Сўмӑтвош район пәьница хотн хәумъяң мутас о Вера Владимировна Баранова вән тохтўра рәпит. Ин ўв яң о мӑр щи мир екщитты тӑхи кәща ӑңкӑр нєңа вә. Ма ўв пиэа нємасыя вәйтантыйсум па рәпатай оӑңӑн айке вўсум.
– Вера Владимировна, муй арат ай па вән тохтўр нын районӑн вәты пәьница хотӑтн рәпит?
– Мўң пәьницайўв хущи араттєн район уватн нивӑсот ай ярсот хәум хӑннєхә мир ямӑман вә па рәпит. Щи ёхўв эвӑт ай ярсот и хуят – щит вән тохтўрӑт, апӑтсот мутас ыв эвӑтэа ай леккара рәпитты ёх. Тӑм районной мир екщитты хотэв тумпийн кимит район щирн ўңтӑсты пәьница хот Игрим вошн па тӑйўв. Сўмӑтвош район уватн вәты айшак кәртӑң хуятӑт мәша ямӑты пӑта иса кӑт тӑхия хӑншман вәӑт. Вантэ, ай кәрт пәьницайн хӑннєхә мәш екщитты ӑн ки вєрита, ўв Игрима муй тыв, Сўмӑтвоша, мўң хущева кита.
– Муйсӑр екщитты тӑхет нын тӑйаты?
– Мўң терапевтической, хирургической, инфекционной, родильной па детской отделенияйт тӑйўв, хута мәшӑң хӑннєхуятӑт ямӑтыйты вєритӑт. Щи тумпийн «Скорая помощь» щирн рәпитты тӑхет тӑта, Сўмӑтвошн, щӑта Игримӑн па Саранпаульн па вәӑт.
– Вера Владимировна, муйсӑр авӑрт вєрӑт нын рәпатайн хуща икумтӑт па муй щирн щитӑт эщӑтӑты?
– Саранпауль вошн участковой пәьница хот тӑйўв, хута итәх тохтурӑт иса ӑнтәмӑт. Щит пӑта тӑта мосванӑн ай няврємӑт екщитты тохтўр нє «врач общей практики» щирн вәнтыйты пӑртсўв. Тӑмхӑт нємасыя арсыр тӑхетн вәты хӑннєхуятӑт пиа картке хўват путрємӑўв, ән ыв мўң пәьницайўва рәпитты ат юхӑтсӑт. Тӑм кўтн Саранпауль вошн мир ямӑты пӑта па кӑт вән тохтўр мўңева мос. Щи нуша вєрэв тумпийн арсыр нє мәшӑт екщитты леккар па ӑн тӑйўв. Щӑта Сўмӑтвош пәьницаев хущи терапевтической отделения кәща хә мущӑтты ӑн вєритўв. Ай няврєм мәшӑт ямӑтыйты пӑта йиуп тӑхи тӑта пўншты ӑңхаўв, ән щӑта Тєк, Пәкӑр, Устрём па Шайтанка кәртӑтн вәты хӑннєхуятӑт ай ёха ат екщитсӑт. Щи пурайн мўң район пәьницаев тохтўрӑта кўшкєпа еша кєншӑк рәпитты пит. Ин, вантэ, щимӑщ вуаң вєр эщӑтты пӑта вән леккарн ӑн тӑрумыюв. Хӑннєхуятӑт ән рәпата ропӑхн ищипа тыв юхӑтсӑт. Тәп щи вєр мўң хущева вевтам, хән тӑта ыве вәты хотӑтн мӑты щир ӑн тӑйўв. Тӑмхӑт хәум вән тохтўр ай няврєма садика ӑн вўыйт, вантэ, щӑта мутас тӑхи иса ӑнтәм. Ай леккарӑт пиа мўң щимӑщ нушайт ӑн па вантўв. Ар пєлӑк ыв эвӑтэ тӑм Сўмӑтвош районэв хущи сєма питум хӑннєхуятӑт.
– Нӑң ин, апа, лупты вєритӑн, сӑмӑңа муй кашы арсыр тохтўрӑт нын районӑна рәпитты юхӑтӑт?
– Ма нәмӑстємн, ар пєлӑк хӑннєхә мәш ямӑ-ты ёх ищипа кашы тыв йиӑт. И пєлӑк эвӑт, вантэ, районэв шєңк вән па тывет-тухет ай кәртӑт эвӑт вән вошӑта питты нємасыя вєрум ӛш ӑнтәм. Щӑта ай тухӑң хопӑтн муты тӑхия мӑн-
ты ищи вєра тынӑң. Тәп
хән тӑ ӛш ямсыева э-щӑта, щи пурайн веьщи хӑннєхуятӑт арсыр ыве мосты тӑхета питӑт.
– Вера Владимировна, нын Сўмӑтвош районӑн хущи вәты пәьницаита Узбекистан, Азербайджан муй па хон пєлкӑт эвӑт вән тохтўрӑт юхӑтӑт рәпитты муй ӑнтә?
– Ӑнтә. Щимӑщ вєр юхи хӑщум оӑтн ӑн па вәс.
– Санзадание щирн мәшӑң хуятӑт нын хущана муй па пәьница хотӑта, апа, ищиты тәтьяыйт?
– Санзадание вә щи.
Ар пєлӑк щимӑщ авӑрт мәш вєр участковой пәьницаитн тыв. Щи вє-рӑн мўңева округ эвӑт вәты «Центр медицины и катастроф» тӑта нёт. Мўң ыв пиэа ям хўв кўт вўш эвӑт рәпитўв па итәх пурайн тӑта Ёмвоша мәшӑң ёх тәӑт.
– Вера Владимировна, муй арат хӑннєхә нын Сўмӑтвош район пәьницайн хущи мәша ямӑтыйты вєрит?
– Мўң пәьницаевӑн араттєн ай ярсот хәт хуят екщит. Щи тумпийн ат-хӑт рәпитты стационар тӑйўв, хута па сот кӑт хӑннєхә ямӑтый-ты вєритӑт. Тӑӑңтєн хәумсот хәтъяң хуятые тӑта иса екщитый.
– Муйсӑр мәшӑт ар пєлӑк нын хущана питты хуятӑт тӑйӑт?
– Мўң хущева екщитты ёх кўтн вєра ар ёх хән сўвойт, рўщ щирн описторхоз, тӑйӑт. Щӑта щи тумпийн па арсыр мәш вєрӑт икўмтӑт.
– Мӑта тӑхи эвӑт нын район пәьницайн нётупсыйн мӑы?
– Емвош округев здравоохранения департамент шєңк вуаңа нётӑс па тӑм ванӑн флюромобиль мўңева әтӑс. Щит пӑта хән тӑ ӛшӑт ямашӑк вєрыйт, мўң вєритўв район хўвӑт яңхты па хӑннєхә турӑх мәшӑт ямсыева артаӑты.
– Пәмащипа нӑңена, Вера Владимировна, тӑм айкеӑн пӑта, тӑаң ёш па тӑаң кўр нӑңена!
