Кәща ёх вєрӑт - Политика

Ас потты тыӆӑщ 22-мит хӑтӆӑн Ёмвошн шуши мирӑт ассамблея мирхот вәс. Щӑта депутатӑт Еремей Айпин, Татьяна Гоголева, Руслан Проводников, арсыр департаментӑт кәщайт ӑктӑщийӆсӑт.

Мирхотн хәӆум вєр оӆӑӊӑн путӑр мӑ­нӑс. Оӆӊӑӆн вухӑт ортты департамент кәща ӆӑӊ­кӑр нє Светлана Попкова путӑртӑс, муй арат вух ок­руг бюджет эвӑӆт 2023-мит па еӆӆы 2024-2025-мит оӆӑтн шуши мир вә­ӆупсы ӆыӆӊуптӑты вєрӑ­та сухуптӑӆы. 

Югра мўвев кәща нє Наталья Комарова Ас потты тыӆӑщ 3-мит хӑтӑӆн карты щўӊк мухты Нуви сӑӊхум район хуща вәӆты мир пиӆа путӑртӑс. Ӆўв ясӑӊӆаӆ щирн, щи район хуща вәӆты ай вошӑтн тӑм оӆн вет рўтьщӑты хурамӑӊ м хӑр лот ӆэщӑтсы.

Щӑӆта па Югра мў­вев кәща нє лупӑс, мӑтты тӑм рәпата ма вєрсӑт тӑм мўвн вәӆты ай па кўтуп бизнесн рәпит­ты ёх, щи киньща па тӑта кан щира рәпитты ёх вух ёша павӑтсӑт.
Тӑм вәйтантупсыйн На­талья Комарова лупӑс: 

Васы мӑнты тыӆӑщ 27-мит хӑтӆӑн округ дума 12-мит мирхот вәс, щит дума кәща хә Б.С. Хохряков тәс. Мирхот пурайн депутатӑт 31 вєр вантсӑт. Тӑм ванӑн Югра мўв оса тӑхийн йиӆуп 15 хуят пирисы, щирн тӑмхӑтӆ депутатӆўв щи вєр оӆӑӊӑн поступсы вўсӑт. Щи ёх хәӆум оӆ рәпитты питӆӑт.

Тӑмхӑтӆ округ бюд­жет тӑм оӆ па 2023-2024-мит оӆӊӑн пӑта ищи нух вантсы. Тӑм оӆн бюджетэв 13,4 милли­ард шойт вуха вәна йиӆ, 2023-мит оӆн – 135 миллион па 2024-мит оӆн – 65,2 миллион шойт вухн єнмӑӆ.

2022-мит оӆн лыпӑт хойты тыӆӑщ 29-мит хӑтӆӑн Ёмвошн округ дума 11-мит мирхот вєрсы. Депутатӑт 50 муӆтас мосты вєр нух вантсӑт.

Пириты хӑтӆ мӑнум пийн избирательной комиссия кәща хә Денис Корнеев айкеӆӑт хӑншты ёх пиӆа вәйтантыӆӑс. Лыпӑт хойты тыӆӑщ 11-мит хӑтӆӑн округевн вәӆты мир 13 вошӑтн па кәртӑтн кәщайт па 16 вошӑӊ па кәртӑӊ дума тӑхета депутатӑт пирисӑт. 

Терроризм пиӆа ӆаӆясты хӑтӆ ещаӆт Югра мўв Росгвардия ёх ванкўтӆы арсыр вәйтантупсэт ӆэщӑтӆӑт. 2004-мит оӆн лыпӑт хойты тыӆӑщ 1-3 хӑтӆăтн Беслан вошн террористической шәкӑӊ вєрн 300 муӆтас ухӆаӆ пунум хӑннєхә нәмӑӆмӑты щира вәйтантупсы ӆэщӑтсы. Щи пурайн ар вәнӆтӑты ёх па няврємӑт ăнтәма йисăт. Щи шәкӑӊ пӑӆтап вєр пăта сӑмӆўв ин вәнты кӑшитӆӑт.

Ёмвошн вәйт ӆор тыӆӑщн 30-мит хӑтӆӑн мўв иӆпи питы вуй вўты ёх мӑӊхӑтӆ еӆпийн кӑт хӑннєхә йиӆуп нємӑӊ кевӊӑн пўншсайӊӑн. «Югра хәсӑт», щит нефть па газ хуща рәпиттум хӑннєхәйӊӑн пӑта, ӆын каркама рәпитсӑӊӑн па ар мосты вєр вєрсӑӊӑн.

Тӑм тӑхийн УрФо хуща Российской Федерация президент ӆӑӊкӑр хә Владимир Яку­шев па Югра кәща нє Наталья Комарова м вўща ясӑӊ лупсӑӊӑн.

Мўӊ Югра округ вуӆаӊ вошевн вәйт ӆор тыӆӑщн оӆӑӊ хӑтӆ эвӑӆт 10-мит хӑтӆ вәнта Археопарк нємуп хӑр тӑхийн Уральской федеральной округ айӆат ёх «Аӆӑӊ – 2022» форум вєрман вәс. Ёмвоша иса 600 мойӊ хуят юхтыӆӑс. Ӆыв тыв Россия мўв 53 сўӊ эвӑӆт па  па хон пєлӑк мўв 14 сўӊ эвӑӆт юхтыйӆсӑт. Тӑм вән мирхот оӆӑӊӑн айкеӆӑт мира павӑтты пӑта тӑта яӊ хӑтӆ мӑр 100 муӆтас айкеӆат ӑкӑтты па айкеӆат хӑншты ёх рәпитсӑт.

Вәйт ӆор тыӆӑщ 22-мит хӑтӆӑн Ёмвош эвӑӆт Донецкой па Луганской Народной Республикайӊӑна па щи нётупсы китсы. 

Тӑм пўш щи вєр Юг­ра мўв «Единая Россия» партия ёх ӆэ­щӑтсӑт. Округ дума кәща хә Б. Хохряков ищи нётупсы ӑктӑс па китӑс. Ӆыв 20 тонна арсыр ӆє­тут Ростовской область нётупсы ӑкӑтты тӑхия кит­сӑт, щит хўӆ консервайт, кавӑртум воньщумутӑт, яньщты йиӊк па па ар ӆєтут. 

Вәйт ӆор тыӆӑщ 22-мит хӑтӆӑн Ёмвош ёх иса Россияев мир пиӆа Россия мўвев вот вой хӑтӆ постӑсӑт. 

Тӑм хӑтӆăн Борис Лосев парк хуща Ёмвош ёх вот войт пиӆа юхӑтсӑт. Мир еӆпийн «Еди­ная Рос­сия» партия ёх так яс­ӊӑт лупсӑт. «Молодая гвардия Единой России» нємпи оса тӑхи нє Елена Гилёва Россия мўвев вой вой нух аӆмиӆӑс.