Вән классӑтн вәнӆтыйӆты эвет-пухӑт! Ӑшкола ештуптӑты пийн А.И. Герцен нємпи Российской государственной педагогической университет хуща вәӆты Увӑс мир института вәнӆтыйӆты юхтаты! 

Мўӊ хущева хәӆум­сыр щирн вәнӆ­тыйӆ­ты рӑхӆ: тәрум пӑта, внебюджетной па целевой щирн. Айӆат хуят целевой щирн нємасыя кӑсупсыйн кӑсӆ, щи тумпи вухӑӊ нё­тупсы вантты питӆ па еӆӆы имухты рәпатая вўӆы.
Вәнӆтыйӆты пийн нын бакалавр нєм тӑйты пит­ӆӑты па ипўӆяӊ кӑт вєра вәнӆтӑ­ты вєритӆӑты.
Кӑтсыр бакалавриат ӆэщӑтты поступсы щирн нєпекӑӊ хуят няврємӑт ӑн­тә тәп Увӑс мир рәт ясӑ­ӊа па литературая вәнӆ­тӑты вєритӆ, щи тумпи па хон пєлӑк китайской ясӑӊа. Щит шєӊк мосӆ Дальний Восток мўвӑт пӑта, вантэ, ӆыв Китай мўв пиӆа ванӑн вәӆӆӑт. Юхи хӑщум оӆӑтн Россия мўвев кәщайт Ки­тайской Народной Рес­публика кәщайт пиӆа иха арсыр мосты вєрӑт тәӆӑт, щирн рўщ ясӑӊ эвӑӆт китайской ясӑӊа па юхӆы тулмащтӑты хуятӑт шєӊк мосӆӑт. Щи нєпе­кӑӊ ёх еӆӆы ӑшколайтн, колледжӑтн, культура хотӑтн, айкеӆӑт ӆэщӑтты тӑхетн муй па КНР мўв пиӆа рәпата тӑхетн рәпитты вєритӆӑт. Нєпекӑӊ ёх ӑн­тә тәп няврємӑт вәнӆтӑты вєритӆӑт, щи тумпи еӆӆы наука щирн рәпитты. 
Кимит кӑт­сыр прог­рамма, щит «Ай няврє­мӑт вәнӆтӑты хуят» па «Рәт ясӑӊа, фольклора, литературая вәнӆтӑты хуят». Вәнӆтыйӆты айӆат ёх Санкт-Петербург вошн, Увӑс мўвӑт вошӑтн па кәртӑтн практика тәты питӆӑт.
Хәӆмит кӑтсыр пос­туп­сы, щит «Этнокуль­ту­рологическое образова­ние» па «Допол­ни­тельное образование детей». Тӑм вәнӆтӑты вє­рӑт Увӑс шу­ши мирӑт йис вәӆуп­сы ӆєрамтты научной инс­титутӑт па музеят ёх пи­ӆа тәты питӆӑт. Щи вєрӑта вәнӆтыйӆты айӆат ёх «Увӑс хәс» ариты-якты тӑхия ӊх­ты питӆӑт. Щи нєпекӑӊ ёх еӆӆы няврємӑт шуши мир вєрӑта вәнӆтӑты пит­ӆӑт: шўкщӑты вєра, ари­ты-якты, шуши мир йис вәӆупсы урокӑт тәты.

Зоя Рябчикова,Увӑс мир институтн айӆат ёх вәнӆтӑты нє
Хӑнты ясӑӊа тулмащтӑс: Людмила Гурьева