Павел лупӑс, 2004-мит он нумӑс вєрӑс йис арӑт тӑм йисн арӑт пиа питащты па йиуп щирн ариты. Хәум о мӑнум юпийн «H-Ural» группа тывӑс. ыв 2008-мит он веьщи мир епийн ариты питсӑт. Ёмвошн щи он финно-угорской вән мирхот пурайн ыв хӑнты, вухаь арӑт арисӑт.

Сыры ара английской ясӑңӑн хәӑнтсыйт, вантэ, ну-мӑс тӑйсы па хон пєлак мўвӑтн вәты ёх пӑты ариты. Еы Павел щи-ты лупӑс: «Имутыйн нумӑсн юхтӑсыюм, мўң Кев хуща кӑт шуши мирңӑн кўтн вәўв, мос хӑнты, вухаь ясӑңңӑнӑн арӑт ариты». Гитара нарӑсъюхн юнтты хә Лозьва юхан хонӑңӑн вәты вухаят хущи яңхӑс, арӑт хӑншӑс, итәх ясңӑт вәнтӑс. Екатеринбург вошн вәнтыйты айат хӑнтэт пиа вәтӑңа йисӑт. Юридической академияйн вәнтыйты эви Ольга Озелова ыве хӑнты ясӑңа вәнтӑты питӑс, арсыр киникайт мӑс. ўв ӑңке Зоя Дмитриевна Озелова ищи итәх йис арӑт тәса рўщ ясӑңа тулмащтӑты нёт. Вухаь ясӑңа тәп нєпекӑт хўват вәнтыйӑт.

Ям арат о юхы «H-Ural» группа ёх па хон пєлӑк Финляндия мўва яңхсӑт, щӑта хӑнты мир учёной нє Татьяна Волдина пиа вәтӑңа йисӑт. ўв ищи айат ёха ӑңке, хӑнты поэтесса Мария Вагатова стиха па ара пиа киника мойӑс. Щи тумпийн хӑнты арӑт кӑншты нёт. Щиты «H-Ural» ёх Ас хӑнты мир арӑт ищи арисӑт па диска нух хӑншсӑт.

Ма щирємӑн, ыв ара мєт сыры хӑнтэта па вухаята хәӑнтты мос, щирн иньщӑссум, Ёмвош тухапи па вошӑта муй кәртӑта яңхты нумас тӑйӑт муй ӑнтә? Юхы Павел лупӑс: «Па муй. Тыв юхӑттєм епийн ма Ямал па Югра мўвңӑн вошӑт кәщайта пищмайт хӑншсум, ән арсыр емӑңхӑтӑта ат вохсӑт. Ин Сўмӑтвоша вухаь куащты хә Руслан Проводников эщӑтум кӑсупсыя яңхсум. Еы нәмӑсўв Пуңавӑт, Йиуп Уренгой па па вошӑта яңхты. Тӑм йисн айат хӑнтэт, вухаят интернет хўват вєритӑт мўң етнхотўв вантты, арўв хәӑнтты».

Ӛхӑт ма иньщӑссум, хутыса ыв «Евровидения» ариты ёх кӑсупсыя китум «Revontulet» («Увӑс тәрум тўт») ар хӑншсӑт. Ипуяң Петрозаводск вошн «Музыкальный инкубатор» нємпи вәнтӑты мирхот мӑнӑс, щӑта Павел финно-угрӑт пиа вәтӑңа йис. Щи тумпийн ўв ищи ӑктащум ёх вәнтӑс, муй щирн йис культура вєрӑт еы тәты ёх пӑты вух кӑншты мос. Щи вән мирхот пурайн йиуп әхӑса пиа нумӑс вєрӑс арсыр финно-угорской ясңӑтн щирн ар хӑншты. Еы щиты лупий:

– Мєт сыры финно-угорской 12 ясӑң щирн хӑншсўв, тәп щит шєңк хўв ар тывӑс, щирн тәп хәт ясӑңӑн вєрсэв. Вантэ, «Евровидение» пӑты 3-4 минута хўват ар мос. Йипа Петрозаводск воша ӑктащсўв па щи ар студияйн нух хӑншсўв па кӑсупсыя китсўв, тәп полуфинал вәнты йисўв. Шаь, хуты мўң арев ӑн пирисы. Ияха ӑктащман «Ибица» нємпи кӑсупсыя Коми мўва яңхсўв па 2,5 щос мӑр арисўв. Щи пурайн па хон пєлӑк Эстония па Финляндия ариты ёх юхтыйсӑт, щирн яң ясӑңӑн арисўв. Ин финно-угрӑтн тӑм ар «Финно-угрӑт гимн» нємн мӑсы. Щиты ияха Ёмвошн ариты мос, вантэ, тӑм арн мєт вуаң хӑннєхә - щит хӑнты хә, ўв иса финно-угрӑт моиңа вох, вєритўв финно-угорской яң ясӑңӑн ариты.

Емӑңхӑт пурайн «H-Ural» ариты ёх ня ар арисӑт, и ут вухаь ясӑңӑн, хӑнты ясӑңӑн «Вурңа ар» хәӑнтсўв. Мос ястӑты, хӑнты мир «Вурңа ар» ар эвӑт рок ара вєрсы.

Мӑнєма әмӑщ вәс вәты, мӑта ёх ыв ариты ёха пӑты увӑс мир хӑншет пиа әмӑтсухӑт ёнтат. Екатеринбург вошн, нєш, айат модельер нє вә, щит Светлана Тетерина. ўв щи вєра вәнтума мӑр увӑс мирӑт хӑншет пиа тӑм йис әмӑтсухат ёнтты оӑңӑн дипломной нєпек хӑншӑс. Щирн итәх әмӑтсухӑт ўв нєпека хӑншӑс па ёнтӑс. Ин Ёмвошӑң сорни ёшпи ими Ульяна Шульгина тӑм икия ермак ернас ёнтӑ.

Ювоӑңӑн Павел йиуп вєра оӑңӑн ай тәс. Кимит диск пӑты рок арӑт хӑншыйт, ин нумӑс тӑйӑт, муйсӑр рок арӑт хәмит диска пунты.

Айат ёх емӑңхӑт пӑты мўң «H-Ural» ёха ям ясңӑт китўв. Вән пәмащипа, хуты нын йис хӑнты па вухаь мирңӑн ясӑңңӑн еы тӑм йис пура арӑт хўват тәаты. Тәса хӑнты муй вухаь щирн ариты пӑты ям нумӑсн шуши мирңаўв культураев, ясӑңңаўв уша вєраты!