Хӑнты ими Мария Григорьевна Эккерт (Молданова) тӑм ванӑн Ас потты тыӆӑщ 8-мит хӑтӆӑн Агинской кәрт Бурятс­кой округ Забайкальской край хуща ӊхӑс. 

Щӑта «Опращӆўв сорни сухум» нємпи V-мит Мўвтєӆ мир хурамӑӊ ӆәмӑтсухӑт ёнтты ёх кӑ­супсы вәс. Щив хурамӑӊ ӆә­мӑт­сухӑт хӑншты па ёнтты 35 хуят Забайкальской край, Бурятия, Ир­кутской область, Ёмвош па па хон пєлӑк Монголия мўв эвӑӆт юхтыйӆсӑт. 
Хӑтӆ мӑр ванӆтупсыйн арта­ӆӑты ёх мсыева нух вантсӑт, муй щирн ӆәмӑтсухӑт ёнтсыйт. Ар­таӆӑты ёх кәща ӆӑӊкӑр хә Рыг­рыз Цыдендоржиев лупӑс: 

- Тӑм кӑсупсыйн мєт тәса ёнтӑс­ты имет ӑктӑщсӑт. Йистєӆн мўӊ оп­ращӆўв м па хурамӑӊ ӆәмӑтсухӑт ёнтсӑт. Кашӑӊ мир ӆәмӑтсухӑта хурамӑӊ хӑншет ёнтӑӆ, щи эвӑӆт уша йиӆ, муйсӑр мўв эвӑӆт тӑм муй тум мир вәӆ. 

Ӛхӑт уша йис – Гран-при мой­ӆупсы Чимицирен Батодалаева ёша хоӆумтӑс. Хӑнты ими Мария Эккерт «Лучшая коллекция других народов: коллекция «Традиция и Современность» нємуп кӑсупсыйн оӆӑӊмит степень лауреата йис. Мосӆ лупты, М.Г. Эккерт 2022-мит оӆ вўш эвӑӆт тӑм кӑсупсыйн кӑсӆ, щи оӆн ӆўв кимит тӑхия питӑс.
Мария Григорьевна, мўӊ нӑӊ пӑтэна амтӑтьӆяӆўв, еӆӆы ищиты хурамӑӊа ёнта, кӑса па нух пита!

Путӑр хӑншӑс: 
Людмила Шульгина