Югорской экономической форум унтасн, мӑта ут Ас потты тыӆӑщ 18-мит хӑтӑӆн пўншсы, Ёмвошн кимит мирхот «Муй щирн Россия хон пєлӑк еӆӆы вәӆты па рәпитты питӆ» ӆэщӑтсы.

Видеоконференция щирн ӆэщӑтум вән мирхотн Российской Фе­дерация экономика вєрӑт тәты министр хә Максим Решетников, Уральской округн Россия Президент вєрӑт ӆэщӑтты ӆӑӊкӑр хә Артём Жога па Югра мўв кәща хә Руслан Кухарук тӑта вәсӊӑн па ӆыв кўтэӆн рәпитсӑт.

Максим Решетников путӑртӑс, хуты Россия мўв кәщайт нәмӑсӆӑт, муй щирн па хуты еӆӆы ӑӆ хӑннєхуятӑт вәӆупсы щирӑт кєншӑка па машӑк ӆэщӑттыя. Ӆўв ясӑӊӆаӆ щирн, ӆәӆн кашӑӊ хӑннєхә мўӊ хущева ма еӆӆы ат вәс, нўша вєрӑт ӑн вантӑс. 

Щӑӆта Артём Жога лу­пӑс, хуты тӑм йисн шєӊк ар сыр-сыр ӆєтут иса па хон пєлӑк мўвӑт эвӑӆт тыв тәӆы па тӑта еӆ тыныӆы. Тӑта ки аршӑк щи ӆєтут ӆэщӑтты, щит ӆәӆн па мўв эвӑӆт тыв иса нємуӆты ӑн па тәсўв. Щи вєрӑт тум­пийн Урал мўв округн промышленность тӑхи хуща тӑмхӑтӆ 40 муӆтас щурӑс хӑннєхә рәпиттыя ӑн па тӑрмӑӆ. Тӑм йисн аршӑк машинайт муйт иса вєрты мосӆ, наука щирн йиӆуп вєрӑт вєрты.

Еӆӆы Югра мўв кәща хә Руслан Кухарук айкеӆ вєрӑс, хуты кашӑӊ округн вєрӑт ма ки мӑнӆӑт, щит Россия хон пєлкев ищиты ма па тащӑӊа вәӆты питӆ. Лўв ясӑӊӆаӆ щирн, Екатеринбург вўш эвӑӆт па Ямал мўв вәнты карты әхӆӑӊ ӛшӑт «Полуночное – Обская – Салехард» па вєрты мосӆ. Щи кўтн, вантэ, кєншӑка йиӆ що­рӑс вәнты тывеӆт-тухеӆт мсыева ӊхты па сыр-сыр пурмӑсӑт муй ӆєтутӑт тәтьӆяты.

Югорской экономичес­кой форум Ёмвошн Ас потты тыӆӑщ 18-мит хӑтӆ вўш эвӑӆт па иса 21-мит хӑтӆ вәнты мӑнты питӆ. Арсыр тынєсты-ӆәтӑсты хӑрӑтн рәпитты хәйт-нєӊӑт, вән кәщайт па 40-кєм рәпитты тӑхет сыр-сыр ай па вән аӆисупсэт муй ванӆтупсэт ӆэщӑтсӑт. 

Хӑнты ясӑӊа тулмащтӑс: 
Владимир Носкин