Айкеԯӑт - Новости

Ай тӑхет потты тыӆӑщ сухӑнты еӆпийн 30-31-мит хӑтӆӊӑнӑн Ас-угорской институтн кӑпӑртты ёх колледжӑтн вәнӆтыйӆты айӆат ёх кўтн олимпиада-кӑсупсы вєрӑнтсӑт. Щи вєр рәт ясӊӑт вәйт­ты щира ӆэщӑтӆы. 

Тӑм сўс айӆат хуя­тӑт хӑнты, вухаӆь па юрн ясӊӑт щирн рә­па­тайт хӑншсӑт. Тӑм пўш Нуви сӑӊхум вош по­ли­технической коллед­жӑн – 10 хуят, Игрим вош – 12, Ӆӑӊки пос вош – 2, Сәр­ханӆ вош – 4, Ёмвош тех­но­лого-педагогической колледжӑн – 16 вәнӆ­тыйӆты няврємӑт кӑссӑт. 

Тӑта мосвӑнӑн ай тӑхет потты тыӆӑщ 17-мит хӑтӑӆн Ёмвошн РИЦ «Югра» айкеӆӑт ӑкӑтты тӑхийн Монголия хон пєлӑк мўва «Вуӆаӊ ӆаӆьн нух питум вєр мўӊ сӑмӆўвн» Мўвтєӆ мирӑт медиаэкспедицияя ӊхум ёх иха юхтум хӑннєхуятӑт пиӆа вәйтантыйӆ­сӑт па путрємӑсӑт. 

Мўӊ кўш вән вошӑтн вәӆӆўв, тәп вошн вәӆты м па әмӑщ! Вантэ, вошэвн кашӑӊ пурайн муӆты әмӑщ вєр ӆэщӑтӆы, кўш мӑӊхӑтӆӑт, кўш кӑсупсэт па ӆўӊтупсэт, кўш якты па юнтты хӑрӑт. 

Ешӑк шуши мирӆўв! «Хӑнты ясӑӊ» па «Луима сэрипос» газетайӊӑӆўв хӑншты хуятӑт «Югра ӆыӆӊуптӑты» оса тӑхи ёх пиӆа округ ӆуваттыйн вәӆты мир пӑта «И рәт – и рәпата», вухаӆь щирн «Акв рут – акв рупата» нємпи йиӆуп кӑсупсы ӆэщӑтсӑт.

Щиты 2024-мит оӆ васы мӑнты тыӆӑщ оӆӑӊмит хӑтӆ вўш эвӑӆт хӑнты, вухаӆь па рўщ ясӊӑтн хӑншум и рәпата тәты па йис вєрӑт тәса тӑйты хоттєӆ ёх оӆӑӊӑн путрӑт мўӊева китты мосӆ.
Тӑм йиӆуп кӑсупсы 2024-мит оӆ васы мӑнты тыӆӑщ оӆӑӊмит хӑтӆ вўш эвӑӆт оӆӊитсўв.

Кӑт пўш оӆ мӑр, щит вән кєр тыӆӑщ па васы мӑнты тыӆӑщӊӑнӑн 7-мит хӑтӆӊӑнӑн Россия мўв хўваттыйн ӑӊкия йиты имет мӑӊхӑтӆӊӑн постӑты питса. Щи вєр пӑта тӑм ванӑн Ёмвош «Югра» нємпи айкеӆӑт ӆэщӑтты хотн «Ӑӊки па пушхие» нємуп вәйтантупсы мӑнӑс. 

Ёмвошн профпато­логия Центр нємуп тӑхийн рәпитты ай па вән тохтурӑт иха мирхота ӑктӑщийӆсӑт па нәмӑссӑт, хутыса па муй щирӑтн еӆӆы вәӆты-хоӆты хурасн рӑхӆ щимӑщ вєр ӆэ­щӑтты, ӆәӆн округевн вәӆты айшӑк кәртӑта ӊхты па хӑннєхәйт мәш вєрӑт артаӆӑты па уша павӑтты. 

Вантэ, сўс муй тӑӆ пурайн тывеӆт-ту­хеӆт Югра мўвев ӆу­ваттыйн нємасыя ӊхты тохтурӑт вәӆӆӑт. Щи ёх­ӆўв округ хўватн омӑсты кәртӑта па вошӑта иса машинаитн тӑӆ ӛшӑт вєрты кємн тәтьӆяӆыйт. Кашӑӊ хўв тӑхийн ӆыв сыр-сыр хӑннєхәйт пиӆа вәйтантыйӆӆӑт па мәш вєрӑт тўӊщирӑӊа вантӆӑт.

Тӑм ванӑн Югра мўв Роспотребнадзор тӑхийн рәпитты кәщайт айкеӆ  вєрсӑт, хута путӑртсӑт, муй щирн хӑннєхәя хоньщупсы мәшӑт юхӑтты кємн мӑӆтыйӆты рӑхӆ. Щи пӑта ӆыв округ пәӆьница хотӑтн вәӆты тохтур ёхӆўва партсӑт, ӆәӆн ОРВИ па грипп нємуп мәш вєрӑт шимӆа йиты пӑта ай кәртӑтн па вән вошӑтн вәӆты-хоӆты хӑннєхуятӑта щи вєр пӑта мосты уколӑт мсыева  ат вєрсӑт. 

Ай тӑхет потты тыӆӑщн 10-мит хӑтӆӑн карты щўӊкӑт мухты «Югра мўвн вўӆы тӑйты ёх вухн нётты питӆайт» нємпи онлайн вебинар мӑнӑс. Щӑта вәсӑт: Ёмвош округ оса тӑхет па айӆат ёх вєрӑт тәты департаментӑн увӑс мирӑт пиӆа рәпитты нє Екатерина Сапожникова, «Касум Ёх» тӑхи менеджер ими Марина Кабакова, «Рахтынья» община юриста вәӆты нє Елена Савчук, «Касум ёх» тӑхи кәща нє Елена Федотова.  

Государства хуща увӑс мира нётты щира «Ус­тойчивое развитие ко­ренных малочисленных народов Севера» прог­рамма вәӆ. Щи нєпек мухты вўӆы тӑйты ёха нётты пӑта кӑт пищ вәӆ:

Лыпӑт хойты тыӆӑщ 21-мит хӑтӆӑн Югра мўвев хўваттыйн «Кросс нации – 2024» Россия мўвтєӆ мир кӑсупсыйн 23 щурӑс муӆтас хуят хәхӑӆсӑт, щит ӛрӑӊ-щомӑӊ ёх па ӑӆ хуятӑт. 

Ёмвошн А.В. Фили­пенко нємпи ӆухн хӑтӑтьӆяты  тӑхийн 3600 хуят ӑктӑщсӑт, щи ёх кўтн мєт вән хуят – щит 73 оӆа вум хә Валерий Анисимов, мєт ай няврємӑт – хәӆум оӆа вум Кирилл Быков па Есения Агеева.

Лыпӑт хойты тыӆӑщ 13-мит хӑтӆӑн Ёмвошн округ кәща ӆӑӊкӑр нє Елена Шумакова мирхот вєрӑс. Щӑта ӑкмум мир путӑртсӑт, муй округевн вєрӆы шуши мир ясӊӑт ӆавӑӆты па нух аӆумты щира.