- Хантыйский
- Русский
Стихӑт хӑншӆӑт
Хӑнты мир учёной ики Тимофей Молданов оӆӑӊ стихӆаӆ 1990-мит оӆӑтн хӑншсӑӆэ. Ин ӆўв вєрум йиӆуп арӆаӆа мўӊ амтӑтьӆяӆўв.
Ар йиӊк ӊхтэн кўтӑн, нӑӊ,
Ар мўв ӊхтэн кўтӑн,
Вормум мўвен ма нәмэ!
Єнмум мўвен ма нәмэ!
Тӑӆ хӑтӆ вәӆтаӆ ӆўв,
Тӑӆэн щира, нӑӊ, па шәша,
Ӆўӊ хӑтӆ ки, вєртаӆ йина,
Хӑтӆэн пєӆа ванта, нӑӊ!
Вотас вєрӆ вәе, нӑӊ,
Ӆўӊӑн мәрӑх ар щи єтӆ.
Хӑтӆэн питӑс хошма йиты,
Вәнтэн нух па ӆўв ӆыӆӑӊӆӑс.
Ин па мосӆ юхи мӑнты,
Нюхӑс шукап ӆўв щи хуӆас.
Сыр-сыр воен навӑрмӑсӑт.
Няврєм тыхӆ ӆўв щи питӆӑн.
Щитэн нәмӆан нәптэн хўват!
Щимӑщ ясӑӊ йис ёх тӑйсӑт.
Атєӆт сўмӑт
хӆы нӛрум кўтпиенӑн
Атєӆт сўмӑт атєӆт ӆоӆь.
Увӑс вотӑн хойӆа ӆўв,
Нум вот питӆ, ищи хойӆа.
Йивӆы-ӑсӆы атєӆт сўмӑт.
Шәмӑӊ сўмӑт щитӑӆ пӑта
Нӛрум лакка ӆєрӆаӆ єсӆӑс.
Пәмӆы нӛрум кўтпиенӑн
Атєӆт сўмӑт атєӆт ӆоӆь.
Атєӆт ӆоӆь щи ӑнтәм щунь.
Вотас хойӆ ищи ӆўвєӆ.
Тәрум сот-сыр ар войиен
Хуӆыева ӆыв пиӆӑӊӑт.
Юхӆы нӛрум кўтпиенӑн
Атєӆт сўмӑт атєӆт ӆоӆь.
Нәптӑӆ хўват кӑрща ат йиӆ
Йивӆы-ӑсӆы атєӆт юх.
Нина Ефимовна Тарлина, эви опращ нємӆ Ерныхова. Тӑм каркам вещкат нумсуп нєӊие Амня вошн вәӆ. Ӆўв 1998-мит оӆ вўш эвӑӆт хӑнты ясӑӊӑн стихӑт хӑншӑӆ.
Мӑнӑтты ма иньщӑсӆєм?
Муя ма вәнӑӆтыйӆӆум?
Нумӑс муй вәйтӆум?
Уша муй вәйтантӆум?
Ма еӆпємӑн мӑнум ар м мирим
Ар м нумсые ӆыв щи па тӑймєӆ.
Ар м тумае, ӆыв па щи нәмӑсмеӆ.
Ушӑӊ м нумсыйен
Нын тәс тумаен.
Мӑнєма ки мәстӑӆӑт,
Мӑнєма ки рӑхӆӑт
Хурамӑӊ арие,
Хурамӑӊ моньщие,
Ма ӆәӆн нәмӑсӆум,
Ма щирн ӆэщӑтӆум.
Ма сємӊӑӆӆам ещаӆт
Арсыр поэтӑт
Щит муй Шульгин,
Щит муй Щэнкэп,
Щи мурт ӆўв ӛрӑӊ
Нумсӑт па тӑйс
«Так Молупщи» хӑншӑс…
Владимир Волдин – хӑнты хә вәс.
Тәс ясӑӊ па вәсӑт,
Тәс путӑр па хӑншсӑт.
