Наталья 2002-мит он ӑшкола етшуптум юпийн и классӑн вәнтыум әйңа пиа еы Ёмвоша Югорской государственной университета рәт ясӑң па литература тәты вєра вәнтыйты мӑнӑс.  

2007-мит он университет етшуптума юпийн ўв кәртаа юхы кєрӑс па ӑшколайн рәпитты питӑс. Оӑңӑн рәт ясӑң урокӑт тәс, вожатоя рәпитӑс. Интӑм 6-7 классӑтн рўщ ясӑң па литература мӑ.

Щӑта Сергей Анатольевич ике пиа вәйтантсӑңӑн па ияха вәты питсӑңӑн. Сергей ищи ӑшколайн рәпитӑ, няврємӑт арсыр пурмӑсӑт вєрты вәнтӑ.  Щи вєр ўв Игрим вош училищайн уша вєрӑс. ўв юх эвӑт сыр-сыр хурамӑң вән па ай пӑсанӑт, нянь євӑтты сохӑт, хушапӑт, вєнш вантты лыс пӑта сәхӑт па па әмӑщ утӑт вєр. Вєрум пурмӑса кӑсупсыя китыйсыйт, хута ыв оӑң тӑхи хоумтсӑт. 

Наталья аңкаңке пўңӑн єнмӑс. Матрёна Егоровна Яркина шєңк нявлак имия вәс, вәта хўват нємхуят пиа ӑн па явтыӑс. Наташа ўве шєңк мосман тӑйсӑэ, иса ўв юпен яңхӑс. Аңкаңкие арсыр хурамӑң әмӑтсухӑт ёнтты хошӑс. Хӑнты хурамӑң ернасӑт, щӑшкан сӑхӑт, сӑкӑң нирӑт ёнтӑс, тўрлопсӑт кӑрӑтӑс, сєвум вейт тыйс, тунты эвӑт воньщупӑт, сәнӑт, хинтӑт, йиңӑт па кушмӑт вєрӑс. Муй вєрты иса хошӑс. ўв 89 тӑ вәнты вәс. Вәум хот хинєңӑа хӑйсӑэ, интӑм Наташа икисӑңӑн щӑта вәӑңӑн. Аңщаще па Денис Ксенофонтович Яркин «Победа» колхосн вой-хў вепӑсуман вәс, «ван пан» хущи рыпакӑс.

Наталья ӑңке Надежда Денисовна Молданова (Яркина) ай пушхӑт авӑты хотн воспитателя рәпитӑс. Ар кәртӑң няврєм ўв ёшңӑ мухты мӑнӑс. Щи няврємӑт вәна йисӑт, хиэт єнумӑт, тәп интӑм вәнты ўве мосман тӑйэ.

Сергей ищи рәпатайң семья эвӑт вә. ўв кӑт упи па и яй тӑй, ӑңкен-ащен тәса рәпитты вәнтӑсыйт. 

Ма ӑңхаум няврємӑт вәнтӑты ёх хӑт вурӑңӑн ынӑна ям вўща ясңӑт китты па лупты, ән ын тӑаңа па уяңа ар о ияха ат вәсңӑн. Найн-Вәртӑн ат авӑыйңӑн. Мўң хӑнты мирев вәупсы па йис вєрӑт а юрємаңӑн па няврємӑт еы 

тўңщирӑңа ат вәнтӑңӑн.