Кәща ёх вєрӑт - Политика

Ёмвошн вәйт ӆор тыӆӑщн 30-мит хӑтӆӑн мўв иӆпи питы вуй вўты ёх мӑӊхӑтӆ еӆпийн кӑт хӑннєхә йиӆуп нємӑӊ кевӊӑн пўншсайӊӑн. «Югра хәсӑт», щит нефть па газ хуща рәпиттум хӑннєхәйӊӑн пӑта, ӆын каркама рәпитсӑӊӑн па ар мосты вєр вєрсӑӊӑн.

Тӑм тӑхийн УрФо хуща Российской Федерация президент ӆӑӊкӑр хә Владимир Яку­шев па Югра кәща нє Наталья Комарова м вўща ясӑӊ лупсӑӊӑн.

Мўӊ Югра округ вуӆаӊ вошевн вәйт ӆор тыӆӑщн оӆӑӊ хӑтӆ эвӑӆт 10-мит хӑтӆ вәнта Археопарк нємуп хӑр тӑхийн Уральской федеральной округ айӆат ёх «Аӆӑӊ – 2022» форум вєрман вәс. Ёмвоша иса 600 мойӊ хуят юхтыӆӑс. Ӆыв тыв Россия мўв 53 сўӊ эвӑӆт па  па хон пєлӑк мўв 14 сўӊ эвӑӆт юхтыйӆсӑт. Тӑм вән мирхот оӆӑӊӑн айкеӆӑт мира павӑтты пӑта тӑта яӊ хӑтӆ мӑр 100 муӆтас айкеӆат ӑкӑтты па айкеӆат хӑншты ёх рәпитсӑт.

Вәйт ӆор тыӆӑщ 22-мит хӑтӆӑн Ёмвош эвӑӆт Донецкой па Луганской Народной Республикайӊӑна па щи нётупсы китсы. 

Тӑм пўш щи вєр Юг­ра мўв «Единая Россия» партия ёх ӆэ­щӑтсӑт. Округ дума кәща хә Б. Хохряков ищи нётупсы ӑктӑс па китӑс. Ӆыв 20 тонна арсыр ӆє­тут Ростовской область нётупсы ӑкӑтты тӑхия кит­сӑт, щит хўӆ консервайт, кавӑртум воньщумутӑт, яньщты йиӊк па па ар ӆєтут. 

Вәйт ӆор тыӆӑщ 22-мит хӑтӆӑн Ёмвош ёх иса Россияев мир пиӆа Россия мўвев вот вой хӑтӆ постӑсӑт. 

Тӑм хӑтӆăн Борис Лосев парк хуща Ёмвош ёх вот войт пиӆа юхӑтсӑт. Мир еӆпийн «Еди­ная Рос­сия» партия ёх так яс­ӊӑт лупсӑт. «Молодая гвардия Единой России» нємпи оса тӑхи нє Елена Гилёва Россия мўвев вой вой нух аӆмиӆӑс.

Вәйт лор тыӆӑщн 18-мит хӑтӆӑн Российской Федерация президент па тарнӑӊ пӑнт операция тәты ёх пиӆа и нумӑсн вәӆты пӑта митинг-концерт вәс. Щи ӑктупсы Борис Лосев нємуп вәнт пай хуща вєрӑнтсы. 

Тӑм тӑхия мир ха ӑк­тӑсӑт па тӑм вєр Ёмвош кәща ёх ӆэщӑтсӑт.
Тыв Ёмвошн вәӆты арӑӊ ёх юхтыйӆсӑт.  

Ёмвошн вәйт ӆор тыӆӑщн 1-10-мит хӑтӆӑтн оӆӑӊ хӑтӆ эвӑӆт 10-мит хӑтӆ вәнта «Аӆӑӊ» нємуп айӆӑт ёх ӑктупсы вәс. Тӑм воша Россия мўв 53 сўӊӑт эвӑӆт 500 хӑннєхә юхтыйӆсӑт. Щи ёх кўтн 50 хӑннєхә щит экспертӑт па 100 хӑннєхә щит айкеӆ ӑкӑтты па хӑншты ёх.

Шуши мирӑт хӑтӆ вўраӊӑн м вўща ясӊӑт нынана китӆум. 

Мўӊ мўвевн арсыр мирӑт кўтэӆн и нумӑсн па ӆәхсӑӊа вәӆӆӑт. Мўӊ округев пӑта щит еӆӆы м па тумтак вәӆупсы.

Хӑнтэт, вухаӆят, юрнӑт йис вєрӑт, ясӊӑт, вәӆупсы щирӑт мўӊ Россия мўвев па иса мўвтєӆ мирӑт пӑта шєӊк мосӆӑт. Щит «Художественное от­кры­тие народов Севера» вєр тәты пурайн уша йис. Щи унтасн арсыр оса вєрӑт нётты питӆыйт, мӑта утӑт шуши мирӑт вәӆупсы па культура вєрӑт нух аӆумты пӑта ӆэщӑтсыйт. 

Югра мўвев ӛр, хән мўӊ йис вєрӑт ӑн юрємӑӆўв. Кўтэвн м нумӑсн, м щирн вәӆты питӆўв. 

«Мўӊ Налоговой кодекс хуща 217-мит статья тўӊматты щира хӑншсўв, – округ дума кәща хә Борис Хохряков лупӑс. – Мўӊ хӑншсўв, ӆәӆн федеральной бюджет эвӑӆт грант па субсидия нётупсы вухӑт вўты ёх налог ӑн сухуптӑсӑт.

Щи тумпи мўӊ депу­татӆўв Россия мў­вев труд по социальной защита вєрӑт тәты мини­стр хәя Антона Котякова хӑншсӑт. Мосӆ, ӆәӆн мўӊ Увӑс мўвевн рәпитум па ин рўтьщӑты ёха, хуйтат па мўвӑта вәӆты мӑнсӑт, ӆыв страховой пенсияй­ӆаӆн вән фиксированной выплата ат хӑщӑс».

Тӑм оӆ шәп Югра мўв 150 хуят округ дума кәща Борис Хох­ряков эвӑӆт арсыр вєрӑт оӆӑӊӑн иньщӑс­сӑт. Ар хуят Ёмвош, Нижневартовск па Сәрханӆ вошӑт эвӑӆт.

Мєт ар иньщӑсуп­сы: хӑннєхуятӑт вәӆупсыйн, рәпатайтн тывум сўртӑт тўӊматты оӆӑӊӑн, хот нўшайт па хотӑта потум, каврум йиӊк, нуви тўт, хошум мӑты вєр пӑта сухуптӑты вєрӑт оӆӑӊӑн.

Лыпӑт тыӆӑщ 30-митн Ёмвошн округ дума депутатӑт 10-мит мирхота ӑктӑщийӆсӑт.  Тӑм пўш мирхот кәщая Дума кәща ӆӑӊкӑр нє Наталья Западнова вәс. Сырыя ӑктӑщум хуятӑта ӆўв айкеӆ тәс, хуты лыпӑт тыӆӑщ 28-мит хӑтӑӆн Тюменской Дума кәща Сергей Корепанов ӑнтәма йис. Щи пӑта округ Дума мирхотн оӆӑӊӑн минута молчания вєрсы, тәп щи пийн путӑр тәсы.