Ёмвошн Ас потты тыӆӑщн 4-мит хӑтӆӑн, ёх ха пиӆтӑщты мӑӊхӑтӆӑн, «На берегу» арт-резиденция хуща мєт оӆӑӊ пўш вєрӑт уша вєрты «Знание. Первые» ӑктупсы вәс. Россия хуща вәӆты мир сащмӑӆтӑты вєр «Знание. Первые» советӑт вәӆум пурайн вєрты оӆӊитса, ӆўв 1947-мит оӆн тывӑс, щирн «Всесоюзное общество по распространению политических и научных знаний» нєм тӑйс. 

Вән кєр тыӆӑщн 2021-мит оӆн Российской Федерация президент Владимир Путин Россия Федеральной собранияя путӑртум ясӑӊ хуща лупӑс, тӑмӑщ мосты вєрӑт еӆӆы па йиӆпа ӆэщӑтты мосӆ, щит карты щўӊкӑт мухты мир пиӆа путӑртты щира. 
Тӑмӑщ ӑктупсыйн ай­ӆат ёх вән ёх путрӑт хә­ӆӑнтӆӑт, мӑта хуятӑт мєт оӆӑӊ пўш еӆӆы вәӆты вә­ӆупсэӆ оӆӑӊӑн нәмӑсты питсӑт. Тӑта па ӑкумсӑт щи хуятӑт, мӑта ёх м щира рәпитӆӑт, ар вєр уша вєрсӑт па еӆӆы мӑнты пӑнт пєӆа ин вантӆӑт. Сы­рыя шәшты ёх ӑктупсы – щит щимӑщ тӑхи, мӑта тӑхетн арсыр мир айӆат ёх пиӆа ӆыв ма мӑнты вєрӆаӆ оӆӑӊӑн путӑртӆӑт. Щит политика, экономи­ка, промышленность, куль­тура па наука вєрӑт. Тӑм тӑхия 80 хуят путӑртты ӑкумсӑт, щи ясӊӑт 300 хӑннєхә хәӆӑнтсӑт.

Тӑм ӑктупсыя юхтум ёх ещаӆт м вўща ясӑӊ Уральской федеральной округев хуща вәӆты пре­зидентэв пол­номочной хә Артём Жога тӑйс: 

- Мўӊ ар тӑхетн нух питум вєрӑт тӑйӆўв, щит космос, военно-промышленной вєрӑт, ӆєтутӑт па сыр-сыр пурмӑсӑт вєрты тӑ­хетн. Щит иса мирев ӛрн вєрты вєрӆўв, щит сащ тӑйты ёхӆўв ӛрн мўӊ нух питӆўв. Россия пре­зидент поступсы 2021-мит оӆ эвӑӆт «Знание. Пер­вые» вєрӑт мўӊ па щи­ра кєрӑтсўв, щит карты щўӊ­кӑт мухты вєрты пит­сўв. Щит вєра м вєр, йиӆпа єнумты айӆат ёхӆўв тӑм вә­ӆупсыйн ӆыв пӑн­тэӆ вәйтӆӑт: вәнӆтыйӆты вєрӑт – щит вән рәпата. Мўӊ ха пиӆтӑщӆўв – щит иса вєрӑт уша вєрты пӑта, щит айӆат ёхӆўв сащмӑӆтӑты пӑта па сыры вәӆум мирев вєрӑт тӑм вәӆупсыя тәты щира.

Ӑктупсы пўншумн мєт оӆӑӊ ясӑӊ Югра кәща Руслан Кухарук тӑйс. Ӆўв путрум ясӊӑӆ нєм «Ёх пӑта рәпитты – щит кәща мєт вана тӑйты вєрӑӆ». Ӆўв путӑртӑс, муйсӑр вє­рӑт ӆўв тӑм мўва юхтум пийн вєрӑс, хән округ кәщая йис. Ӆўв ясӊӑӆн, хән карты щўӊкӑт мухты ок­руг мирев ӆўвеӆа муӆты юх­ӆы хӑншӑӆ – щирн щи рәпа­та вєрӑт ма кӑӆӆӑт: 

- Мӑнєма вєра мосӆ кашӑӊ муниципалитет вєрӑт уша вєрты. Округн вәӆты мирев соцсеть мухты мӑнєма арсыр иньщӑсуп­сэт китыйӆӆӑт, ӆыв суртӑӊ вєрӆаӆ оӆӑӊӑн путӑртӆӑт. Щи вєрӑт мўӊ нумӑса пунӆӑӆӆўв па, рәпатаев еӆӆы ӆэщӑтты питтэвн, щи вєрӑт пєӆа вантӆўв, – путӑртӑс Руслан Кухарук. 

