Айкеԯӑт - Новости

Югра мўвн ай кәртӑта тӑӆ кєши мосты утӑт иса тәсыйт. Муй 2025-мит оӆн тәты вўтьщийӆсӑт, щит иса мосты артӑн щив тәсы. 

Ас, Ӆаӊаӆ па щив питты ай юханӑт па пусӆӑт хўват Нуви сӑӊ­хум, Сўмӑтвош, Кондин­ской, Нижневартовской, Манстӑр, Ханты-Мансий­ской районӑта, хута 58 щурӑс муӆтас хӑннєхә вәӆ, 11,2 щурӑс тонна арат нефтепродуктӑт па 16 щурӑс тонна арат ӆав тәсы. 
Тӑм вєр «Увӑс завоз» федеральной поступсы щирн ӆэщӑтӆы. Округев эвӑӆт районӑта щит ӆәт­ты пӑта вух єсӑӆса па оӆ сухантты вәнты тәты ӛшеӆ пӑта ищи вух юхӆы сухуптӑӆы. 

«Арктика. ӊк нюхӆăс» айӆат ёх вән мирхот пурайн 400 арат сәх хўӆ Ӆаӊаӆа єсӑӆсы.

 «Сәх, єнма!» нємпи мўв-авӑт ӆавӑӆты вєр ӑнтә тәп и пўш ӆэщӑтты вєр. «Вўрты киникая» хӑншум хўӆ кашӑӊ оӆ йиӊка єсӑӆӆы. Форум мирхот нӆ хӑтӆ мӑр иса Ӆаӊаӆа, Аса па юханӑта 300 щурӑс сәх ай хўӆ єсӑӆсы. 

Тӑм вєр Югра прави­тельства ёх мўв иӆпи та­щӑт вўты тӑхет хуятӑт пиӆа иха, и нумӑсн ӆэ­щӑтӆӑт. 
«Сохранение си­бир­ского осетра» вєрн хәт тӑӆ мӑр Аса па Ӆаӊаӆа 19 миллион араткєм сәх ай хўӆ єсӑӆса. 

2025-мит оӆн мўӊ мўвев фашизм әхтыйн нух питум хӑтӆ вўш эвӑӆт 80 тӑӆ постӑсўв. Тӑм оӆ вәщ тыӆӑщ 9-мит хӑтӆӑн Сўмӑтнюӆ кәрт хӑрыйн ӆаӆьн ӆаӆясум па пӑрум ёх пӑта обелиск кев хурас пўншсы. 

Тӑм ванӑн вәщ тыӆӑщ 18-мит хӑтӆӑн Сәрханӆ район Белый Яр кәрт хуща вәӆты «Валикас» нємпи рўтьщӑты тӑхийн «Югра ӆыӆӊуптӑты» оса тӑхи XV-мит мирхот вәс. Тыв Югра мўвев 21 сўӊ эвӑӆт шуши мир пиӆа рәпитты арсыр кәщайт, 39 делегат хуят юхӑтсӑт, 15 делегат онлайн щирн тӑм мирхот вантсӑт. 

Россия мўвев Увӑс мир ассоциация кә­ща хә Александр Но­вь­ю­хов вўща вєрӑс:

Югра мўвевн ӆўӊа щи йис. Щит пӑта йиӊк хуща кашӑӊ вән хӑннєхәя муй ай няврєма хәриман вәӆты мосӆ. Кашӑӊ хӑннєхуята нәмӑсты мосӆ, хуты йиӊк пўӊӑӆн вән шәкӑӊ вєра питты рӑхӆ. 

Ӆәӆн щимӑщ вевтам вєра ӑн юхӑтты па мсыева еӆӆы вәӆты, мосӆ нәмты:
- тәп щи тӑхетн певӑӆты рӑхӆ, мӑта утӑт нємасыя ӆэщӑтман тӑйӆыйт;
- певӑӆты пураитн ӆєваса па тӑхета вәщты и пўша нємуӆты щирн ӑн рӑхӆ;
- павӑртӑт эвӑӆт вєрум пурӑтн тывеӆт-тухеӆт йиӊк хўват ӊхтыя ӑн мосӆ, вантэ, сора мӑнты моторӑӊ хопӑта муй тўтӑӊ хопӑт пўӊӆа питты вєритӆӑты;

Щи оӆӑӊӑн «Вестник» нємпи Сәрханӆ рай­он газетая сенатор РФ, Увӑс мир ассоци­а­ция тӑхи кәща хә Александр Новьюхов лупӑс.

