Айкеԯӑт - Новости

Округ ӆуваттыйн «Югра ӆыӆӊуптӑты» оса тӑхи ёх унтасн Ёмвошн «Реестр вуӆаӊ нєпека нух хӑншаньщаты!» нємпи вєр ӆэщӑтсы. Тӑм ӊхты-мӑнты мосты вєр оса рәпата тәты ёхн нємасыя оӆӊитсы, ӆәӆн Югра мўвн вәӆты шуши мир тӑм айкеӆ ат вантсӑт, нумса пунсӑт па имухты мўӊ итэва вохты нєпекӑт пиӆа ӆыв мосты нєпекӆаӆ Москва воша ФАДН нємпи тӑхия ат китсӑт.

Тӑм оӆ Ас нопӑтты тыӆӑщ оӆӑӊмит хӑтӆ вўш эвӑӆт вохты нєпек па па мосты ут ФАДН тӑхия китты щи­ра Югра мўв МФЦ хуща ӆэщӑтты рӑхӆ.

Тӑм оӆ няврємӑт вәнӆтӑты пура оӆӊитумн Нях вошн кӑт тыӆӑщ вўш эвӑӆт нємасыя мєт ай пушхӑт пӑта ясли хот пўншсы. Нях вошн щит мєт оӆӑӊмит ясли тӑхи. Щирн интӑм «Моньщ» нємпи хӑтӆ мӑр пушхӑт ӆавӑӆты хотн «Мєт ай тёпие» тӑхи рәпитты питӑс.

Щи оӆӑӊӑн ясӑӊ мӑнӑс мирхотн, мӑта ут округ губернатор Наталья Комарова ӆэщӑтӑс. 

Щи поступсы 2022-мит па 2023-2024-мит оӆӑтн Югра мўвев хўваттыйн мир лекщитты щира тухӆӑӊ хопӑт ӊхты вєр пӑта вєрсы.    

 Мўӊ ӆӑӊхаӆўв, ӆәӆн округ мирев мосты пу­райн ма па сорашӑк ат лекщитсыйт, − лупӑс округ кәща нє.

Па и суртӑӊ айкеӆ мўӊ хущева юхтӑс. Вәйт ӆор тыӆӑщ 23-мит хӑтӆӑн Ас-угорской институтн рәпитум хӑнты нє Елена Павловна Степанова (Рябчикова) ӑнтәма йис. 

Тӑм оӆ оӆӊитумн округев социальной страхования тӑхийн ӆыв саттэӆа вєрӑт тәты 784 хуят нух хӑншаньщсӑт. Щит тәняӆ оӆ киньщи ищимӑщ тыӆӑщ мӑр 29% ар питӆ. Мєт ар ӆўв саттэӆа вєр тәты хуят Сәрханӆ, Нижневартовск вошӊӑн па щӑта вәӆты районӑт хущи вәӆ. Ёмвошн па тӑм оӆ 55 йиӆуп тӑхи ёх хӑншаньщсӑт. 

Щимӑщ нєм хӑнты мир моньщӑт хӑншты, айкеӆӑт ӑкӑтты хә Владимир Енов вәйтантупсы тӑйс. Щит мўвтєӆ шуши мир мӑӊхӑтӆ еӆпийн Ёмвошӑӊ киникайт ӆўӊӑтты хотн вәс.

Киникайт мӑты нє Лю­бовь Коробици­на вўща вєрман лупӑс:

Югра мўв кәща нє Наталья Комарова округ няврємӑт вәнӆтӑты ёх вән мирхот пўншӑс.

Щит вәйт ӆор тыӆӑщ 25-мит хӑтӆӑн Сәр­ханӆ государственной университет хуща онлайн щирн пўншсы. Щи мирхота округ районӑт па вошӑт вәнӆтӑты ёх па щи вєрӑт тәты вәтаӊ хуятӑт онлайн щирн вантсӑт па путӑртсӑт.

Вәйт ӆор тыӆӑщ 24-мит хӑтӆӑн «Югра» нємпи айкеӆӑт ӑкӑтты хотн вәйтантупсы вәс. Щӑта путӑр мӑнӑс, хутыса еӆӆы Югра мўвева юхăтты мойӊ ёх пӑта әмӑщ рўтьщӑты вєрӑт ӆэщӑтты щирăта вәнӆтăты питӆыйт. 

Тӑта мосванӑн Юг­ра мўв кәщайт мирхот вєрсӑт, хута путӑртсӑт, муй щирн шуши мирӑт нух хӑншты мосӆ, ӆәӆн арсыр вєрн ӆывеӆа нётты.

Щи пӑта округ кәща Н. Комарова лупӑс: 

- Кашӑӊ хӑннєхә шуши мир эвӑӆт мўӊева нух хӑншты мосӆ, ӆәӆн м­сыева вәйтты, мӑта хуят па муйсӑр тӑхийн вәӆ па рәпитӆ. Щи пурайн веӆщи уша вєрӆўв, муй щирн сыр-сыр вәӆты-хоӆты щирӑт ӆыв хущеӆа мӑнӆӑт па муй щирн ӆывеӆа нётты вєритӆўв.

Россия мўв президент поступсы щирн лыпӑт хойты тыӆӑщ оӆӑӊмит хӑтӆ вўш эвӑӆт нивӆ тӑӆ вәнты кӑшаӊ няврємӑт пиӆа юӆн омӑсты ӑӊкета муй па ащета йиӆуп щирн больничной вухӑт сухуптӑты питӆыйт.

Щит 100% тыӆӑщ мӑр вўты вух эвӑӆт па интӑм ӑн вантӆы, муй арат оӆ ӑӊки муй ащи рәпитӑс, муй щирн па муй арат мӑр няврєм ӆекщитӆы. Тӑмӑщ сухуптӑты вєр айӆат ӑӊкет-ащет пӑта вән нётупсыя питӆ.