- Тӑм ӑктупсы ванӆтӑс, Югра мўвев Уральской фе­деральной округев нєм кӑрща тәӆӆэ, тӑмӑщ «Зна­ние. Первые» ӑктупсы Рос­сия нивӆ мўвн вєрӑнтӆа. 

Тӑм ӑктупсыйн вєра ар мир ясӑӊ тӑйсӑт, щи кўтн политикӑт, учёной мир, блогерӑт, кӑсты ёх па арсыр хӑннєхәйт. Ӆыв мир ещаӆт путӑртсӑт, муй вўрн ӆыв щиреӆн Россия мўв вәӆупсы еӆӆы мӑнты питӆ, муй вўрн айӆат ёх тӑм вәӆупсыйн еӆӆы вәӆты пищ тӑйӆӑт.

Югорской ӑктупсы ху­ща ясӑӊ тӑйсӑт Государст­венной Дума депутӑт Анатолий Вассерман, «Га­лилео» программа хуща рәпитты арсыр йиӆуп вєрӑт вєрты хӑннєхә Алексей Иванченко, йиӆуп щира айкеӆӑт ӆэщӑтты хӑннє­хә Владимир Кузнецов («Вован») па Алексей Столяров («Лексус») па па арсыр ёх. Тӑм тӑхия актёрӑт, шоуменӑт, карты щўӊкӑт мухты путӑртты ёх, ариты хуятӑт юхӑт­ман вәсӑт. Щит ариты хә, продюсер, «Высшая лига КВН» хуща нух питум хӑннєхә Станислав Яру­шин, актёра, блогера вәӆ­ты хӑннєхә Александр Зарубин (Саша Стоун), ӛр тӑйты, актёр па ариты хә Торнике Квитатиани па па ар хуятӑт. 
Ӆыв арсыр наука па техника вєрӑт оӆӑӊӑн, айкеӆӑт йиӆпа ӑкӑтты пищӑт оӆӑӊӑн, мўвев-йиӊкев ӆэщӑтман тӑйты вєрӑт оӆӑӊӑн путӑртсӑт. 

Тӑмӑщ тӑхи ӆэщӑтум ёх нумӑсн – щит айӆат ёхӆўв тўӊа мӑнты пӑнтӑт ат вәйтӆӑт. Щи пӑнт ӆыв шиваӆӑӆӑт, хән сыры вә­ӆум ёх вєрӑт, нумсӑт уша вєрӆӑт па Россия вєрӑт уша вєрӆӑт. Тӑм пӑнтӑт ки уша вєрӆэӆ, щирн еӆӆы вәӆупсы ма кӑӆты питӆ. Сащ тӑйты питӆӑт, муйсӑр пӑнт хўват шәшумты, мӑта тӑхетн ӆыв мосӆӑт.

Тӑмӑщ вєрӑт оӆӑӊӑн щи путрӑт мӑнсӑт, щӑӆта па йиӆуп технологияйт оӆӑӊӑн вєра ар путӑртсӑт па наука щирн, мӑта тӑхетн мўӊ еӆӆы мӑнты пӑнтӑт вєрсўв. Путӑртум ёхӆўв лупсӑт, ӆыв муй вўрн нух питсӑт, муй вўрн ӆыв щиреӆн Россия мўвев еӆӆы вәӆты питӆ. Уша вєрсэӆ, мӑта тӑхетн вєра ар нумсӑӊ па ма рәпитты ёх мосӆӑт, мӑта тӑхетн ӆыв нумӑсӆаӆ, ӆыв ёшн вєрты вєрӆаӆ мєт вєра мосӆӑт.

Путӑр хӑншӑс: 
Пётр Молданов