Сырыя вўӆы тащ ӆавӑӆты ёх имет, хуйтат кашӑӊ хӑтӆ пўт кавӑртӆӑт, юрн хот сыс­та­ма тӑйӆӑт, тўтъх сэ­вӑр­ӆӑт па па арсыр рә­па­тайт вєрӆӑт, «Трудовой кинишка» ӑн тӑйсӑт.
Труд па соцзащита министерства поступсы тӑм оӆн ай кєр тыӆӑщн йиӆпатсы. Ин щӑта хӑншсы – «Работник кочевого жилища». Касăӆты имет ин па ёх иты пенсияя мӑнты па арсыр вухӑӊ нётупсэт ёша хоӆумты вєритӆӑт.

Лыпӑт тыӆӑщн 25-27-мит хӑтӆӊӑнӑн Ёмвошн БРИКС па ШОС мўвӑт Мўвтєӆ мир вән мирхот вәс. Тыв Россия ӆуваттыйн 53 мўв эвӑӆт па па хон пєлӑк 47 мўвӑт эвӑӆт арсыр мирӑт мойӊа юхтыйӆсӑт. 

Щи кўтн Зимбабве, Ни­карагуа мўв­ӊӑн па Кыргызской Республи­ка эвӑӆт ёх вәсӑт. Мєт сы­рыя Узбекистан мўв Югра мўвн тӑм мирхот ӆэщӑтты щи­ра нётӑсты мўва йис (рўщ щирн «страна-партнёр»). Иха ӆўӊӑтты ки, вет щу­рӑс муӆтас хӑннєхә вән мирхотн вәс. Арсыр мўвӑт эвӑӆт ӑктӑщум мир пӑта 50 сыр-сыр нумсӑӊ хӑр, мирхотӑт, вәйтантупсэт, ванӆтупсэт па ЮНЕСКО щирн вуӆаӊ мирхот ӆэ­щӑтсы. 

Ёмвошн вәщ тыӆӑщн 5-6 мит хӑтӆӊӑнӑн Восточной микрорайон хуща, Горная нємуп юхан пусӆ хуща, иса мўвӑтн вәӆты мирев юрн хопӑӊ кӑсупсы вәс, щит Югра кәща кубок щира «Югорские обласа» кӑсупсы. Тӑм кӑсупсы Ёмвош округ кәща ёх, ӛрӑӊа-щомӑӊа йиты вєр тәты округ департамент па «ЮграМегаСпорт» тӑхи ёх ӆэщӑтсӑт.

Югра мўвн СВО тӑхийн ӆаӆясты па ӆаӆясум хуятӑт па ар няврємӑӊ хоттєӆ ёх нётӆыйт. Щи поступ­сы йиӆпатты оӆӑӊӑн тӑм ванӑн округ дума кәща хә Борис Хохряков нєпекн ёш пос пунӑс. Депутатӑт заочной щирн ка­шащ­ты ясӑӊӆаӆ щит пӑта мӑсӑт. 

Вәщ тыӆӑщ оӆӑӊмит па хәӆмит хӑтӆӊӑнӑн Ёмвошн округ дума па шуши мирӑт Ассамблея мирхотӊӑн вәсӊӑн. Щи пурайн депутатӑт шуши мирӑт правайт вәньӆьты хӑннєхә пирисӑт. Щи оӆӑӊӑн путӑр тәняӆ оӆ мӑнты питӑс, хән округа йиӆуп кәща хә Руслан Кухарук юхтӑс. Тәняӆ губернатор хәев Послание вєр пурайн щи оӆӑӊӑн путӑртӑс па тӑм оӆ щимӑщ поступсы вўсы. Тӑм дума мирхотн тәп хӑщӑс Уполномоченной хӑннєхә пириты.