Айкеԯӑт - Новости

Хон вошн Ас нопӑтты тыӆӑщн 17-мит хӑтӆӑн «Выставка достижений народного хозяйства» хуща «Рабочий и колхозница» нємуп хот йитн ӑктупсы вәс, щит «Академическая история Югры» хӑншум нєпек оӆӑӊӑн путӑртты пӑта. Тӑм хот йитн па «Трудовые династии» ванӆтупсы вәс. 

Ёмвошн вән кєр тыӆӑщн 23-25-мит хӑтӆӑтн ветмит пўш ӑктупсы вәс. Щи ӑктупсыя сыр-сыр ясӑӊӑн путӑртты мир, сыр-сыр йис вєрӑт вана тӑйты мир юхӑтсӑт. Щи мирев и нумӑсн, ха катӆӑсман вәӆӆӑт, и пӑнт хўват шәшӆӑт. Тӑмӑщ ӑктупсы сыр-сыр мўвтєӆ мирев кўтӆаӆн ӆәхсӑӊа вәӆты пӑта вєрӆа. Россия мўвев ӆуват мирев м нумӑсн ат вәӆӆӑт, м сӑмн ат вәӆӆӑт па йис ёхӆўв, йис вєрӑт тӑм хӑтӆ вәнта вана ат тӑйӆӑт. Щи пӑта тӑта вєра арсыр мир ӑктӑщсӑт, щи кўтн ариты-якты мир, вєрӑӊ ёх, учёной щира вәӆты хуятӑт, кәщая вәӆты хӑннєхәйт.

Щимӑщ нєм оӆӑӊмит вән мирхот тӑйс, мӑта ут Ас нопӑтты тыӆӑщ Москва хон вошн «Яндекс» хотн ӆэщӑтман вәс. Вантэ, 2022-2032-мит оӆӑт – щит мўвтєӆ шуши мирӑт рәт ясӊӑт ӆавӑӆты арт, щирн Россия мўвев арсыр мир вєрӑт тәты федеральной агентства (ФАДН) па «Россия мўвев мирӑт хот» нємпи тӑхеӊӑн ёх щимӑщ вән мирхот вєрсӑт. Тыв 50 тӑхи эвӑӆт 200-кєм рәт ясӑӊ еӆӆы Интернет хуща пунты вєрӑт тәты кәщайт, программистӑт, ӑӆ хуятӑт, айӆат ёх юхтыйӆсӑт. 

Ёмвошн вән кєр тыӆӑщн 25-мит хӑтӆӑн РИЦ «Югра» хуща ӑктупсы вәс. Щӑта ай вошӑта касӑӆман ӊхты пәӆьница хуща рәпитты ёх ясӑӊ тӑйсӑт. Щит «Югорский центр профессиональной патологии» нємуп тӑхийн рәпитты тохтурӑт. Ӆыв путӑртсӑт, муй тӑхетн ӆыв тӑм оӆн, тӑӆ тәрумн ӊхсӑт, щит вєра хўв тӑхийн вәӆты ай вошӑт па ай кәртӑт. 

Мӑта ёх йис вєрӑт па йис нумсӑт вана тӑйты каш тӑйӆӑт, щи ёх тӑм хӑтӆӑтн конкурс нєпекӑт хӑншты пищ тӑйӆӑт. Тӑм вєрӑт пӑта федеральной бюджет эвӑӆт некоммерческой организация хуща вәӆты ёх, мӑта хуя­тӑт кӑсупсыйн нух питӆӑт, вухн мӑӆыйт.

Тӑмӑщ вєр «Феде­ральное агентство по делам молодёжи» ху­ща айӆат ёх пиӆа рәпитты кәща хуятӑт ӆэщӑтсӑт.

Югра мўвн вошӑтн па кәртӑтн вош хулэт па хӑрӑт нух ӆэщӑтты пӑта щӑта вәӆты мир кўтн иньщӑсупсы вєрсы. Ӆыв пириӆӑт, мӑта тӑхи вошн сыры нух ӆэщӑтты мосӆ. Тӑм мосты вєр – «Формирование комфортной городской среды» федеральной проект, мӑта ут «Жильё и городс­кая среда» Россия президент партупсы нацпроект щирн тәӆы.

Йиӆуп «Вестник Ассамблеи» нємуп газета єтăс. Тăм нєпек Россия мўв хўваттыйн «Хоттєӆ ёх оӆа» аӆьщăсум щира па Югра мўв Дума тăхи 30 оӆа вум пăта ӆэщăтсы.

«Шєӊк м па мосты вєр мўӊ округев кәщайт вєрсӑт», - щиты нёхмӑс мӑнєма Нуви сӑӊхум вош эвӑӆт Ёмвоша тынєсты-ӆәтӑсты хӑра юхтум рўщ ими Дарья Видеман. Тӑмӑщ  хӑрӑт, вантэ, кашӑӊ оӆ суханты кємн Экспоцентр нємуп тӑхийн Ёмвошн мӑнӆӑт. Тыв округев ӆуватн вәӆты хӑннєхуятӑт ӆыв щиреӆн ӆэщӑтум ӆєтутӑт-пурмӑсӑт пиӆа юхтыйӆӆӑт. 

Тӑта хәӆум хӑтӆ мӑр мсыева вошӑӊ хӑннєхәйт пиӆа тынєсӆӑт, ӆәтӑсӆӑт па щитэӆн юхӆы пєӆы ӆыв вәӆты тӑхиӆаӆа айӆтыева мӑнӆӑт.
Муй щирн сыр-сыр ты­нєсты вєрӑт вәӆӆӑт, щи оӆӑӊӑн тӑм тӑхия юхтум нє Дарья Видеман инь­щӑссєм.

Мўӊ Россия па Югра мўвевн «Малое и среднее пред­при­ни­мательство» нацпроект рәпитӆ. 2023-мит оӆн щи вєра округев хущи 7 млрд арат шойт вух єсӑӆсы. Щи оӆӑӊӑн айкеӆӑт ӑкӑтты ёха Ёмвошн РИЦ «Югра» тӑхийн округев кәща ӆӑӊкӑр хә, экономической развития департамент кәща хуят Сергей Афанасьев путӑртӑс.

Ӆўв ясӑӊӆаӆ щирн 2021-2023-мит оӆӑт мӑр округевн пред­приниматель ёх хәӆум щурӑса ара йис. Сыры щит 59 щурӑс хуят вәс, ин тӑм па 62 щурӑс 184 хуята йис. Югра мўвн ӆыв ма нётӆыйт. Юхи хӑщум оӆӑтн ӆыв саттэӆа вєр тӑйты ёх ар, щит 83% ара йис. 

Вән кєр тыӆӑщ 1-мит хӑтӆ вўш эвӑӆт Россия мўвевн ай­ӆат пухӑт армияя слу­житты мӑнты вєр оӆ­ӊитсы. Кашӑӊ ай­ӆат пуха срочной щирн служитты мӑнты мосӆ, тәп итәх хуятӑт граж­данской служба щирн служитты щир тӑйӆӑт. 

Гражданской щирн служитты щир тӑйӆӑт: щи хәйт, хуйтата рәт миреӆ йис вәӆупсы щирн армияя мӑнты па пушкан ёша вў­ты ӑн рӑхӆ; вәнт кәртӑтн вәӆты шуши хуятӑт. Щи айӆат пухӑта армияя мӑнты кана государственной рәпитты тӑхийн кӑт оӆ мӑр рәпитты мосӆ.