Лыпӑт хойты тылӑщ 27-29-мит хӑтӆӑтн Нуви сӑӊхум вошн округев эвӑӆт апрӑӊ, оса па ӆыв саттэӆа рәпата тәты ёх мирхота ӑктӑщийӆсӑт. Ӆыв хәӆум хӑтӆ мӑр вәнӆтыйӆсӑт па кўтэӆн путӑртсӑт, муй вєрты ӆўв саттэӆа вєр тӑйты хуята йиты ӆӑӊхаты хәя-нєӊа, ӆәӆн грант нётупсы вух ёша павӑтты. Тӑм мосты мирхот «Нумсӑӊ ёх» нємпи тӑхи хуятӑт унтасн ӆэщӑтсы. 

Сырыя вәнӆтӑты хӑра ӑктӑщум мир грант вєр оӆӑӊӑн ма хәӆӑнт­сӑт, муйсӑр нєпекӑт щив ӑкӑтты мосӆ, хутыса вохты нєпек тәса хӑншты па па сыр-сыр мосты вєрӑт нух вантсӑт. Тӑта рӑхӆ лупты, хуты тӑм вәнӆтӑты хӑр ӆэщӑтты щира «Нумсӑӊ ёх» нємпи тӑхи ёх ищиты Югра мўв губернатор грант нётупсы вух ёша павӑтсӑт.

Хәӆум хӑтӆ мӑр ӑк­тӑщум ёх арсыр щирн вәнӆтыйӆсӑт, сыр-сыр партупсэт вєрсӑт па ӆыв саттэӆа вєр ма тӑйты хуятӑт пиӆа вәтаӊа йисӑт. Щит Мария Тищенко, Ва­лентина Ирган па Анна Истомина.

М. Тищенко 21 оӆ мӑр Лыхминской ӑшколайн няврємӑт вәнӆтуман вәс.
Имуӆтыйн хоттєӆ ёхӆаӆ пиӆа Нуви сӑӊхум воша касӆӑс па ӑшкола кана социальной вєрӑт тәты тӑхия рәпитты мӑнӑс. Юхи хӑщум оӆӑтн «Благостыня» нємпи ӆўв саттэӆа тӑйты вєр пўншӑс. Благостыня – щит вәӆты-хоӆты тӑхи такӆы ёх пӑта вәӆты хот, хута и оӆ кєм вәӆты-хоӆты рӑхӆ. Оӆ мӑр Нуви сӑӊхум мўв кәща С. Маненков катра общежитие мӑс, тәп ӆыпийн мосӑс хот йитӑт йиӆпатты па сыстамтты. Щиты айӆтыева вєр еӆӆы щи мӑнӑс.

Интӑм «Благостыня» хуща 23 нўшайӊ хӑннє­хә вәӆ. Ӆыв щӑта пси­хо­логической, юридичес­кой щирн нётӆыйт, мӑӆт­ӆыйт па лекщитӆыйт, ӆәмӑтсухн ӆәмӑӆтӑӆыйт па иса муй мосӆ тўӊматты нётӆыйт.

Мария Владимировна ясӑӊӆаӆ щирн, итәх пу­райн щикўш ӆавӑрта йиӆ, щом иса ӑнтәм, м, хуты хот­тєӆ ёх – икеӆ па пухӆ, кўш тәс ясӑӊӑн, кўш вєрн иса нётӆӑӊӑн. Щи пӑта айӆтыева иха катӆӑсман тӑм мосты вєр еӆӆы щи тәӆӑт. 

Еӆӆы В. Ирган па А. Ис­томина айкеӆ тәсӊӑн, муй­сӑр ӆавӑрт суртӑт ӆыв ху­щана єтсӑт. Уша йис, ӆўв саттєӆа вєр пўншты еӆ­пийн мєт сырыя мосӆ нє­масыя поступсэт тәса нух вантты па ӆўӊӑтты, ӆәӆн мосты нєпекӑт ӑкӑтты пурайн сыр-сыр нўша вєр ӑн єтӑс.

