Айкеԯӑт - Новости

Россия мўв оборона министерства тӑхи хуятӑт «Дорога памяти» нємпи вєр ӆэщӑтсӑт. Хута Вуӆаӊ ӆаӆь пурайн мўвев ӆавӆум ёх оӆӑӊӑн хӑншман питӆ па хурӆаӆ щив вєрӆыйт.

Щи вєр Российской армия вуӆаӊ музей тӑхи ӆэщӑтӆӑт. Щӑта ӆаӆь хӑ­рӑтн тарӑнӆум хуятӑт, оборонной заводӑтн рәпитум ёх, партиза­нӑт, Ленинград вошн атум суртӑт вантум хӑннєхуятӑт, ӆаӆь хӑ­рӑтн айкеӆӑт ӑктум ёх, хуӆыева, хуйтат ӆа­ӆяссӑт, рәпитсӑт щи ӆа­вӑрт пурайн, ӆәӆн рәт мўвеӆ фашистӑт эвӑӆт вәньӆьты. 

Ас хӑӆты тыӆӑщ 23-мит хӑтӑӆн Ёмвошн РИЦ «Югра» нємуп тӑхийн Пенсионной фонд тӑхи кәща нє Татьяна Зайцева пиӆа вәйтантупсы вәс.

Щи оӆӑӊӑн мирхот пурайн лупӑс округ кәща ӆӑӊкӑр хә Всеволод Кольцов, мӑта ут «Югра» нємпи айт ӑкӑтты хотн вәс.

«Щимӑщ нємасыя штаб тӑхи Москва хон вошевн вәӆ, мўӊ ищи Ёмвошн ищимӑщ тӑхи пўншсўв. Кәщая щӑта ма питӆум. Мўӊ кәщайт, вән тохтурӑт пиӆа йиӆуп коронавирус уша вєрты питӆўв па муй иса вєр­ты питӆўв, ӆәӆн щи­мӑщ ӆавӑрт мәш мўӊ хущева аӆ юхтӑс», – лу­пӑс В. Кольцов.

Ӆаӆь вєрӑт тӑмхӑтӆ вәнты мсыева Югра мўв хӑннєхуятӑтн нәмӆыйт. Щит пӑта Ас хӑӆты тыӆӑщ 27-мит хӑтӑӆн Ёмвошн КДЦ «Октябрь» нємуп хотн «Блокадный хлеб» вәйтантупсы вәс.

Вәйтӆор тыӆӑщ ветмит хӑтӑӆн Ёмвошн вәӆты округев киникайт ӆўӊӑтты хот 85-мит оӆ постӑс. Муй щирн щи хӑтӆӑт Государственной библиотека Югры хотн мӑнсӑт, округев кини­кайт ӆўӊӑтты хот кәща нє Ольга Павлова айкеӆ вєрӑс. 

Ӆўв ясӑӊӆаӆ эвӑӆт уша йис, хуты библио­тека хот 85-мит оӆа йиты пӑта ӆыв хущеӆа рәпитты хӑннєхуятӑт 2019-мит оӆ мӑр ушӑ­ӊа-сащӑӊа па вещката рәпит­сӑт.

Вуӆаӊ Отечественной лаль пурайн Ленинград вош немщӑтн мухӑлая лӑп вўйӆясы, щи пӑта Ленинград вошӑӊ ёх 900 хӑтӆ няньӆы-ӆєтутӆы шәк вантман вәсӑт. Ас хӑӆты тыӆӑщ 27-митн 1944-мит оӆн Красной Армия солтатӑт щи вош пўӊӑӆн вуракӑт йира вошитсӑт.

Ас хӑӆты тыӆӑщ 27-митн Россия мўв хўваттыйн иса мирӆўв щи хӑтӆ нәмӑӆман ар м вєр вєрсӑт. Ёмвошн ищи тӑмхӑтӆ аӆӑӊсахӑт округ кәща нє Наталья Комарова па вошӑӊ мир блокадной Ленинград вошн вәӆум ёх нәмӑӆ­ман пӑта кев хура ӆыӆӑӊ ӑня лыптӑт пунсӑт. Мўӊ «Хӑнты ясӑӊ» па «Луима сэрипос» газетайӊӑӆўв хуща рәпитты ёх, ищи щив ӊхсўв. 

(Сәрханӆ  мЎв  хӑнтэт  путрупсыйн)

Йэӊ ӱрәккә қөӆәммәт қӑтәӆнә, январь тысәӆнә, кат тьрасӽән қөсмәт оӆнә (Ханты-Мансийск) Йөм вочнә йимәӊ қӑтәӆа вуӽөйәм. «Российанә кӑнҷантәтә қӑтәӆ» пәтан ма ай ӆат крреспөндет йӱкан әтьә газетаӽины «Хӑнты ясаӈ» панә «Луима Сэрипос» вӆәм. Өс әйчэнә па әшкөльникәт панә студентәт па вочәты вуӽат: Пкачиӽи, Стрежевойи панә Мегионы ӆәӽ йвтәт. Панә өс телерадиокомпанийаӽи «Югра» ай ӆат пӑӽәт панә ӓвит вӆәт.

Мӑнум оӆ юхи хӑщум тыӆӑщн Ёмвошн КТЦ «Югра-Классик» нємуп хот йитн Россия хон пєлӑк арсыр вошӑт эвӑӆт иха юхтум учёной ёх  мирхота ӑктӑщийӆсӑт, мӑта ут мӑнум пурайн кўтэӆн путрємӑсӑт, муй щирн Югра мўв йис вәӆупсы оӆӑӊӑн нєпек хӑншты еӆӆы питӆӑт.

Ас хӑӆты тыӆӑщ 17-митн Ёмвошн округ вәнӆ­тӑты па айӆат ёх вєрӑт тәты тӑхи хуща мирхот вәс. Шуши мир вәнӆтӑты вєрӑт вантман тӑйты тӑхи кәща нє Надежда Костылева щи мирхот тәс.

Мирхотн кӑт вєр нух вантсы: «Хӑнты ясӑӊ (1-4 классӑт)», «Юрн ясӑӊ (1-4 классӑт)», «Вухаӆь ясӑӊӑн ӆўӊтупсы (2-4 классӑт)» киникайт єсӑӆты вєр, Интернет ху­ща хӑнты, вухаӆь ясӑӊ­ӊӑнӑн хӑншты вєр.

Уша йис, хӑнты, ву­хаӆь па юрн ясӊӑт вәнӆтӑты киникайт Ас-угорской институт научной рәпатнекӑт па рәт ясӊӑта вәнӆтӑты ёх ӆэщӑтты па хӑншты питӆӑт. 

Тӑм ванӑн Ёмвошн правитель­ства хотн вән мирхота кәщайт ӑктӑщийӆсӑт. Ӆыв путӑртсӑт щи оӆӑӊӑн, муй иты 2020-мит оӆн Вуӆаӊ ӆаӆьн 1941-1945 оӆӑтн нух питум вєр постӑты мосӆ. Вантэ, 75 оӆ юхӆы мўӊ мирев нух питсӑт, щирн тӑм оӆ вән мӑӊхӑтӆ Россия мўв ӆуваттыйн ӆэщӑтӆа. Тӑм вән мирхот Югра мўв гу­бернатор ӆӑӊкӑр хә Алексей Шипилов тәс.