆтӑты вєр» нєм тӑйс. Мирхот кӑтсыр щирн ӆэщӑтман вәс: очной па онлайн щирн. Иха ӆўӊӑтты ки, соткєм хуят щи мирхот вантсӑт, щит эвӑӆт 50 хуят онлайн щирн. Щит Югра, Ямал, Марий Эл Республика, Санкт-Петербург вош, Ле­нинградской область эвӑӆт хӑннєхуятӑт. 

Тӑм тӑӆ тәнӆуп тыӆӑщн, хән Касум кәртӑн вўӆы ӆавӑӆты ёх кӑсупсы вәс, кәртӑӊ музей хӑрн «Ма пӑнтєм» нємпи ванӆтупсы пўншсы. Тӑм әмӑщ ванӆтупсыйн юхтум хуятӑт шиваӆӑсӑт, хутыса касум мўвн вўӆы тӑйты вєр тывӑс. 

Ванӆтупсы «Касум ёх» тӑхийн рәпитты хуятӑт ӆэщӑтсӑт. Оӆӊӑӆн ӆыв хўв нәмӑссӑт, муй щирн тӑм ванӆтупсы ӆэщӑтты, ӆәӆн юхтум мойӊ мира щит сӑма ат рӑхӑс па әмӑщ вантты ат вәс. Ӆәӆн тӑм йис айӆат ёх ӑнтә тәп ӑӆ ат вантсӑт, ӆәӆн ӆыв ат нәмӑссӑт. Ванӆтупсы ӆэщӑтты режиссёр хә Игорь Устинович нётӑс, ӆўв философия щирн щи вєра вўянтӑс. 

Ёмвошн ай кєр тыӆӑщн 28-29-мит хӑтӆӊӑнӑн ремёслайт центр хот хуща Россия ӆуват ӑктупсы вәс. Тӑта йис вєрӑт вєрты няврємӑт па айӆат ёх ӑкумсӑт. Иса ӑктупсыйн 150-кєм няврєм вәс, итәхӑт тӑм воша юхӑтсӑт, итәх няврємӑт па карты щўӊкӑт мухты путӑртсӑт. 

Тӑм вән кєр тыӆӑщ ӆапӑтмит рўтьщӑты хӑтӆӑн Ёмвошн вошӑӊ па мойӊ хӑннєхуятӑт «Торум Маа» хӑр тӑхийн ӑктӑщийӆсӑт, тӑта Вурӊа имев мӑӊхӑтӆ постӑсы. Тови пурая йис, вурӊа имиев па щи увӑс мўвева юхтӑс, тухӑӆӊаӆн хошум па амӑт мўӊева тәс. 

Увӑс мўвева вурӊа юхтӑс, щирн тови пурая йис. Хӑнты па вухаӆь мир щи пурайн мӑӊхӑтӆ постӑӆӑт. Ин ӆўӊтаты, хутыса ай кєр тыӆӑщ 7-мит хӑтӆӑн Сўмӑтвошн вәӆты шуши хуятӑт Вурӊа хӑтӆ постӑсӑт.

Вән кєр тыӆӑщ 6-мит хӑтӆӑн Нх вошн «Эмдер» нємпи рўтьщӑты хӑрн Вурӊа хӑтӆ постӑсы. Тыв вошӑӊ мир па Ёмвош, Советской, Приобье вошӑт па Касум кәрт эвӑӆт мойӊ ёх юхтыйӆсӑт.

Катра пурмӑсӑт ӆа­вӑӆты хотн рәпитты нє Людмила Торохова вўща вєрӑс:

- Хӑнтэт па вухаӆят Вур­ӊа хӑтӆ щєӊк ӆавӑӆӆӑт. Вантэ, йистєӆн тӑм мирӊӑн пӑта щи хӑтӆӑн йиӆуп оӆ оӆӊитсы – хошум мўв эвӑӆт мєт сыры вурӊа юхтӑс, тыхӑӆ вєрӆ, «Кар» сый эвӑӆт уша йиӆ – товия йис. Муй щирн мўӊ вурӊа ими ещаӆт єтӆўв, щиты оӆ мӑр вәӆты питӆўв. Щирн тӑмхӑтӆ амтӑтьӆяты мосӆ! 

Ёмвошн вән кєр тыӆӑщн 6-мит па 7-мит хӑтӆӊӑнӑн XI-мит «Югорской лыжной марафон» нємуп кӑступсы вәс. Тӑм вєр Югра кәща ёхӆўв па Югра Федерация ӆухн кӑсты вєр тәты хуятӑт ӆэщӑтсӑт-вєрсӑт. Тӑм кӑсупсы вєрты пӑта «Открытие» банк тӑхи ёх вухн нётсӑт. Ӆыв кӑсупсы вєрӑт ӆэщӑтты пӑта 2,3 миллион шойт вух мойӆӑсӑт.

(Тӑм моньщ оӆӑӊмит шәп газетаев хәтмит но­мерн ӆўӊтаты)

Па м вәӆмен ӑӆ утэн вєрӑс, ким єтӑс, сухум похлаӆ сырыя єс­ӆӑс, сухум похлӑӆ хуӆща мӑнӆ, ӆўв щӑӆта мӑнӆ. Хўв тӑхеӆ хўв мӑнӑс, муй ван тӑхеӆ ван мӑнӑс, имуӆтыйн хӑр муӆты тӑхия єтӑс, вана юхтӑс. Щорӑс, мӑттырн. Щорӑс кўтуп пєӆы вантыйӆ, щорӑс кўтупн пәхӑр. Ўпи-тӑхты аршин шәп вўс, щи әхтыя ӆєӆумтӑс, щорӑс па пєлӑка щи тәты питса.