Форма поиска

Для слабовидящих
  • Хантыйский
  • Русский

Хў вепӑсуман вәс

Лемпино кәртӑн Нефтеюганской районӑн йисӑңа-нәптӑңа ювўм рўщ ики пиа вәйтан-тыйсум па путрємӑсум, хуты ўв вәты-хоты щирӑн хў вепӑсуман вәс. Тӑм вәнат хә ин рўтьщӑ па вәупсы хўватн яма рәпитма пӑта «Ветеран труда» мев посн мӑсы. – Борис Гаврилович, нын иса щи кәртӑн хоттє ёхан пиа вәсты?

– Ӑнтә. Мўң сырыя Няша ай кәртыена касӑсўв. Еша ӛхӑтшӑк Сахали нємуп кәртӑн вәсўв. Щӑта ащевн Сатрино кәрта тәсыюв. Щи пурайн Пойк юханэн шєңк ар хў тӑйс. Ащев, вантэ, хў юпийн щив щи юхтӑс. Мўң ӑңхасўв муй ӑн ӑңхасўв па ищипа ўв юпен хуыева мӑнсўв. Ма хәум вән яй па кӑт упєңӑн тӑйсум. Катра Сатрино ай кәртыенӑн нямит классӑң ӑшкола рәпитӑс. Ма щи тӑхийн някєм о вәнтыйсум. Вәнтыйты вєрєм шєңк авӑртӑңа мӑнӑс, ӑшколаем вущкӑсєм па хӑнтэт пиа хў вепӑсӑты сонтумӑсум. Щит, апа, 1949-мит о щи  пурайн вәс. Ин, вантэ, тўңщирӑңа ищипа ӑн нәмєм щи катра вєрӑт. 
– Нӑң ащен па вәншӑк яйңаӑн, апа, Вуаң ая аясты яңхсӑт?
– Ащєм шєңк ар хў щи оӑтн вепӑсӑс па щит пӑта нємасыя Сәрхан район кәщаитн юн хӑйсы, ән тӑта па мӑтты хӑннєхә аь сорашӑк  сухӑнтты ат нётӑс. Вєритум тәп щи оӑңӑн лупты, хуты 1924-мит муй  1925-мит оӑтн сєма питум вән яйңӑам аь хӑра тәсыйңӑн. Ӛхӑт хўв муй ван кўт ын аяссӑңӑн па мўң ӑңкева-ащева кӑт айкеӑң нєпек юхтӑс, мӑта тӑхийн ыв парӑтсыйңӑн. Ма эвӑтєма еша вәншӑк хәмит  яем ики ӑ щиты армияя служитты тәтьясы. Ма па иса нємуты  тӑхия ӑн яңхсум. 
– Борис Гаврилович, Вуаң аь мӑнум мӑр нын хущана, ай кәртӑтн хӑннєхуятӑт, апа, ищиты єы ӑнтәма йисӑт?
– Мўң хущева ищи норма пура вәс. Тәп тӑта хў па вәнтвой тўңщирӑңа  вепӑсӑты хуятӑт єы ӑн омӑссӑт. Ащєм па юн хӑщум яем ямкєм ар хў планӑта мӑсӑт па мўң ищиты хўые унтасн вәсўв-хосўв. Щи  вєр тумпийн государствая миюм хў юкана ын китумтӑк талонӑтн мийясыйт. Щимӑщ нєпекӑт унтасн мис вуйн, сӑккӑрн, ӑнтӑн муй шайн па ыптӑң шарн иса апка эвӑт кашӑң пурайн мӑсыйт. Шєңк ар хуты ӑн вәс па хән хәткєм тыӑщ нємуты ӑн вўӑн, щи кўтн ар ям єтут ияха ӑкмӑ. Щит пӑта норма вәум пурайн мўң хущева вепӑсӑты ёхўв, ма щирємн, щимӑщ вуаң нўша иса ӑн вантсӑт.  
– Муйсӑр хў нын кашӑң о мӑр тӑта вепӑсӑсты?
– Мўң тӑта араттєн ор хў тәп вепӑсӑсўв. Ас хўые, вантэ, мўң ай юханўва ӑн ўңӑ. Тӑта вепӑс щирн сортӑт, мевтэт, ай мевтэт, евӑт, ӑрӑт, пӑннєңӑт, тўв хўӑт па щапӑрӑт мущӑтыйсўв. Аса мўң иса ӑн па яңхсўв па тәп тӑта, и тӑхийн, вепӑсӑсўв. 
– Борис Гаврилович, апа, вєритӑн лупты щи оӑңӑн. Муй щирн ӑшколайн вәнтыйсӑн па муй пӑта еы вәнтӑты вєрэн вўщкӑсэн?
– Ма сырыя щи путӑртсум, хуты вевтама ӑшколайн вәнтыйсум па щит пӑта нямит классєм хуна ӑн етшуптӑсєм па рәпитты мӑнсум. Мєт оӑң пўш ма хӑнтэт пиа тухӑты яңхсум. Сатрино кәртӑн щи пураитн ям ар хӑнты хоттє хуятӑт вәсӑт. 
– ыв щи оӑтн, апа, рўщ ясӑңӑн иса ӑн хошсӑт путӑртты?
– Ӑнтә. Щи вўш эвӑт ыв иса сыстама рўщ ясӑңӑн ыв кўтєн путрємӑсӑт. Оӑң вепӑсєм пурайн мўң шєңк ар хў катӑсўв. Етна пєлка мущӑтум хўўв хў вўты еңк хота Сытомино кәрта хӑнтыўвн  тәсыйт па щив мӑсыйт. Ӛхӑт щи тӑхи эвӑт Сәрхан вош рыбозавода ямсыева потум хўӑт яң муй ветхущъяңкєм овӑң әхӑтн ям хўв  тасыйт. ўң пурайн ай тўтӑң хопн юх эвӑт вєрум ашкопӑт тәыйт па ыв ыпиа тӑаңтєн Сытомино еңк хот хущи ияха ӑкмум хўн лӑп пуныйт па ищиты Сәрхана таыйт, ән щӑта арсыр хўӑң  консерва хушапӑт эщӑтты рӑхӑс. 
– Тӑта нын хущана хў вўты тӑхи вәс муй ӑнтә?
– Някєм километра вўшн мўң Лемпино кәртэв эвӑт нємасыя вєрум хў вўты тӑхи вәс. Тәп ўв ищипа Сытомино кәрта хӑншмӑн тӑйсы. Щӑта муй арӑт хў вепӑсн мущӑтўв, иса щив, сыр-сыр планӑт тєкнуптуман, мӑўв. Хў вепӑсӑты пӑта мўң иєм тыӑщ мӑр вєритсўв хәтъяң муй апӑтъяңкєм шойт вух хоумтты. Щи пурайн щи вухӑт тын тӑйсӑт па мўң арсыр пурмӑс муй єтут иса әтсўв. Ӛхӑт, 1991-мит он пенсияя мӑнмємн, ма сотхәс шойт арат вухн государства эвӑт мӑты питсыюм. Щит, ма щирємн, ям рўтьщӑты вух вәс. Айн-айн щи вухӑт иса ин тӑмхӑт вәнта шєңк тыны йисӑт. 
– Борис Гаврилович, тӑмхӑт хў вепӑсӑты вєр унтасн яма вәты-хоты рӑх муй ӑнтә?
– Ма нәмӑстємн, рӑх щи. Мӑта кәрта ӑн юхӑтӑн, хә хуятӑт нӑңєна щиты лупӑт, хуты нємуты рәпата иса тӑм йисн ӑн тӑйӑт. Ямсыева ки ыв пєэа вантты питӑн, итәх ёх йиўп хотӑт ывеа омӑсӑт, тынӑң па хон пєлӑк машинайт муй хоп сєвӑс моторӑт әтӑт. Щит иса хў вепӑсӑты па е тыныты вєр унтасн. Щит пӑта тӑмхӑт сӑмӑңашӑк хў ки вепӑсӑӑн, щит вєра яма па тўңщирӑңа вәты вєритӑн. 
– Нын кәртӑн хущи па айат ёх, апа, вепӑсӑӑт?
– Вепӑсӑӑт щи. Тӑта хў вўты тӑхи вә. Щӑта рўщ ики вепӑсӑты хуятӑт эвӑт нємасыя ор муй юхан хў әт. ўв тумпен Пойковской вошн па хў әтты тӑхи рәпит. Итәх ёх иса щив хў тыныты тӑта яңхӑт. Вантэ, щӑта еша тынӑңашӑк хў мӑты рӑх. 
– Юхи хӑщум оӑтн нӑң вепӑсӑӑн муй иса вепӑс вєр хӑйсэн?
– Ма тәп тӑта мосванӑн хў вепӑса яңхты ӑн питсум. Ӛрєм-щомєм хуӑты питӑс па кимит пєлӑк эвӑт мәшитум.
– Нын кәртӑнӑн, апа, «Хў вепӑсӑты ёх емӑңхӑтӑт» кәртӑң хӑннєхуятӑтн пориӑыйт?
– Кашӑң ўңӑн вәщ тыӑщ яңмит муй ихущъяңмит хӑтӑн иса щи пориӑыйт. Шєңк ар хуят щи пурайн ияха ӑкмӑ. Мўң, пирщамум ёх, ищиты хў єты муй хошум йиңк яньщты па путрємӑты щив яңхўв. Щӑта емӑңхӑт пӑта вєрум якты-ариты хот вантўв. Ма щирємн, мўң вещката па сӑмӑңа хў вепӑсӑсўв па яма вәсўв!
– Пәмащипа нӑңена, Борис Гаврилович! Тӑаң ёш па тӑаң кўр нӑңена! 
 
