Тӑм пўш Ас потты тыӆӑщ 23-мит хӑтӆӑн «Югра» нємпи айкеӆӑт ӑкӑтты тӑхийн мир ӑктӑщсӑт, щӑта Россия биатлон кӑсупсы оӆӑӊӑн путӑр мӑнӑс. Тыв Россия биатлонистӑт тӑхи ӆӑӊкӑр хә В. Мелихов, «ЮграМегаСпорт» кәща хә В. Радченко па ар пўш Россия кӑсупсыятн нух питыӆум хә С. Сучилов юхӑтсӑт.

Кӑсупсы кӑт йит щира вєрӆа, Ас потты ты­ӆӑщ 23-29-мит хӑтӆӑтн − щит и йит, па имухты кимӑт йитӆ ван хӑтӆуп тыӆӑщ 2-мит хӑтӆ вўша. Россия 20 мўв эвӑӆт 120 кєм хӑннєхә кӑсты питӆӑт.

Россия хон пєлӑк мўвев ӆуватн кашӑӊ 10 тӑӆ мӑр хӑннєхуятӑт мсыева нух хӑншӆыйт, ӆәӆн уша вєрты, муй арат па муй хурасуп арсыр мирӑт мўӊ хущева ин тӑм хӑтӆӑт вўшӑт вәнты вәӆӆӑт. Щи вуӆаӊ вєр пӑта ван хӑтӆуп тыӆӑщн ӆапӑтмит хӑтӑӆн 2019-мит оӆн №1608 закон щирн  Российской Федерация вән кәщайт щимӑщ йиӆуп поступсы ӆэщӑтсӑт, мӑта утн «Россия ӆуватн хӑннєхәйт 2020-мит оӆн нух хӑншты мосӆ».

Ёмвошн Ас потты тыӑщ 18-19-мит хӑтӆӊӑнӑн онлайн щирн наркотик такӆы вәӆты мирхота ёх ӑктӑщсӑт, иса тыв 1200 хӑннєхә юхӑтсӑт, щит мир пиӆа рәпитты ёх па щи вєрӑт щира вәӆты департаментӑт, иса 52 Россия мўв сўӊ эвӑӆт.

Тӑм мирхотн Югра ху­ща щи вєр туӊматты ёх ӑктӑщсӑт. Ӆыв щиреӆн, тӑм 10 оӆ мӑр мўӊ мўвевн щи вевтам вє­ра катӆӑсум ёх нӆ пўша шимӆа йис, 8000 вәс, ин 2000 хӑннє­хә. Югра мўвн вәӆты ко­мис­сия ёх Россия мўвевн мєт ма рәпитӆӑт.
Округ кәща ӆӑӊкӑр хә Алексей Шипилов лупӑс:

Россия хон пєлӑк мўвн вәӆты хӑннєхуятӑта закон щирн тынӆы-пєӆӆы «служба занятости» тӑхет унтасн тӑм йисн рәпата мущатты щир вєрсы. 

Рәпата хуятӑта хўв тӑ­хийн вәӆты электронной щирн кӑншты па рӑхӆ. 
Кашӑӊ хӑннєхәя ӆўвеӆа мосты вєр вәйтты пӑта, ӆыв кўтэӆн шуши мир хуятӑт па вәӆӆӑт, мсыева служба занятости тӑхия хӑншаньщты мосӆ.

Хӑнты мир кўтн щимӑщ ясӑӊ вәӆ: «Ӛш хўват шәшум па юхӆы кєрӑтум хуят уй ӑн шиваӆӑӆ». Щимӑщ ясӊӑтн округ кәща нє Наталья Комарова путӑртты оӆӊитӑс, хән округ депутатӑт еӆпийн ясӑӊ тәс, хутыса мӑнум оӆн правительства ёх рәпитсӑт. Щит Ас потты тыӆӑщ 25-мит хӑтӆӑн вәс.

Кәща нє ясӑӊӆаӆ щирн, хутыса интӑм кәща ёхӆўв округ мир пӑта рәпитӆӑт, ищиты еӆӆы рәпитты мосӆ, ӆәӆн мирев вәӆупсы машӑк ат йис, юхӆы кєрӑтты ӑн мосӆ.

Сӑм хӑрєм вўш эвӑӆт округев мӑӊхӑтӆ вўраӊӑн нынана хошум вўща ясӊӑт китӆум!

Хўв йис мӑр Югра мўвев тӑта вәӆты Ас-угорской мирӑт пӑта сорни мўва аӆьщӑсы. Тӑмхӑтӆ тӑта хӑнтэт па вухаӆят тумпи 60 арат арсыр мир вәӆ, ӆыв пӑтэӆа тӑм мўв ищи сорни мўва йис. 

Ван хӑтӆуп тыӆӑщ 10-мит хӑтӆ – округ мўвев тывум вуӆаӊ мӑӊ­хӑтӆ.

Округев Дума хот де­путатӑт мевӆ хӑры вўш эвӑӆт нынана м вўща яс­ӊӑт лупӆум па ӆӑӊхаӆум щиты путӑртты, хуты тӑм пўш Югра мўвев араттєӆн 91-мит оӆа йис.

Мўӊ Ёмвош округев Россия мўвев пӑ­та вуӆаӊ мўва вәӆ. Тӑта мўӊ ар мосты вєрӑт ӆэ­щӑтӆўв, ӆәӆн ӑнтә тәп округевн, иса хон мўвев ӆуваттыйн хӑннєхуятӑт ма па тўӊщирӑӊа ат вә­сӑт. Щи пӑта мўӊ тӑм йис вєрӑт уша вєрӆўв, муй щирн тәса мўвӆўв-йиӊкӆўв тӑ­ӆаӊа па ӆавӑӆман тӑйты. Ӆәӆн округевн вәӆты мир ха катӆӑсман ат вәсӑт па вәӆупсэӆ тащӑӊа па щўняӊа ат мӑнӑс. 

ПĂӅТАП! Нуви тўт мӑты карты кеӆ тӑйты щўӊкӑта вана­­­мӑты па нўх хәӊхты ӑн рӑхӆ!

ПĂӅТАП! Хот питӑрн вәӆты розеткайта нємӑӆт ут лукємӑты ӑн рӑхӆ!

ПĂӅТАП! Трансформа­торной тӑхия хәӊхты па щив ванамӑты иса ӑн рӑхӆ!

ПĂӅТАП! Нуви тўт мӑты карты кеӆ пўӊӑӆн юнтты ӑн рӑхӆ!

ПĂӅТАП! Нуви тўт мӑты тохнум карты кеӆ хуща ванамӑ­ты ӑн рӑхӆ!

ПĂӅТАП! Нуви тўт мӑты карты кеӆ таӆты аӊкӑӆ иӆпийн хўӆ веӆты ищи ӑн рӑхӆ!

ПĂӅТАП! Нуви тўт мӑты тўт суна па ищимащ щўӊка кєтумты ӑн рӑхӆ!

ПĂӅТАП! Йиӊк пўӊӑӆн тӑйты иса ӑн рӑхӆ!

Тӑм пўш Ас потты тыӆӑщ 11-мит хӑтӆӑн «Югра» айкеӆӑт акӑтты тӑхийн ӑктӑщум ёх тӑмхӑтӆ кашӑӊ хӑннєхәя сащты вєрӑт оӆӑӊӑн путӑртсӑт, щит коронавирус атум мәш ӑн павӑтты вєрӑт.