Тынӑӊ м хӑнтэт,
Тынӑӊ поэтӑт!
Ӆыпєма хойс,
Сӑмєма мәстӑс
Нын хӑм ясӊӑн,
Нын хӑм путрӑн.
Ищи мурт иньщӑсӆєм,
Муй пӑта вәнӑӆтыйӆӆум?
Хӑнты ясӊєм ӆыӆ ки тӑйӆ,
Хӑнты путрим ӛр ки вәятӆ,
Щи пӑта нәмӑсӆум,
Щи пӑта вәнӑӆтыйӆӆум.
Евдокия Каксина, эви опращ нємӆ Тарлина. Амня вошн вәӆ. Ӆўв Ас-угорской институтн рәпитӆ. Хӑнты ясӑӊӑн арӑт хӑншӑӆ.
Вот пух
Ӆор хўват мӑнӆум ма хӑнты хопн,
Ӆор овєм эвӑӆт увӑс кев вот хойс.
Вотӑӊа йис, хумпӑӊа йис.
Вот хумпєм әхтыйн
Няхман ма ӆовӑӆӆум.
Вотыен юнтӑӆ ӆор йиӊкӑӆ пиӆа,
Вотыен юнтӑӆ ма хопєм пиӆа,
Вотыен юнтӑӆ ма әпӑтӆам пиӆа.
Щӑӆта ӆўв мӑнӑс ӆор пәхӑр пєӆа,
Щӑта ӆўв юнтӑс сўмӑт лыптӑт пиӆа,
Щӑта ӆўв юнтӑс нохӑр юх ӆєпсӑт пиӆа.
Щӑӆта ӆўв пәрӆӑс пӑӆӑӊӆаӆ хуща,
Пӑӆӑӊӆаӆ пиӆа хуӆтпєӆа мӑнӑс.
Вотыен тэвнӑс, хумӆаӆ ара мӑнсӑт
Пайӆы сохӑӆ иты йиӊкиен ӆӑрпиӆӑс.
Ма хӑнты хопємӑн па еӆӆы ӆовӑӆӆум.
Ӆор хӑлэв пухим нәмӑн ӆўв ӆӑрыйӆ,
Ӆор хӑлэв няхӑӆ нәмӑн ӆўв няхӆӑӆӆэ.
Пишут стихи
Хантыйский учёный-историк Тимофей Алексеевич Молданов свои первые стихи начал писать в 90-ые годы прошлого столетия. Многие стихи переложены на песни. Сегодня мы предлагаем вам познакомиться с его новыми произведениями.
В стихотворении «Детям» автор даёт напутствие: помните о земле, где вы выросли. Будь с природою в согласье, береги её!
В стихотворении «Одинокая берёза» автор описывает тоску и грусть берёзки, которая стоит на продуваемых ветрах, сравнивает одинокую берёзку с сиротинушкой. Нет никакой радости стоять так в одиночестве.
Самобытный автор Нина Ефимовна Тарлина, в девичестве Ерныхова. В настоящее время живёт в посёлке Казыме Белоярского района. В 1998 году у неё появились первые стихи. Сегодня на суд читателей газеты «Ханты ясанг» она представляет новые стихи. В стихотворении она говорит о том, что перед ней слова великих хантыйских поэтов, прославивших наши края. Именно они ей дарят красивые мысли для поэзии.
Самобытная поэтесса из народа ханты Евдокия Тарлина, живёт и работает в посёлке Казыме, работает в Белоярском отделе Обско-угорского института прикладных исследований и разработок. Пишет стихи, многие из которых становятся песнями. В стихотворении «Сын ветра» она поэтично описывает сына ветра, который играет с водой, качает лодочки на волнах, обдувает волосы. Сын ветра – повелитель на воде, сила его способна поднять волны неимоверной высоты.
Полоса подготовлена Ульяной ДАНИЛО
Перевод на русский язык Людмилы ШУЛЬГИНОЙ
