Айкеԯӑт - Новости

Югра мўв кәща ими ӆӑӊкӑр нє Ирина Максимова мўв-авӑт ӆавӑӆты вәнӆтӑты вєрӑт әхтыйн мирхот ӆэщӑтыӆӑс. 

Тӑм ванӑн Ёмвоша оса вєрӑт тәты ёх, каркам айӆат хуятӑт, Югра мўв вошӑтн, районӑтн правительства хуща рәпитты кәщайт, щурасӆӑты хӑннєхәйт, культура вєрӑт тәты тӑхетн кӑпӑртты хуятӑт ӑктӑщсӑт. Ӆыв нәмӑссӑт, муй иты Ёмвош округ 90 оӆа йиты мӑӊхӑтӆ постӑты. Иха юхтум мир ӆапӑт арсыр вєра ортӑщсӑт па сыр-сыр вәйтантупсэт мӑӊхӑтӆ кєша ӆэщӑтсӑт. Ӆыв хуӆыева 30 муӆтас арсыр вєрӑт постӑты щира нух вантсӑт. 

Васы мӑнты тыӆӑщ 17-мит па 18-мит хӑтӆӊӑнӑн Ёмвошн Югра мўв киника ӆўӊӑтты вән хотн «Лопаревские чтения» нємуп мирхот вәс. Тӑмӑщ мирхот 2007-мит оӆ вўш эвӑӆт вєрты питса. Ин ӆапӑтмит пўш тӑм вәйтантупсы ӆэщӑтса. Тыв Сәрханӆ, Нижневартовск, Меж­дуреченский па Ёмвош район эвӑӆт киника ӆўӊӑтты хотӑтн рәпитты хуятӑт, катра вәӆупсы вәнӆтӑты учёной ёх, йис пурмӑсӑт шавиман тӑйты хотӑтн рәпитты хӑннєхәйт, айӆат ёх юхтыйӆсӑт. 

Васы мӑнты тыӆӑщ 7-10-мит хӑтӆӑтн Ём­вошн Россия мўвтєӆ мир вән мирхот вәс. 

Мєт сыры 7-мит хӑт­ӆӑтн государственной дума арсыр мир вєрӑт тәты комитет ёх увӑс мир вәӆупсы тўӊматты оӆӑӊӑн мирхот вєрӑнтӑс.

Тӑм ванӑн Россия мўв арсыр мир вєрӑт әхтыйн вән мирхот Ёмвошн вәс. Щи хӑтӆӑтн арсыр вән кәщайт увӑс шуши ёх вәӆупсы еӆӆы ӆавӑӆман тӑйты оӆӑӊӑн путӑртсӑт. 

Ар мир ӑкмум хотн государственной дума хуща арсыр мир вєрӑт тәты комитет кәща ики Ильдар Гильмутдинов ай павтӑс:
– Мєт м щи, мўӊ Югра мўвн вәйтантсўв. Вантэ, иса Россия мўв ӆуваттыйн тӑта мєт ар поступсы хӑнтэт, вуха­ӆят па юрнӑт вәӆупсы еӆӆы тәты щира вәӆ. Щи тумпи тӑм мўвн увӑс мир кєша тәса Федераль­ной поступсэт рәпитӆӑт. 

Ай тӑхет потты тыӆӑщ 1-мит хӑтӆ вўш эвӑӆт Югра мўвевн айӆат пухӑт армияя тәты оӆӊитсыйт. Щи оӆӑӊӑн ай тӑхет потты тыӆӑщ 16-мит хӑтӆӑн мирхотн ясӑӊ мӑнӑс. Айкеӆӑт ӑкӑтты ёх еӆпийн военкомат хущи рәпитты хәйт Рустам Абдра­шитов, Евгений Юровских, Джангар Мутаев па Венер Юнусов путӑртсӑт.   

Тӑм сўсн Югра мўвевн нивӑӆкєм щурӑс айӆат пух военкомӑта вохӆы, тәп ӆыв эвӑӆтэӆа 1700-кєм айӆат хә армияя мӑнӆ. Ар хӑннєхә хӑщ­ӆӑт, ӆәӆн вәнӆтыйӆты етшуптӑ­ты, итәхӑт мә­шӑӊӑт, щит пӑта армияя ӑн вўӆыйт. 

Васы мӑнты тыӆӑщ 14-мит хӑтӆ вўш эвӑӆт 20-мит хӑтӆ вәнты Ёмвошн «Российский Север» нємпи V-мит вәйтантупсы вәс. Тыв Увӑс мир па Дальний Восток 37 мўвӑт эвӑӆт мєт апрӑӊ па нумсӑӊ 150 айӆат хуят юхтыйӆсӑт. 

Лыпӑт хойты тыӆӑщ 20-мит хӑтӆӑн Ас, Ӆаӊаӆ ас йиӊк хуща тынӑӊ хўӆӑт тӑйты вєр оӆӑӊӑн вән мирхот вәс. Щи еӆпийн тыв юхтум мойӊ ёх, вән кәщайт па айкеӆӑт ӑкӑтты ёх Ёмвошӑӊ «Югорской» нємпи тынӑӊ хўӆӑт єнмӑӆты тӑхи кәща Павел Павлов щи хота тәтьӆяс. Щӑта мўӊ вантсўв, муй щирн мухсӑӊ, кӑри па сәх хўӆӑт єнмӑӆӆыйт. 

Пенсияя мӑнты вўтщум па ӑн рәпитты ёх пӑта нємасыя вәнӆтыйӆты вєрӑт ӆэщӑтӆыйт, ӆәӆн ӆыв мосты рәпата ат вәйтсӑт. 

Нын ӆӑӊхаӆты ки рәпата вәйтты муй па йиӆуп рәпата тӑхия мӑнты, «центр заня­тости населения» тӑхия юхтаты па мўӊ нынана нётӆўв:
– уша вєрты, муйсӑр рәпата тӑхет мўӊ ок­ругевн вәӆӆӑт;
– мосты рәпатая вәнӆтӑты;
– уша вєрты, хута рәпата мущатты рӑхӆ;
– вәнӆтыйӆты пийн кан вєр пўншты.

Ёмвошн айкеӆ хӑнш­ты ёха путӑртса, муй иты 2020-мит оӆн Россия мўв ӆуваттыйн мир нух ӆўӊӑтӆайт.