Айкеԯӑт - Новости

Югра мўвевн вәӆ­ты ты­нӑӊ мир!

Тӑмхӑтӆ иса мўвӑт 76-мит пўш Вуӆаӊ Победа мӑӊхӑтӆ постӑӆӑт.

Мўӊ рәт мўвевн вәӆӆўв, рәпата тӑй­ӆўв, имеңа-икеңа, няврємӑӊа йиты, тёпиеӆўв єнмӑӆты, ӆыв тәс вєрӑта амӑтты па иса уяӊа-пищӑӊа вәӆты вє­ритӆўв. Вуӆаӊ

Отечественной ӆаӆя ӊхум хуятӑт, ӆаӆь хӑрн ухӆаӆ пунум па ӆаӆь пӑта тарма рәпитум ёх ӛрн интӑм вәӆты щир тӑйӆўв. 

2021-мит оӆ вән кєр тыӆӑщ 13-мит хӑтӑн нәптӑ 67 оа вум Касум хӑнты имие, Касум мўв антропологической ӑшкола (КАШ) ӆэщӑтум хӑннєхә, «Нумсӑӊ ёх» нємпи ӆўӊ пурайн няврємӑт рўтьщӑты тӑхи пўншум хуят, Ас-угорской институтн увӑс мир йис вєрӆўв, хӑнты путӑрӆўв, ясӑӊӆўв йиӆуп щирн єсӑӆты тӑхийн научной рәпатнек, няврємӑт вәнӆтӑты нє па мир пєа иса пурайн сӑмӑң па апрӑӊ хуят Ольга Александровна Кравченко ӑнтәма йис. Хўв пӑнта иса кєша шәшмӑс м хӑннєхә.

Тӑта мосванӑн, вән кєр тыӆӑщ хәтмит хӑтӑӆн, Ёмвошн айкеӆӑт ӑкӑтты хӑннєхуятӑт «Центр профессиональной патологии» тӑхи тохтурӑт нўмпийн кәщая вәӆты хә Николай Ташланов пиӆа мирхотн вәйтантыйӆсӑт па путӑртсӑт.

Тӑм ванӑн айӆат ёх сыр-сыр кӑсты тӑхетн нух питум апрӑӊ вән кӑтӊӑн пиӆа ӆухн ӊхсӑт, щи вєр нємӆ «Тренировка с чемпионом». Тӑм вєр Ёмвошн вән кєр тыӆӑщ 8-мит хӑтӆӑн Александр Филипенко нємуп тӑӆ тәрумн кӑсты тӑхийн вәс. 

Тӑмӑщ вєрн иса 100 кєм ӆухн ӊхты ай­ӆат ёх ӑкумсӑт. Щит «Спор­тивная школа олим­пийс­кого резерва» Ёмвош эвӑӆт, «Югорский колледж олимпийского резерва» па Югра чемпионат тӑхетн кӑсум няврємӑт.

Вән кєр тыӆӑщ 3-5-мит хӑтӆӑтн Нуви сӑӊхум район Касум вошн ма няврємӑт пиӆа «Айкеӆӑт хӑншты айӆат хуят» вәнӆтӑты хӑр вєрсум. Щӑта Касум вош ӑшколайн вәнӆтыйӆ­ты пушхиет ӑктӑщсӑт.

Вән кєр тыӆӑщ 4-8-мит хӑтӆӑтн Ямал мўв вуӆаӊ Салехард вошн Увӑс мирӑт кимит вән мирхот вәс.

Хўӆ веӆпӑсӆӑты, вўӆы ӆавӑӆты, вой веӆты вєрӑт еӆӆы тәты

Вән мирхотн хўӆ веӆ­пӑсӆӑты, вўӆы ӆавӑӆты па вой веӆты вєрӑт еӆӆы тәты оӆӑӊӑн тӑхи рәпитӑс. С.Н. Харючи мирхот пўнш­ман лупӑс:

Вән кєр тыӆӑщ оӆӊитумн мўӊ «Хӑнты ясӑӊ» па «Луима сэрипос» газетайӊӑӆўв єсӑӆты тӑхия округ дума депутат, Россия мўвев Увӑс мирӑт ассоциация кәща ӆӑӊкӑр хә, ар оӆ мӑр «Югра ӆыӆӊуптӑты» оса тӑхи кәщая вәӆум нумсӑӊ хӑнты хә Александр Новьюхов юхтыӆӑс. 

Вән кєр тыӆӑщ 9-мит хӑтӑӆн Югра мўв оса ёх тӑхийн «Час с министром» нємуп мирхот вәс. Оса вєрӑт әхтыйн рәпитты хуятӑт Ёмвош округ промышленной вєрӑт тәты тӑхи кәща Кирилл Зайцев пиӆа путрємӑсӑт.

К.С. Зайцев ай пав­тӑс, муй иты ӆыв вой-хўӆ єнмӑӆты ёха «Развитие агропромышленного комп­лекса» нємуп поступ­сы унтасн нётӆӑт:  

Вән кєр тыӆӑщ 14-мит хӑтӑӆн Ёмвошн шуши мир вәӆупсы па рәт ясӊӑт еӆӆы тәты вєр әхтыйн вән мирхот вәс. Тӑм вәйтантупсы Югра мўв кәща ӆӑӊкӑр хә Алексей Забозлаев тәс.  

Оса вєрӑт тәты де­партамент хуща рәпитты ими Алина Ха­лилова шуши мир рәт яс­ӊӑтн єсӑӆты газетайӊӑн, телевидения оӆӑӊӑн ай павтӑс:

Югра мўв вәнт шушийн па хўв тӑхийн омӑсты ай кәртӑтн вәӆты шуши мирӆўва коронавирус мәш эвӑт пуртән оньщты вєр оңитсы. Щи оӆӑӊӑн мир мӑӆты па лекщитты вєрӑт вантман тӑйты департамент кәща Алексей Добровольский интернет щирн Insnagram хуща айкеӆ тәс.