Мӑнум оӆн Ёмвошн финно-угорской мир писателят мирхот вәс. Щи тӑхи хуща литература вєрӑт оӆӑӊӑн айкеӆ тәсӑт па лупсӑт, муй пӑта тӑм юхи  хӑщум оӆӑтн сыр-сыр киникайт хӑнштыя мосӆ па муйсӑр унтас ӆыв еӆӆы финно-угорской мирӑтн вәӆты ӑӆ хӑннєхуятӑта тәты вєритӆӑт. 

Щи пурайн ма нєма­сыя арсыр финно-угорской мўвӑт эвӑӆт юхтум поэтӑт па писателят пиӆа вәйтантыйӆсум па айкеӆӑт ӑкӑтсум. Ӆыв кўтэӆн мӑнєма Карелия мўв эвӑӆт киникайт хӑнш­ты нє Елена Пиетиляйнен ӆикмас. Юхи хӑщум оӆӑтн ӆўв Петрозаводск вошн «Увӑс мўв» нємуп журнал кәща нєӊа  вәӆ па рәпитӆ. Вәӆупсы хўваттаӆн тӑм нєӊев сыр-сыр хурамӑӊ ӆўӊтарӑт па әмӑщ путрӑт шєӊк тәса хӑншӑӆ. Щимӑщ вєр пӑта ма ӆўв пиӆэӆа тӑта мкєм  хўват иха путрємӑсман. 

- Елена Евгеньевна, мӑтты айкеӆ округевн «Хӑнты ясӑӊ» газетаев ӆўӊӑтты ёхӆўва, аӆпа, тӑмхӑтӆ тәтыя вєритӆӑн?

- Ма Подпорожье вошн Ленинградской область мўвн рўщ хоттєӆ ёх хуща сєма питсум па айтєӆн єнумсум. Еша ӛхӑтшӑк ӑӊкєм-ащєм Кондапога воша Ка­релия мўва касӑӆсӑӊӑн. Мосӆ лупты, хуты ма щи вошн ӑшколая ӊхсум па вәнӆтыйӆсум. Кўтуп ӑшколам етшуптумєм пийн Петрозаводск вошӑӊ государственной университета еӆӆы вәнӆтыйӆтыя мӑнсум. Щи тӑхєм 1984-мит оӆн «Учитель русского языка и литературы в средней школе» щирн етшуптӑсєм. Щӑӆта ӛхӑт па 13 оӆ мӑр Карелия мўв ай увӑс кәртӑн кўтуп ӑшколайн няврємӑт рўщ ясӑӊа па литературая вәнӆтуман рәпитсум. Щӑта рәпитман, кәщаитн Ка­релия мўв Заслуженной учитель нємн кантсыюм. Педагогической наукайт кандидат нєӊа йисум, вантэ, аспирантурам ищи сухнуптӑсєм па щимӑщ нєм холумсум. Щи вєр тывум пийн ӑшкола эвӑӆт па пўӊӆа мӑнсум, Петрозаводск вошӑӊ Центр образования тӑхи кәща нєӊа рәпиттыя  питсум. Щӑӆта щи рәпа­там эвӑӆт па «Увӑс мўв» журнал кәщая павӑтсыюм. Щи тӑхєм хуща 16-мит оӆ тӑмхӑтӆ вәнты вәӆӆум па рәпитӆум.
Щи вєрӑт тумпийн Карелия мўвн «Союз писателей России» тӑхи кәща нєӊа пирисыюм. Тӑмхӑтӆ ма арсыр поэтӑт па писателят пиӆа иса вәйтантыйӆӆум.

- Елена Евгеньевна, муй арат хӑннєхә тӑмхӑтӆ «Союз писателей России»  тӑхия нын хущана ӆуӊ­ман вәӆ? 

- Карелия мўв, вантэ, шєӊк вән ӑнтәм. Иха араттєӆн ки ӆўӊӑтты, щит 600-кєм щурӑс хӑннєхә щӑта вәӆ. Петрозаводск вән вошевн тӑмхӑтӆ ищи 250-кєм щурӑс хуят тәп тӑйӆўв. Щикўш шимӆ мир па ищипа «Союз писателей России» хуща мўӊ мўвев эвӑӆт 30-кєм хӑннєхә вўсы. Ар пєлӑк хәйт па нєӊӑт иса рўщ ясӑӊӑн стихӑт па путрӑт ӆэщӑтӆӑт. Ма вєритты кємн ӆывеӆа ар щирн юхи хӑщум пураитн нётӆум.

- Хән па нӑӊ әмӑщ ӆўӊта­рӑт па хурамӑӊ путрӑт хӑнштыя питсӑн?

- Мєт оӆӑӊӑн ма сти­хотворенияйт хӑнштыя питсум, ӑшколайн вәнӆ­тыйӆман, хӑншсум. Уни­верситетн сыр-сыр ӆўӊ­тарӑт тӑйсум па щитӑт псевдоним хў­ватн область газетайн па єсӑӆсыйт. 

Россия мўв писателят Союз тӑхия ма 2000-мит оӆн вўсыюм. Щи вєр еӆпийн 1996-мит оӆн «Учитель года России» кӑсупсыйн нух питсум па Россия мўв Президент хәевн вухӑӊ мойӆупсыйн катӆуптӑсыюм. Щи вухӆам унтасн мєт оӆӑӊ ӆўӊтарӑӊ «Оттаявший свет» нємуп киникам хӑннєхуятӑта па ӆўӊӑтты щира щи єсӑӆ­сєм. Тӑмхӑтӆ ма арат­тєӆн 12 сыр-сыр ки­ника ай няврємӑт па вән хӑн­нєхәйт пӑта хӑншман тӑйӆум. 

- Елена Евгеньевна, муй­сӑр вєрӑт оӆӑӊӑн нӑӊ ки­никайӆӑн хуща хӑншӆӑн? 

- Ма рәт мўвєм, хӑн­нєхә ӆыпеӆн тӑйты нум­сӑт оӆӑӊӑн, мӑнєма мос­ты хәйт-нєӊӑт пӑта па әмща, хурамӑӊа хӑнш­тыя вєритӆум. Ин рәт мў­вєм оӆӑӊӑн тӑм «Между Ладогой и Онегой» нємуп ӆўӊтарєм тӑта нӑӊена ӆўӊӑтӆєм: 

Между Ладогой и Онегой,
Где горячий пахучий мох,
В колеснице июль проехал,
Август лето закрыл на замок.
Между Ладогой и Онегой,
Где у ели растёт борода,
В предвкушении первого снега
Деревянные спят города …

- Елена Евгеньевна, тӑмӑщ финно-угорской мир пи­сателят вәйтантупсэт мосӆ юхи хӑщум оӆӑтн вєрты муй ӑнтә?

- Ма щирємн, финно-угорской писателят вәй­тантупсэт шєӊк мосӆӑт. Тӑта арсыр мўӊева мос­ты айкеӆӑт хуӆыева ушӑ­ӊа-сащӑӊа вєрӆўв, мин кўтэвн вәйтантыйӆўв па путрємӑӆўв. Щи унтасэвн сыр-сыр киникайт хӑншты вєрӑт еӆӆы па мсыева ӆэщӑтӆўв!

Путӑр хӑншӑс: Владимир Енов