Владимир 
Енов    
Борис Гаврилович Саламатин ар няврємӑң хоттє хуятӑт хущи 1935-мит он Сытомино кәртӑн Сәрхан районӑн сєма питӑс. Аще хў па вой вепӑсӑс па В.И. Ленин нємуп колхоза ёша пӑвтум хўӑт муй вәнтвой сухӑт мӑс. Сытомино хущи мєт оӑңӑн шєңк шим павӑрт хот вәс. Ӛхӑт, 
      хән Россия мўв эвӑт арсыр тащӑңа вәум хуятӑт  
               ӛрн щив китсыйт, ыв ар йиуп кӑт йитпи хотӑт 
                                 щӑта омӑссӑт. 
 
 

Терпение и труд всё перетрут

Борис Гаврилович Саламатин родился в 1935 году в семье рыбака в селении Сытомино Сургутского района.

Не закончив своей учёбы в  четырёхлетней начальной школе, рано стал работать рыбаком в колхозе имени В.И. Ленина. Затем продолжил свою работу в Сытоминском рыбоучастке, который относился в то время к Сургутскому рыбозаводу. Всю свою жизнь он проработал простым рыбаком.   

В настоящее время Ветеран труда Б.Г. Саламатин проживает в селе Лемпино Нефтеюганского  района. Он и сейчас считает, что, если хорошо добывать рыбу и продавать её по достойной цене, то можно будет нормально жить. Но для всего этого нужно упорно трудиться. Не зря в народе говорится: «Терпение и труд всё перетрут».   

Владимир ЕНОВ
 
Рубрика: 
Шуши мирев вәԯупсы - Жизнь хантыйского народа
Номер Ханты Ясанг: 
№ 13(3409)
11.07.2014