– Марина Юрьевна, муйсӑр вєр оӑңӑн нӑң мўң округев «Хӑнты ясӑң» газетаева айке вєрты вєритӑн?

– Сырыя ма айке тәты ӑңхаум, муй щирн тӑм 2014-мит он мўң хоттє ёхўв «Семья года Югры» мӑнум кӑсупсыйн оӑң тӑхия юхӑтсӑт па нух питсӑт. Щи вуаң кӑсупсы юпийн мўң Сенгеповӑт рәт хуятўв «тохтўра вәты щирн» рәпата эщӑтсӑт па  ищи тӑхия вантӑсӑт. Щимӑщ вантупсы пурайн мўң арсыр рўщ  тохтўрӑт кўтн хәмит тӑхия «Самая медицинская династия» щирн  юхӑтсўв. Ин вєритум щиты лупты, хуты хоттє хуятўв хуыева ар о мӑр хӑннєхә мәш вєрӑт ямӑман вәсӑт. Хән па ияха ўңӑтты питсўв, муй арат хуят па муйкєм о тохтўра мўң хотэв эвӑт вәс, щит  уша йис, хуты Сенгеповӑт хоттє ёх араттєн хӑннєхә сыр-сыр мәшӑт  ямӑман сот ай ярсот вет о мӑр вещката па яма рәпитсӑт. Мўң рәт ёхўв, вантэ, ар пєлӑк Сәрхан районӑн па Ёмвош округев уватн ищиты ар тӑхетн тохтўрӑта рәпитман вәсӑт па ин тӑмхӑт вәнта па ищиты рәпитӑт. 

– Марина Юрьевна, нӑң ай пура оӑн оӑңӑн мӑтты айке вєра?

– Ма ӑңкєм – Октябрина Петровна, ащєм – Юрий  Николаевич Сенгеповӑт. Сыры оӑтн ын Тромаган кәртӑн вәсңӑн. Рәт щирн мўң Кещи юхан ёха Касум мўв хӑнтэта ўңтӑсўв. Ма тӑм Сытомино кәртэвн айтєн єнумсум, тӑта ӑшколайн вәнтыйсум. Ӛхӑт, 1981-мит он, ма Ёмвош медучилищая мӑнсум. Щӑта 1983-мит он щи вәнтӑты тӑхєм етшуптӑсєм па Нижневартовск воша рәпитты китсыюм. 

– Муй пӑта нӑң ай тохтўра вәнтыйты нумӑс вєрсӑн? 

– Ӑңкєм вәупсы хўват хӑннєхә арсыр мәшӑт ямӑман вәс. Ма па ищиты айтєн юнтты вой хурасам екщитман юнтсум. Ӛхӑт, ӑшкола етшуптумємн шєңк хўв ӑн нәмӑссум па медучилищая щи мӑнсум. Ин юхи хӑщум оӑтн ма пенсияйн вәум па кәртӑң хӑннєхуятам ищиты ма хущєма уколӑт оньщты па арсыр пуртәнӑт екщитты вєр оӑңӑн иньщӑсты юхтыйӑт па тәп вән пәмащипа лупӑт. Щиты вєритты кємн ёхама кўшкєпа муртӑң унтас тәум. 

– Марина Юрьевна, нӑң хоттє ёхан оӑңӑн мӑтты  айке тўва? 

– Ма икєм пиа ня няврєм тӑйум: кӑт эви па кӑт пух. Мўң няврємўв мәш ямӑты щира, мўң итэва, иса ӑн кӑтӑсӑт. Тәп тӑта мосванӑн мєт ай эвием, ўв ихущъяңмит классӑн ӑшколайн вәнтый, нәмӑсты питӑс, хуты ищиты ай тохтўра рәпитты мос. Ма сырыя щи лупсум, хуты щи арат о Сенгеповӑт хоттє ёх хуятӑт екщитман вәсӑт, щит ма ӑңкєм – хәумъяң о, ма – хәумъяң о рәпитсум, ма ныюм – няъяң вет о, Сәрхан вошн рәпитты упеңаам: итӑ – хәс вет о, кимит упєм – хәумъяң о, щӑта и упєм па 20 о, округев пәьницайн па хӑщум упєм 20 о ай тохтўра вә. Щиты араттєн сот мутас о мўң хоттє хуятўв мир екщитты рәпата тәсӑт. Катра  шуши мир ёхўва арсыр пәьницайт хущи пуртәнӑт ӑ щиты мӑсыйт,  щит шєңк ям вєр вәс. Ин кашӑң мәш ямӑты пӑта Лянтор муй Сәрхан воша яңхты мос, щит пӑта тӑм йисн ывеа авӑртшӑк вәты питӑс.

 

Владимир НОСКИН