Айкеԯӑт - Новости

Югра мўвевн ӆўӊа щи йис. Щит пӑта йиӊк хуща кашӑӊ вән хӑннєхәя муй ай няврєма хәриман вәӆты мосӆ. Кашӑӊ хӑннєхуята нәмӑсты мосӆ, хуты йиӊк пўӊӑӆн вән шәкӑӊ вєра питты рӑхӆ. 

Ӆәӆн щимӑщ вевтам вєра ӑн юхӑтты па мсыева еӆӆы вәӆты, мосӆ нәмты:
- тәп щи тӑхетн певӑӆты рӑхӆ, мӑта утӑт нємасыя ӆэщӑтман тӑйӆыйт;
- певӑӆты пураитн ӆєваса па тӑхета вәщты и пўша нємуӆты щирн ӑн рӑхӆ;
- павӑртӑт эвӑӆт вєрум пурӑтн тывеӆт-тухеӆт йиӊк хўват ӊхтыя ӑн мосӆ, вантэ, сора мӑнты моторӑӊ хопӑта муй тўтӑӊ хопӑт пўӊӆа питты вєритӆӑты;

Щи оӆӑӊӑн «Вестник» нємпи Сәрханӆ рай­он газетая сенатор РФ, Увӑс мир ассоци­а­ция тӑхи кәща хә Александр Новьюхов лупӑс.

Сырыя вўӆы тащ ӆавӑӆты ёх имет, хуйтат кашӑӊ хӑтӆ пўт кавӑртӆӑт, юрн хот сыс­та­ма тӑйӆӑт, тўтъх сэ­вӑр­ӆӑт па па арсыр рә­па­тайт вєрӆӑт, «Трудовой кинишка» ӑн тӑйсӑт.
Труд па соцзащита министерства поступсы тӑм оӆн ай кєр тыӆӑщн йиӆпатсы. Ин щӑта хӑншсы – «Работник кочевого жилища». Касăӆты имет ин па ёх иты пенсияя мӑнты па арсыр вухӑӊ нётупсэт ёша хоӆумты вєритӆӑт.

Лыпӑт тыӆӑщн 25-27-мит хӑтӆӊӑнӑн Ёмвошн БРИКС па ШОС мўвӑт Мўвтєӆ мир вән мирхот вәс. Тыв Россия ӆуваттыйн 53 мўв эвӑӆт па па хон пєлӑк 47 мўвӑт эвӑӆт арсыр мирӑт мойӊа юхтыйӆсӑт. 

Щи кўтн Зимбабве, Ни­карагуа мўв­ӊӑн па Кыргызской Республи­ка эвӑӆт ёх вәсӑт. Мєт сы­рыя Узбекистан мўв Югра мўвн тӑм мирхот ӆэщӑтты щи­ра нётӑсты мўва йис (рўщ щирн «страна-партнёр»). Иха ӆўӊӑтты ки, вет щу­рӑс муӆтас хӑннєхә вән мирхотн вәс. Арсыр мўвӑт эвӑӆт ӑктӑщум мир пӑта 50 сыр-сыр нумсӑӊ хӑр, мирхотӑт, вәйтантупсэт, ванӆтупсэт па ЮНЕСКО щирн вуӆаӊ мирхот ӆэ­щӑтсы. 

Ёмвошн вәщ тыӆӑщн 5-6 мит хӑтӆӊӑнӑн Восточной микрорайон хуща, Горная нємуп юхан пусӆ хуща, иса мўвӑтн вәӆты мирев юрн хопӑӊ кӑсупсы вәс, щит Югра кәща кубок щира «Югорские обласа» кӑсупсы. Тӑм кӑсупсы Ёмвош округ кәща ёх, ӛрӑӊа-щомӑӊа йиты вєр тәты округ департамент па «ЮграМегаСпорт» тӑхи ёх ӆэщӑтсӑт.

Югра мўвн СВО тӑхийн ӆаӆясты па ӆаӆясум хуятӑт па ар няврємӑӊ хоттєӆ ёх нётӆыйт. Щи поступ­сы йиӆпатты оӆӑӊӑн тӑм ванӑн округ дума кәща хә Борис Хохряков нєпекн ёш пос пунӑс. Депутатӑт заочной щирн ка­шащ­ты ясӑӊӆаӆ щит пӑта мӑсӑт. 

Вәщ тыӆӑщ оӆӑӊмит па хәӆмит хӑтӆӊӑнӑн Ёмвошн округ дума па шуши мирӑт Ассамблея мирхотӊӑн вәсӊӑн. Щи пурайн депутатӑт шуши мирӑт правайт вәньӆьты хӑннєхә пирисӑт. Щи оӆӑӊӑн путӑр тәняӆ оӆ мӑнты питӑс, хән округа йиӆуп кәща хә Руслан Кухарук юхтӑс. Тәняӆ губернатор хәев Послание вєр пурайн щи оӆӑӊӑн путӑртӑс па тӑм оӆ щимӑщ поступсы вўсы. Тӑм дума мирхотн тәп хӑщӑс Уполномоченной хӑннєхә пириты. 

Щи оӆӑӊӑн уша йис вәйтантупсыйн, мӑта ут Ас нопӑтты тыӆӑщ 27-мит хӑтӆӑн Югра мўв государственной киникайт ӆўӊӑтты хотн ӆэщӑтман вәс. Мосӆ лупты, хуты щи хӑтӆ – щит Россия мўвтєӆ киникайт ӆўӊӑтты хотӑт мӑӊхӑтӆ. Щи тумпи хәс оӆ юхӆы щи хӑтӆӑн Югра мўв киникайт ӆўӊӑтты хот щи йиӆуп хота (Мира вош хўлы, 2-мит хот) касӆӑс.

Тӑм хот кәща нє Ев­гения Финк рәпа­таеӆ оӆӑӊӑн ай тәс:

Кашӑӊ ӆўӊ «Торум Маа» йис пурмӑсӑт шавиман тӑйты тӑхийн няврємӑт пӑта «Таксар махум» (хӑнты щирн «Таксӑр ёх») нємпи рўтьщӑты хӑр вєрӆы. Тӑм пўш ищи Ёмвошн вәӆты пушхиет щӑта рўтьщӑсӑт.

«Торум Маа» тӑхийн рәпитты хӑнты хә Вячес­лав Кондин лупӑс:

30 оӆ юхӆы 1990-мит оӆ лыпӑт єнумты тыӆӑщ 12-мит хӑтӆӑн Россия мўвн Дек­ларация оӆӑӊăн поступсы нєпек вўсы. Ищи пурайн Россия мўв кәща Борис Ельцин мєт оӆӑӊ президент хуята аӆьщӑты питсы. Ву­ӆаӊ Конституция нєпек щи мӑрн ищи йиӆпат­сы. Щиты кашӑӊ оӆ лыпӑт єнумты тыӆӑщ 12-мит хӑтӆӑн Россия мўв мӑӊхӑтӆ постӑӆы.

Лыпӑт тыӆӑщ 16-мит хӑтӑӆн Нуви сӑӊхум района Тюменской область, Югра мўвев па Ямало-Ненецкой округ эвӑӆт депутатӑт, арсыр департаментӑт кәщайт юхӑтсӑт, щӑта хәӆумъяӊкєм хӑннєхә вәс.