Щи оӆӑӊӑн путӑртсӑт «Еӆ вәӆупсы: шуши мирӑт м вәӆупсы ӆэщӑтты вєр» нємпи вән мирхот пурайн, щит Ас потты тыӆӑщ 12-13-мит хӑтӆӊӑнӑн Ёмвошн мӑнӑс. Ӑктӑщум ёх путӑртсӑт щи оӆӑӊӑн, хутыса округевн вәӆты шуши мирӑт интӑм кәща ёхӆўвн нётӆыйт па муйсӑр йиӆуп нётупсэт ӆыв пӑтэӆа вєрты мосӆ.  

Мирхота сот муӆтас хӑннєхә округ ар­сыр вошӑт, кәртӑт эвӑӆт юхӑтсӑт, щит хӑнты па ву­хаӆь ёх, шуши мир вє­рӑт тўӊматман рәпитты хуя­тӑт. Оӆӑӊмит хӑтӆӑн Рос­сия сенатор хә Александр Новьюхов шуши мирӑта вўща ясӑӊ лупӑс:

 Кӑт оӆ мӑнӑс щи пура вўш эвӑӆт, хән мўӊ ищи­ты вәйтантыйӆсўв. Муй оӆӑӊӑн щӑта путӑртсўв, ин щи вєрӑт кәща ёхӆўвн тәӆыйт, шуши мирӑт щи вєр хўват нётӆыйт. Ма щирємн, мєт м, тӑта кәща ёх па шуши мирӑт иха вәйтантыйӆӆӑт, и пӑсанӑн омӑсман, и ӛрн, и нумӑсн рәпитӆӑт. Щи пийн м па мосты поступсэт тывӆӑт. 

Округ дума кәща ӆӑӊкӑр хә, шуши мирӑт ассамблея кәща Еремей Айпин лупӑс, хуты щит шуши мирӑт пӑта мосты па вуӆаӊ мирхот. Щӑӆта лупӑс, еӆӆы мосӆ тәса вантты, ӆәӆн шуши мирӑт мосты рәпатая вәнӆтыйӆты ат нётӆыйт, ӆәӆн мўӊ мўвевн рәпитты ёх рәт мир ясӑӊ, культура, йис вәӆупсы ма ат вәйтсӑт. 

Еремей Данилович ясӑӊӆаӆ щирн, мосӆ, ӆәӆн шуши ёх культура па йис вәӆупсы вєрӑт тәса вантман ат тӑйӆыйт. Сыры щи вєрӑт вантман «Северный фонд» тӑхи рәпитӑс. Округевн кашӑӊ районӑн щи тӑхи вәс, хута шуши ёх юхтыйӆты па нўшайӆаӆ тўӊматты щир тӑйсӑт. Щӑӆта «Кор­порация общин» тӑхи вәс, щӑта рәпитты ёх хӑнты па вухаӆь хуятӑта вой-хўӆ веӆпӑсӆӑты вєрӆаӆ тўӊматты нётсӑт. Культура, шуши мир йис вєрӑт, вәнт кәртӑтн вәӆты ёх вєрӆаӆ тәса вантман шуши мир департамент рәпитӑс. Иса щи вєрӑт еӆӆы ищиты вантман тӑйты мосӆ, ӆәӆн шуши мирев йис вәӆупсы ӆавӑӆты па еӆӆы тәты.
Айӆат ёх вєрӑт па внеш­ней связят департа­мент хуща шуши мир вєрӑт тәты тӑхи кәща хә С. Пишуков лупӑс, хуты тӑм­хӑтӆ оса тӑ­хет ёх, общинайт, кашӑӊ вошн ӆыв вєрӆаӆ вантман рәпитты кәща ёх кўтэӆн путӑртсӑт, уша павӑтсӑт, хутыса еӆӆы шу­ши мир вєрӑт вантман рәпитты. 

Кӑт хӑтӆ мӑр юхтум ёх иха рәпитсӑт. Ӆыв уша павӑтсӑт, интӑм шуши мир пӑта округевн 30 муӆ­тас поступсы хӑншман вәӆ, щитӑт әхтыйн шуши мирӑт нётлыйт. Кашӑӊ вєр оӆӑӊӑн ӆыв тәса пу­тӑртсӑт. Уша вєрсӑт, хуты итәх поступсэт иса ӑн рә­питӆӑт, щит вәнтӑн ӑкӑтты воньщумутӑт, тулхӑт эвӑӆт єпӆаӊ ӆєтутӑт вєрты пӑта вухӑӊ нётупсы, шуши мирӑта вәӆты хотӑт ӆәтты пӑта субсидия вухӑт па па вєрӑт. Итәх поступсэт шуши мирӑт кўтн ма тӑйӆыйт, щи утӑт хўват ӆыв вухн ма нётӆыйт, щит арсыр мосты вєрӑта округ кәщайн миюм грант вухӑт, айӆат ёх коллед­жӑтн муй университетӑтн вәнӆтыйӆты вєр пӑта миюм нётупсы вухӑт па па нётупсэт. Юхтум мир ӆӑӊхаӆӑт, ӆәӆн еӆӆы вў­ӆы ӆавӑӆты айӆат ёх, шу­ши мир няврємӑт пӑта рўтьщӑты тӑхет вєрум ёх вухн ищи ат нётӆыйт, шуши мир вәӆупсы ӆавӑӆты щи­ра ищи йиӆуп поступсэт ат вєрсыйт, интӑм вәӆты субсидия вухӑт вәнашӑка ат вєрсыйт.
Округ кәща ӆӑӊкӑр нє Наталья Огородникова мирхотн ищи шуши хуя­тӑт пиӆа путӑртӑс. Ӆўв ясӑӊӆаӆ щирн, округ кә­ща хә Руслан Кухарук шу­ши мир вєрӑт тәса вант­ман тӑйты питӆ, щирн ин мосӆ иса нўшайт тәса вант­ты па мосты вєрӑт пӑ­та поступсэт ӆэщӑтты. Н. Огородникова лупӑс, интӑм вәӆты поступсэт мосӆ йиӆпатты, ӆәӆн ка­шӑӊ шуши хуята кєншӑк нётупсы вўты ат вәс, округ ӆуваттыйн вўӆы нух вўты тӑхет, хўӆ, воньщумут, тулӑх вўты тӑхет вєрты па вўӆы нюхия, хўӆӑта вонь­щумутӑта м тын мӑты, щӑӆта щи тынӑн шуши ёх вухн мӑты питӆыйт. Ӆўв лупӑс, хуты округевн вєрты пурмӑсӑт, ӆєтутӑт и нємн пунты мосӆ, рўщ щирн «бренд» вєрты, щиты арсыр мўвӑта тыныты кєнашӑк питӆ. 
Касум вошн «Касум ёх» тӑхи кәщая вәӆты нє Елена Федотова мирхотн лупӑс, хуты шуши ёх пӑта щимӑщ мирхот шєӊк мәстӑӆ. Ин йиӆуп нумсӑт нєпека тәса ки пунӆыйт, шуши мир вәӆупсы машӑка йиӆ, мўӊ мирев йис вєрӑт ма ӆавӑӆӆыйт па еӆӆы тәты питӆыйт.

Путӑр хӑншӑс: 
Надежда Рагимова