Ас потты тыӆӑщ хәтмит хӑтӆӑн «Хӑтӆ» нємпи театр хотн «Рәт мўвев ар сувӑт» нємпи етнхот вәс. Мєт оӆӑӊ пўш тӑм етн­хот Ас нопӑтты ты­ӆӑщ хәӆмит хӑтӆӑн «Гео­логия, нефть па газ» музейн «Искус­ствайт атӆ» пу­райн ванӆтӑсы. Театра ок­руг депутат хә Е. Ай­пин, Вера ӑӊкеӆ Т. Конд­ратьева па па хуятӑт юхтыйӆсӑт. 

Тӑм етнхот культура па искусства пӑта миюм Россия президент грант вухӑт унтасн ӆэщӑтсы. Щив «Хӑтӆ» театр кәща хә Евгений Захаров мосты нєпекӑт китыӆӑс. Грант вухӑт хоӆумтум пийн режиссёр-постановщик хә Виктор Евдокимов, театӑрн рәпитты артистӑт Вера Кондратьева, Юрий Хозумов, Елизавета Фо­миных спектакль әх­тыйн рәпитсӑт. 

В. Евдокимов тӑм йис щўӊкӑт щирн тӑм спектакль ӆэщӑтсӑӆэ, щит нейросеть, кина вў­ты онлайн камерайт, нюр мӑтты щив юхтум хӑн­нєхуятӑт еӆпийн кина вўӆы.  
Тӑм спектаклян В. Конд­ратьева иса мўвтєӆ мир Най Аӊки хурас юн­тӑс. Тӑм әмӑщ юнтты хӑрн ванӆтӑсы, хутыса иса мўвтєӆ ӆуваттыйн ар сувӑт тывсӑт, хуӆща саты вой-хўӆ па ӆыӆ шив тывӑс. Вера Кондратьева тӑта рәт ёхӆаӆ па кан арӆаӆ арисӑӆэ, щи йис арӑт тӑм йиӆуп йис щирн вєрсыйт. 

Иса тӑм юнтты хӑр ӆэ­щӑтты мӑр, ӆывеӆа вән­ӆат хӑнты имев Мария Кузьминична Волдина мосты ясӑӊӑн нётӑс. 
Театр кәща хә Е. За­харов ясӊӑт щирн, ӆыв округ вошӑт па кәртӑт хўват тӑм спектакль пиӆа ӊхты па мира ванӆтӑты питӆӑт. Ӛхӑт па театр хот­тєӆ хущи мосты пурайн ванӆтӑты питӆэӆ. 

Путӑр хӑншӑс: 
Надежда Вах