Ай кєр тыӆӑщ 22-мит хӑтӑӆн Рус­скинс­кой кәртӑн Сәр­ханӆ районӑн рәт мўв хӑн­тэт «Вўӆєӊ па вой-хўӆ веӆпӑсӆӑты ёх» мӑӊхӑтӆэӆ вє­рсӑт. Щимӑщ вуӆаӊ вєр пӑта Сәрханӆ, Тю­мень, Екатерин­бург вән вошӑт эвӑӆт щив хӑннєхуятӑт па юх­тыйӆсӑт. Кашӑӊ мойӊ хуята әмӑщ вәс уша павӑтты, муй щирн хӑнтэт вўӆєӊ әхӆӑтн ӆыв кўтэӆн кӑсӆӑт. 

Сәрханӆ район кәщайт кўтн ок­ругев кан вўӆэт тӑйты кәща хә Сте­пан Кечимов шиваӆӑсум па ӆўвеӆ инь­щӑссєм.

- Мӑтты айкеӆ мўӊ газетаев ӆўӊӑт­ты хӑннєхуятӆўва тўва, муй щирн катра тӑ­мӑщ мӑӊхӑтӆӑт нын ху­щана ӆэщӑтсыйт па муй иты щитӑт тӑм юхи хӑщум оӆӑтн, нӑӊ щиренӑн, вєрты пит­сыйт?

- Тӑм пўш «Вўӆєӊ па вой-хўӆ веӆпӑсӆӑты ёх» мӑӊхӑтӆ араттєӆн 55-мит оӆ вўша щи юхтӑс. Катрашӑк, вантэ, ӑӆ Рус­скинской кәртӑӊ мӑӊ­хӑтӆа иса ӆўӊтӑсӑс. Щи пӑта шєӊк ар хӑннєхә тыв ӑн па ӊхӑс. Юхи хӑ­щум оӆ вўшӑтн тӑм мӑӊ­хӑтӆэв вән кәщаитн район ӆуваттыйн нємасыя вєрты питсы. Мосӆ лупты, щи вєр унтасн шєӊк ар хӑннєхә сыр-сыр вош эвӑӆт тыв юхӑтӆ.
Щи тумпийн округев ӆуваттыйн мєт ар кан вўӆы тәп мўӊ Сәрханӆ районэв хуща рәт мўвӑӊ хӑнтэт ин тӑмхӑтӆ вәнты мсыева тӑйӆӑт.

- Муй арат хӑнты тӑм кўтн Сәрханӆ район вәнт кәр­тӑтн арӑттєӆн вәӆ, муй ӆыв тӑмхӑтӆ рәт мўвӑтн вєрӆӑт? 

- Юхи хӑщум оӆӑтн мўӊ районэв ӆуваттыйн омӑсты вәнт кәртӑтн араттєӆн вет щурӑскєм хӑннєхә тӑй­ӆўв. Ӆыв хуӆыева ин рәт щирн ӆўӊтӑсты мўвӆаӆн вәӆӆӑт, кан вўӆыӆаӆ пиӆа вулкємӑӆӑт, вой-хўӆ веӆпӑсӆӑӆӑт муй арсыр воньщумутӑт вәнтӑтн ӑкӑтӆӑт. Ма щирємн, тӑта мосӆ лупты, хуты щи ёхӆўв-нєӊӆўв тӑӆаӊтєӆн, иха ки ӆўӊӑтты, щит хәӆум щурӑс вўӆы ин тӑйӆӑт. Сыры  ма округев кәщая вәӆум нє Наталья Комарова пиӆа вәйтантыйӆсум па мин кўтэвн путӑртсумн, рӑхӆ муй па ӑнтә мўӊева аршӑк вўӆы тӑм йисн му­щаттыя. Мўӊ ӆәӆн щи вўӆэт, катра иты, Ямал ху­ща ӆәттыя вєритсўв. Ӆўв щиты юхӆы нёхмӑс, хуты мўӊ тӑта вўӆы ӆапӑтты тӑхетн ӑн тӑрумӆыюв. Щикўш ар мўвие тӑйӆўв па Тромаган, Аган, Пиӊ юханӆўв хўваттыйн вәӆты нётаиӊ тӑхет па хуӆыева ар пєлӑк тўтн ӆєсыйт. Щи пӑта еша аршӑк вўӆы тӑйты ӑн вєритӆўв.

- Муй щирн тӑм оӆн «Вўӆєӊ па вой-хўӆ веӆпӑсӆӑты ёх» мӑӊхӑтӆ, нӑӊ щиренӑн, вән кәща ёхн ӆэщӑтсы?

- Ма нәмӑстємн, шєӊк хурамӑӊа па тащӑӊа щит вєрсы. Мўӊева юхи хӑщум оӆ пураитн ар нётупсы «Лукойл-За­пад­ная Сибирь» па «Сур­гутнефтегаз» вән кәща ёхӆўв тўӊщирӑӊа па вещ­ката вєрӆӑт. Щи кинь­ща тӑта мўӊ хӑнтыӆўв па арсыр тынєсты хӑрӑт ӆэщӑтӆӑт. Ӆыв вўӆы па кўрӑӊ вой нюхи, арсыр хўӆ, воньщумутӑт, вәнт вой сухӑт, кєпӆӑт, арсыр ёшн вєрум па ёнтум пурмӑ­сӑт муй ӆәмӑтты сухӑт мсыева тӑм мӑӊхӑтӑӆн мӑнты кємн еӆ тыныӆӑт. Катра, ма щирємн, хӑнтэт тӑмиты тынєсты ищипа ӑн хошсӑт. 

- Муй арат вўӆєӊ әхӑӆ тӑм пўш кӑсты щирӑта нын ёхӆӑн-нєӊӆӑн ӆэщӑтсӑт?

- Тӑм пўш кӑсупсы вє­рӑта мўӊ хӑнтыӆўв арат­тєӆн иса 40-кєм вў­ӆыйн кирум әхӆӑт ӆэщӑтсӑт. Щи пӑта кӑсты вєрӆўв шєӊк тәса тӑта мӑнӆӑт. Щӑӆта па тӑм йисн хә ёх атэӆт щирн вўӆєӊ әхӆӑтн кӑсӆӑт, нєӊӑт – па атэӆт. Щит па шєӊк м вєр, ма нәмӑстємн. 

- Ин, нӑӊ щиренӑн, «Буран» нємуп тўтӑӊ әхӑӆ – тӑм хӑтӆ м мойӆупсы мєт оӆӊа юхтум хӑнты хәя муй нєӊа?

- Ӑӆ хән, м мойӆупсы! «Буран» такӆы хӑнты хә муй нє тӑм йисн муй вєрты вєритӆ! Щи пӑта мўӊ хӑннєхуятӆўв тӑм­хӑтӆ шєӊк ма вўӆєӊ әхӆӑтн кӑссӑт па юхи хӑ­щум пурайн вет вўӆєӊ әхӑӆ па ӆыв кўтэӆн ӛр­ӆаӆ артаӆӑсӑт, итәх хӑн­нєхуятӑт ищипа нух питсӑт па «Буран» ёша павӑтсӑт. Ма щирємн, шєӊк м мойӆупсы рәт мўвн па вән кәртӑтн вәӆты-хоӆты хӑннєхуятӑта!

Путӑр хӑншӑс: 
Владимир Енов