Щимӑщ нєм урок тӑйс, мӑта ут васы мӑнты тыӆӑщ 30-мит хӑтӆӑн Ёмвошн шәкащты няврємӑт тӑйты вєрӑт тәты хотн вәс. Щи урок тӑта рәпитты вәнӆтӑты нє Наталья Попова тәс. Урок пурайн ӆўв няврємӑта ай тәс, муй щирн «Арсыр мирӑт ӆәхсӑӊа вәӆты хӑтӆ» тывӑс, муй щирн Россия мўвевн йистєӆн арсыр мирӑт кўтэӆн ма вәӆ­ӆӑт – щит, вантэ, вән ӛр!

Щи тумпи тӑмхӑтӆ труд урок тәты нє Луиза Мискарян няв­рємӑт пӑта вәнӆтӑты хӑр ӆэщӑтӑс – ӆыв иха мӑӊхӑтӆ пӑта стенгазе­та ӆэщӑтсӑт.
Тӑм хота мӑӊхӑтӆ постӑты пӑта арсыр тӑхетн рәпитты ёх мойӊа юхтыйӆсӑт – щит ар оӆ Ёмвошн рә­питум ёх, Росгвардия тӑхи хуятӑт, округ творчества хот ёх, «Планета детства» нємпи детсад пушхиет па Ёмвошӑӊ ӑшколайтн вән классӑтн вәнӆтыйӆты эвет-пухӑт. Тӑм хот кәщайт па няврємӑт мойӊ ёх ещаӆт рўщ щирн нянь-суӆ пиӆа єтсӑт.   

Тӑмхӑтӆ етнхот вәс. Мєт сыры тӑм хотн вәӆты няврємӑт Олег Газмановӑн хӑншум ар «Вперёд, Россия!» ар арисӑт, щит шєӊк мойӊ ёха мәстӑс. Щи тумпи эвет-пухӑт Россия мўвев, ӆәхсӑӊа вәӆты вєр оӆӑӊӑн стихӑт ӆўӊӑтсӑт. Мойӊа юхтум «Ёмвош ёх» ариты нєӊӑт хӑнты арӑт арисӑт, шуши мир «Кўренька» як яксӑт. Ӛхӑт «Хары бюль-бюль» па «Молодость Кавказа» ёх Кавказ мир якӑт яксӑт. Юхи хӑщум артӑн Рўщ мўвев оӆӑӊӑн ар хәӆӑнтсўв. 
Тӑм хотн вәӆты эвет-пухӑт етнхот вантмеӆн уша вєрсӑт, хуты Россия мўвевн кўтэӆн ӆәхсӑӊа арсыр мирӑт вәӆӆӑт, ӆыв арсыр ясӊӑтн путӑртӆӑт, ӆыв арсыр арӑт па якӑт тӑйӆӑт. Няврємӑт па мойӊ ёх пєӆы ванттємн ма уша вєрсум – ӆывеӆа етнхот шєӊк мәстӑс.
Юхи хӑщум артӑн етнхот ӆэщӑтты ёх ишӑкты нєпекӑт ёша хоӆумсӑт.

Путӑр хӑншӑс: 
Людмила Гурьева