Рўтьщӑты хӑтӆӑтн нын семьяйӆӑн пиӆа м вуӆаӊ тӑхева ӊхӆӑты? Югра мўвн йистэӆн вәӆты шуши мир хущи нынана ӊхты щир вәӆ. Вән вошӑтн вәӆтыйн мўв-йиӊкӑт, вәнтӑт әмӑщ хурасӆаӆ хән ныӆайт.

Нынана шуши мирӑт вәӆты ай кәртӑта ӊхты мосӆ. Щӑта муӆтыкєм хӑтӆ вәӆты па палаткайн хоӆты. Ӆәӆн ратхӑрн хўӆ хошум йиӊк кавӑртты. Вўӆєӊ ёх хущи ӆәӆн вўӆэт ӆапӑтты, вощхиты, вонь­шумут воньщты ӊхты, хўӆ хоӆупн веӆпӑсӆӑты.
Шуши мирӑт вәӆты пищӑт щирн еша вәӆӆӑты ки, йис путрӑт, моньщӑт хәӆӑнтӆӑты ки, нын сӑмӆӑн нявлӑк, нумӑсӆӑн такумӆӑт.

Мўӊ Ханты-Мансийской окру­гевн тӑмӑщ тӑхи ар вәӆ. Щит:
- Сәрханӆ районӑн Русскинӑт рәт вўӆы тӑйты па вәӆты щира Тром-Аган юхан хонӑӊӑн вәӆӆӑт. Русскинская  кәрт эӆты 60 километра па Сәрханӆ вош эӆты 200 километра хўватн вәӆ. 
- Сәрханӆ районӑн Сопочинӑт рәт вәӆты вәнт кәрт 70 километра хўватн Когалым вош эӆты вәӆ. Сопочин ёх тӑта хўӆ веӆпӑсӆӑты, воньщумут воньщты па арсыр вәӆупсы вєрӑт юхтум ёха аӆьӆăт.
- Сәрханӆ районӑн  «Юты Капияха» 80 километра хўватн Когалым вош эӆты вәӆ. Тӑта мойӊ ёх вантӆӑт, ху­тыса шуши мир вәӆӆӑт па вәӆупсэӆ уша вєрӆӑт.
- Нефтеюганской районӑн «Пунси Пуут» вәнт кәрт мойӊ ёх рўтьщӑты «Моньщ» нємуп база хущи  вәӆ. Тӑм вәнт кәртєм хӑнты ясӑӊ эӆты рўщ ясăӊа ки пунты, щит «Утиное озеро». 
- «Силава» тăхи вухаӆь ёх вәӆты пищӑт ванӆтӑты сайн вәӆ. Щит 15 километра вўшн Урай вош эӆты вәӆ па Конда юхан кимӑӆн омӑсӆ. Тӑта «Элы Хотал» увӑс мир община мєт оӆӑӊ вәс.
- Сўмӑтвош районӑн няврємӑт ӆўӊ мӑр вәӆты щира «Мань Ускве» тӑхи Ясунт вухаӆь ёх ай кәртые пуӊӑӆн омӑсӆ. «Мань ускве» Кев пелӑк эӆты нык ўвты Хулага па Манья пусӑӆӊӑн  ха питты тӑхийн щӑта вәӆ. 

Тӑмӑщ тӑхета юхтыӆыты ёх тӑта вәӆтэӆ мӑр, рўтьщӑтэӆ мӑр туӊа-щирӑӊа шуши мир вәӆупсы уша вєрӆӑт. Ӆыв нумӑсӆаӆн тӑм мўв-йиӊк  хурасӑӊ тӑхет, йис путрӑт па моньщӑт, вәӆты пищӑт, йис ар сувӑт сӑмӆаӆн хӑщӆӑт. Тӑмӑщ тӑхета рўтьщӑты щира ӊхты щи мосӆ.

Лика Андреевских айкеӆ 
хӑнты ясӑӊа тулмащтӑс: Наталья Краснопеева