Кәща ёх вєрӑт - Политика

Югра хуща поступсы хӑншса, муй тӑхета 2022-мит оӆн округев тӑйты вухӑт мӑнты питӆӑт. Па 2023-2024-мит оӆӊӑна ищи план хӑншман вәӆ. Тӑм нєпек мухты иса пўш вухӑт хӑннєхәйт вәӆты вәӆупсыя мӑнӆӑт.

Щи вєрӑт оӆӑӊӑн путӑртӑс вух ӆўӊӑтты департамент кәща, округ кәща лӑӊкӑр нє Вера Дюдина. Ӆўв ясӊӑӆн, щи государственной пос­тупсэт мир вєрӑт ма ӆэщӑтты пӑта вєрӆайт, щи вєрӑт кәщайӆўвн иса пўш вантман тӑйӆайт. Щи вєрӑта 70 % вух мӑнӆ, щит 2022-2024-мит оӆӑтн. Щӑӆта па вух ӆутаӆ кӑсӆы йиӆ, щи пӑта индек­сация мосӆ, тӑм оӆӑтн щит 4 % питӆ.

Ай тӑхет потты тыӆӑщ 7-мит хӑтӆӑн округ дума депутатӑт пирєсты вєр пийн оӆӑӊмит пўш ӑктӑщсӑт. Дума кәща хә пириты вәнты мєт пирӑщ депутат хә Еремей Айпин мирхот тәс.

Оӆӊӑӆн округевн пирєсты вєрӑт тә­ты тӑхи кәща хә Денис Корнеев путӑртӑс, хутыса Югра мўвевн пирєсупсы мӑнӑс. Округ думая 38 депутат пирисы. Ӆыв кўтэӆн 34 % йиӆуп хӑн­нєхә вәӆ. Интӑм думайн вет политической пар­тия рәпитӆ, щит «Еди­ная Россия», ЛДПР, «Спра­ведливая Россия – патриоты – за правду», КПРФ, «Российская пар­тия пенсионеров за со­циальную справед­ли­вость». 

Тӑм сўсн Россия мўвев ӆуваттыйн вән пирєсты вєр вәс. Ёмвош округев ӆуваттыйн хӑннєхуятӑт 8 бюллетень нєпек ёша хоӆумсӑт, Нуви сӑӊхум район Сосновка кәртӑӊ мир – 9 нєпек. Щит шєӊк ар. Ӛхӑт ӆавӑртшӑк ӆўӊӑтты вәс. Вантэ, мосӑс арсыр думайта 365 депутат па вет кәртӑтн кәщаяйт пириты.

Тӑм оӆ сўсн лыпӑт хойты тыӆӑщ 19-мит хӑтӆӑн Россия мўв ӆуваттыйн депутатӑт пириты питӆыйт. Щит Государственной думая – нивӑӆмит пўш, Тюменской область па Ёмвош округев думая – ӆапӑтмит пўш па районӑт па вошӑт дума тӑхета депутатӑт пириӆыйт. 

Ёмвош округевн 741 пи­риты тӑхи ӆэщӑтсы. Тӑм­хӑтӆ государственной ду­ма тӑхия округев эвӑӆт одномандатной щирн 19 кандидат хӑншаньщӑс, щит партияйт эвӑӆт – 17 хуят па кӑт хуят – ӆыв сат­тэӆа. 

Вәйт ӆор тыӆӑщ ртъяӊмит хӑтӑӆн Ёмвошн РИЦ «Югра» нємуп тӑхийн Урал мўвев Пре­зидент ӆӑӊкӑр хә Владимир Якушев мирхот вєрӑс, хута телевиденияйн, радивайн па га­зетаитн рәпитты хӑннєхуятӑта арсыр айкеӆӑт ӆўв рәпатайӆ оӆӑӊӑн вєрӑс. 

Тӑта мосванӑн, вәщ тыӆӑщ 27-мит хӑтӑӆн, Ёмвошн РИЦ «Югра» нємуп айкеӆӑт ӑкӑтты тӑхийн мирхот мӑнӑс. 

Щи пурайн пири­супсэт округев ӆу­ватн вєрты кәща хә Д. Корнеев, Югра мўвев Общественной штаб тӑхи кәща нє О. Сидорова, щӑӆта па «Независимый общественный монито­ринг» тӑхи кәща хә С. Ро­зенко, округев хўватн вәӆ­ты «Единая Россия» партия тӑхи сек­ретарь хә Б. Хохряков па Дума хот ЛДПР тӑхи кәща хә В. Сы­сун путӑртсӑт, муй щирн лыпӑт хойты тыӆӑщн пирєсты вєрӑт ӆэщӑтты. 

Вәщ тыӆӑщ 16-мит хӑтӆӑн Ёмвошн социальной заказ вєр оӆӑӊӑн мирхот вәс. Тӑм мирхотн Россия 19 мўв эвӑӆт федеральной экспертӑт рәпитсӑт. Щи тумпи Россия финансӑт министр ӆӑӊкӑр хә Алексей Лавров, труд па социальной зашиты министерства кәща ӆӑӊкӑр хә Елена Мухтиярова па ӛращты вєрӑт тәты министр кәща ӆӑӊкӑр хә Азат Кадыров вәсӑт. 

Муй щирн тӑм йисн рўтьщӑты вєрӑт тәса па тўӊщирӑӊа мўӊ округевн ӆэщӑтты питӆыйт, щи вєр оӆӑӊӑн Югра мўв кәща Наталья Комарова, Москва хон вош кәща Сергей Собянин па «Лукойл» нємуп мўв иӆпи тащ хоӆумты тӑхи кәща Вагит Алекперов кўтєӆн кашащты нєпек хӑншсӑт. 

Арсыр мўвӑӊ кәща ёх вәйтантупсы мӑнум пурайн Н. Комарова лупӑс, хуты Югра мўвн арсыр хӑн­нєхуятӑт пӑта ма рўть­щӑты щирӑт ӆэщӑтты вєр – щит шєӊк мосты па вуӆаӊ рәпата. 

Вәщ тыӆӑщн 7-мит хӑтӆӑн Югра мўв 6-мит созыв депутатӆўв 54-мит мирхота ӑктӑщсӑт. Тӑм мирхот карты щўӊкӑт мухты мӑнӑс. Депутатӆўв рәпитум мӑрн иса 600-кєм закон па 1700 сыр-сыр поступсы єтӑс.

Юхи хӑщум вәйтан­туп­сэӆн ищи мў­ве­ва мосты арсыр поступ­сэт олӑӊӑн путӑртсӑт па щи поступсэт вўсӑт.

Тӑм ванӑн вәщ тыӆӑщ хәӆмит хӑтӆӑн округ кәща нє Наталья Комарова Нефтеюганск вош хӑннєхуятӑт пиӆа онлайн щирн путӑртӑс.   

Ӆўв лупӑс, хуты ты­ӆӑщ мӑр «Инци­дент» нємпи вєр мухты Нефтеюганск вош хӑннє­хуятӑт нивӑӆъ­яӊ муӆтас арсыр иньщӑ­супсы кит­сӑт. Ӆыв вош хулэт, хот пўӊӆӑт, ӊхты ӛшӑт ӆэ­щӑтты оӆӑӊӑн хӑншсӑт.