Кәща ёх вєрӑт - Политика

Ай кєр тыӆӑщ хәӆмит хӑтӑӆн Ёмвошн телевиденияйн, радивайн па газетаитн рәпитты хӑннєхуятӑт округев ӆуватн ӆэщӑтум Всероссийской общественной «Волонтёры Конституции» тӑхи кәща Яков Самохвалов, «Волонтёры Победы» кәща Эка Шенгелая па «Волонтёры-медики» кәща ӆӑӊкӑр нє Наталья Любякина пиӆа вәйтантыйӆсӑт. Тӑм мирхот пурайн общественной вєрӑт тўӊматты кәщайт лупсӑт, муй щирн «Волонтёры Конституции» поступсы щирн ӆыв хущеӆа хӑннєхуятӑт сыр-сыр мосты вєрӑт оӆ мӑр вєрты нәмӑсӆӑт. 

Тәнӆуп тыӆӑщ 27-митн Ёмвошн округ дума мирхот вәс. Мирхот оӆӊитумн депутатӑт Китай мўвн тывум коронавирус мәш оӆӑӊӑн ай хәӆӑнтсӑт. Щи кӑши-мәш артаӆӑты оӆӑӊӑн округ кәща ӆӑӊкӑр хә В. Кольцов путӑртӑс. Ӆўв лупӑс, хутыса округевн щи вєр ӆэщӑтман вәӆ. Па депутатӑт инумса юхӑтсӑт, хуты еӆӆы дума мирхотн тӑм вєр оӆӑӊӑн округ тохтурӑт эвӑӆт айт хәӆӑнтты питӆӑт. 

Тӑм ванӑн округ дума депутат Александр Новьюхов пиӆа вәйтантупсы вәс. Ӆўв «Совершенствование системы устойчивого развития коренных малочисленных народов Севера» нємпи йиӆуп вєр оӆӑӊӑн ай тәс:

Ас хӑӆты тыӆӑщ 30-мит хӑтӑӆн Ёмвошн КТЦ «Югра-Классик» нємуп хот йитн иха ӑктӑщум округев правительства кәщайт, ӑӆ хӑннєхуятӑт Россия мўв Президент Федеральной собрания тӑхия хӑншум айкеӆӑт хәӆӑнтсӑт па уша вєрсӑт. Россия хон пєлӑк Президент хә Владимир Путин путӑртӑс, хуты кашӑӊ хӑннєхә уша ат вєрӆ, муйсӑр тӑхет па мӑта поступсэт Конституция хущи ма па тәса еӆӆы ӆэщӑтты мосӆ.

Мӑнум ӆапӑтмитн Россия мўв хонэв Владимир Путин Федеральной собрание ещаӆт путӑртӑс, муй щирн мўӊ еӆӆы вәӆты питӆўв, муйсӑр йиӆуп вєрӑт 2020-мит оӆ вўш эвӑӆт тывӆӑт. Щи путӑр пийн сыры рәпитум Россия правитель­ства ёхӆўв рәпата тӑхиӆаӆ эвӑӆт йира мӑнсӑт. Щи пийн йиӆуп премьер-министр хәя Михаил Мишустин павӑтсы па правительства ёх йиӆпа пирисыйт. 

В. Путин мєт оӆӑӊӑн няврємӑт сєма питты вєр оӆӑӊӑн лупӑс. Ӆўв щирӑӆн, Россия мўвев еӆӆы ма вәӆты пӑта мосӆ, ӆәӆн ар­шӑк няврєм сєма ат питӑс. 

Щи оӆӑӊӑн уша йис округ дума кәща хә Борис Хохряков пиӆа вәйтантупсыйн, мӑта ут ван хӑтӆуп тыӆӑщ 26-митн «Югра» нємпи айт ӑкӑтты хотн вәс.

Мӑнум оӆ ван хӑтӆуп тыӆӑщн Нягань вошн «Югра ыңуптӑты» оса тӑхия ӆуӊум шуши мир XIII-мит мирхота ӑктӑщийӆсӑт. Вуӆаӊ поступсы щирн, оса рәпата тәты ёх вән мирхот хәӆум оӆ мӑр ипўш вєрӆы. Щиты 2016-мит оӆн оса шуши мирӆўв Советской мўвн XII-мит пўш вәйтантыйӆсӑт. XIII-мит вән мирхот Нях вошн тәты ӆӑӊхасы. Оса тӑхи кәща Л.А. Алфёрова ясӊӑт щирн, вән мирхотӑт нємасыя арсыр вошӑтн, кәртӑтн ӆэщӑтӆыйт. Вантэ, щи пурайн кәртӑӊ, вошӑӊ мир амтӑӊа па апрӑӊа йиӆӑт. Ай мўвие йиӆпатӆӑт па хурамтӆӑт, шуши мир пурмӑсӑт, хурамӑт ванӆтупсэт ӆэщӑтӆӑт.

Мӑнум 2019-мит оӆэв тӑта мосванӑн веӆщи сухнуптӑсэв. Оӆ сухӑнты кємн ищипа кашӑӊ хӑннєхә нәмӑсӆ, муй щирн ӆўв хоттєӆ ёхӆаӆ пиӆа  вәс, муй хурасуп вєрӑт вантӑс, хуты рәпатайӆ ӆэщӑтӑс, муй щирн рўтьщӑс.

Ма тӑмхӑтӆ нынана, ешӑк хӑннєхуятӑт, йиӆпа юхтум 2020-мит оӆ пиӆа м вўща ясӑӊ китӆум па ӆӑӊхаӆум, ӆәӆн кашӑӊ нын вәӆупсы щирӆӑн па рәпатайӆӑн ма па тәса еӆӆы ат мӑнсӑт! 

Ёмвошӑӊ округев мӑӊхӑтӑӆн Югра мўв губернатор ими Наталья Комарова, Дума кәща хә Борис Хохряков, Югра мўв хўваттыйн рәпата мӑты тӑхи кәща ики Александр Кобанов па округ уваттыйн профсоюзӑт кәща Фёдор Сиваш 2020-2022-мит оӆӑт хўватн кашащты нєпека ёш пос пунсӑт. 

Тӑм мосты вєр нєма­сыя интӑм ӆэщӑтсы, вантэ, ван хӑтӆуп ты­ӆӑщ 31-мит хӑтӑӆн сы­рыя ёш пос пунум нєпек сухнӑӆ. 

Кашащты нєпек рә­патнекӑта, рәпата мӑты тӑхи хуятӑта па Югра мўв кәщайта вән унтас тәӆ. Вантэ, рәпатайн ты­вум вевтам вєрӑт кєн­шӑк тўӊматты питӆ.

Ас потты тыӆӑщ 19-митн округ кәща нє Наталья Комарова дума мирхотн 2019-мит оӆ мӑр правительства рәпата оӆӑӊӑн ай тәс. Мирхота округ дума депутатӑт, оса тӑхет ёх па мўвев вуӆаӊ хуятӑт ӑктӑщсӑт.

Оӆӊӑӆн Югра мўв кә­ща нє инвестиционной вєрӑт оӆӑӊӑн ясӑӊ лупӑс.  Щи вєр унтасн тӑм оӆ ок­руга арсыр вєрӑт щирн 939,4 миллиард арат шойт инвестиция вух тӑ­руптӑсы. Щит мўв иӆпи питы вуй па газ нух таӆты вєрӑт щирн, электроэнергетика, хо­тӑт, ӛшӑт омӑсты вєрӑтн, Интернет ӆэщӑтты, йи­ӆуп промышленной тӑ­хет пўнштыйн.