Щи пийн мирхота ӑктӑщум ёх «Увӑс вотас» нємуп хот войт ӆавӑӆты тӑхия тәсыйт. Тӑм тӑхи кӑ­ши-мәш тӑйты няврємӑт па мәшӑӊ хуятӑт пӑта Е. Ка­нева пўншӑс. Вантэ, ӆов шӑншийн хӑтӑтьӆяты пу­райн мәшӑӊ хӑннєхуята кєншӑка йиӆ. 

Тӑта рәпитты нє Е. Усю­кевич айкеӆ тәс, тыв рә­питты ӆўв 2016-мит оӆн юхтӑс. Тӑӆантєӆн няв­рємӑт пиӆа па ӆов шӑн­шийн хӑтӑтьӆяты вєра вәнӆтӑты ёх, щи кўтн па войт єнмӑӆты хәйт, иха ӆўӊӑтты ки, ӆапӑт хӑн­нєхә питӆ. Рәпатнекӑт ка­шӑӊ оӆ Челябинск вошн ӆовн ӊхты вєра йиӆпа вәнӆтӑӆыйт. Вантэ, кашӑӊ пўш арсыр йиӆуп щирӑт няврємӑт вәнӆтӑты пу­райн ӆэщӑтӆыйт. Щирн нємасыя нєпек йиӆпа вәнӆ­тӑты вєр оӆӑӊӑн ищи­па мосӆ.

Еӆӆы хӑтӆӑн аӆӑӊ саты ищи вәнӆтӑты хӑр вєрсы. Щӑта иха ӑктӑщум нєӊӑт-хәйт сӑмӆаӆн тәтьӆяты нумсӑт оӆӑӊӑн путӑртсӑт. Итәх ёх ӆӑӊхасӑт катра ай кәртыет йиӆпатты, ӆәӆн щив хоттєӆ ёх пиӆа рўтьщӑты щира мӑнты. Тәх хуятӑт вәнт шушийн рўтьщӑты тӑхи пўншты ӆӑӊхасӑт, ӆәӆн рўтьщӑты вєр тумпийн вой-хўӆ веӆпӑсӆӑты, воньщумут па тулӑх ӑкӑтты па па шуши мир йис вєрӑта вәнӆтыйӆты.

И хәие тўтӑӊ хоп омӑс­ты вєр оӆӑӊӑн лупӑс, ӆәӆн ай кәртыет хўват мойӊа ӊхты щир ат вәс. Па вошӑӊ нє ёнтӑсты имет пӑта нємасыя кафе тӑхи пўншты ӆӑӊхас, ӆәӆн щив юхӑттэӆн ёнтӑсты машинка вўты па муй мосӆ, щит имухты ёнтты рӑхӑс. Па ики картэт ӆуӆты па сыр-сыр карты пурмӑсӑт вєрты тӑхи ӆэщӑтты вєр оӆӑӊӑн айкеӆ тәс. И айӆат нєӊие мойӊа юхтум ёха вәнтӑт хўват шәшийӆты вєр ванӆтӑс. Ӆәӆн вәнтӑн ӑнтә тәп сыстам ӆыӆн ӆаӆты, имухты воньщумут па па єнумты ут ӑкӑтты.

Тӑм нумсӑӊ вәнӆтӑты хӑр ӆэщӑтум нєӊӊӑн Е. Фе­дотова па М. Кабакова ка­шӑӊ хуята юхӆы лупсӑт, муй вєрты мосӆ, ӆәӆн нум­сӑт еӆӆы м па тәс вєрӑта ат тывсӑт. 
Тӑм вәнӆтӑты хӑр «Нумсӑӊ ёх» тӑхи хуятӑт па «Югра ӆыӆӊуптӑты» оса тӑхи ёх унтасн тывӑс.

Тамара Мерова 
ясӊӑт хўват хӑншӑс:
Ирина Пословская