Кәща ёх вєрӑт - Политика

Мӑнум тыӆӑщ 25-мит хӑтӆӑн Ёмвошн шуши мирӑт Ассамблея мирхот вәс. Щӑта округ Дума депутатӑт кӑт поступсы нух вантсӑт. Шуши мирӑт Ассамблея кәща хә Еремей Айпин путӑртӑс, хутыса 2024-мит оӆн округ Дума депутатӑт рәпитсӑт.

Мўвев ӆавӑӆты ёх мӑӊхӑтӆ пӑта Югра мўв губернатор хә Руслан Кухарук СВО хуща ӆаӆь хӑрн вәӆты ёха мойӆупсэт па нётупсэт китӑс. Щит военной карты әхӆӑт, дронӑт, х эвӑтты электрической картэт, пӑтлам тәрумн вантты приборӑт, лекщитты па мӑӆты пуртәнӑт па па сыр-сыр утӑт. Щи пийн китум нётупсэт иха ӑкӑтты па тӑйты нємасыя склад хуща щитӆаӆ нух вантты щира ӊхӑс.  

Мўвев ӆавӑӆты ёх мӑӊхӑтӑӆн мўӊ ар сӑмӑӊ па хошум ясӊӑт лупты ӆӑӊхаӆўв. Мўвев ӆавӑӆты ёх – щит ӛрӑӊ, вещкат па пӑӆтапӆы хуятӑт.
Ас нопӑтты тыӆӑщн Ву­ӆаӊ ӆаӆьн нух питум хӑтӆ вўш эвӑӆт 80 оӆ пос­тӑӆўв. Вуӆаӊ Оте­чественной ӆаӆя ӊхум, ӆаӆь хӑрн ухӆаӆ пунум па ӆаӆь пӑта тарма рәпитум ёх мўӊ век­кеши нәмты питӆӑӆўв. Россия мўв президент хә Владимир Путин партупсы щирн 2025-мит оӆ «Мўвев ӆавӑӆты ёх оӆа» аӆьщӑсы. Тӑмхӑтӆ мўӊ сӑмӆўв, мўӊ нумӑсӆўв СВО хуща мўвев пӑта таранӆӑты ёх пиӆа. Ӆыв пӑӆтапӆы, ӛрӑӊа па хӑр­щия Россия мўвев вуракӑт эвӑӆт ӆавӑӆӆат.

Сәрханӆ воша ӊхмаӆн округ кәща хә Руслан Кухарук учёной ёх па айӆат хуятӑт пиӆа вәйтантыӆӑс. Тӑм вәйтантупсы Россия мўв наука хӑтӆа постӑсы. Щив ӑктӑщум мир научной проектӆаӆ, презентацияйт, айӆат ёх рәпата вєрӑт  ванӆтӑсӑт, мӑта утӑт Сәрханӆ государственной университетн ӆэщӑтӆыйт. 

Ас хӑӆты тыӆӑщн 30-мит хӑтӆӑн округ кәща хәев Руслан Кухарук Нуви сӑӊхум района рәпатайӆ щирн ӊхӑс. Нуви сӑӊхум район хуща «Безопасная Арктика -2025» вєр мӑнӑс. 

Щимӑщ вәнӆтӑты тӑхи, щит вєра вевтам вєр ки тывӆ, ӆәӆн мосты тӑхет, мосты службаит мсыева ат рәпитсӑт. Щимӑщ вәнӆ­тӑты вєрӑт округ кәща па арсыр службаит кәща ёхн ӆэщӑтсыйт. Ӆыв района юхтыйӆсӑт па вантсӑт, муй вўрн щи вєрӑт тӑта ӆэщӑтман вәӆӆӑт.

Щи оӆӑӊӑн путӑртӑс округ кәща хә Руслан Кухарук мирхотн, хута «Герои Югры» вәнӆтӑты вєр оӆӑӊӑн путӑр тәсы. Щи вєр СВО тӑхийн ӆаӆясум ёх пӑта ӆэщӑтӆа, щит Россия президент хә Владимир Путин партупсы щирн вєрӆа. Щи вєр унтасн СВО тӑхийн ӆаӆясум хуятӑт сыр-сыр кәща вєрӑта вәнӆтӑты питӆыйт. 

Тәнӆуп тыӆӑщ оӆӑӊ­мит хӑтӆӑн щи ёх эвӑӆт заявка-нєпекӑт вўты вуӆытсы. Иса округевн 476 хуят щи программа хўват вәнӆтыйӆты ӆӑӊхаӆӑт. Руслан Кухарук ясӑӊ щирн, щи ёх еӆӆы округев кадровой резерва ӆуӊӆӑт.

Мӑнум оӆ ван хӑтӆуп тыӆӑщн Ёмвошн «Югра» нємуп тӑхийн айкеӆӑт ӑкӑтты хӑннєхуятӑт округев «Мўвев ӆавӑӆты ёх» тӑхи кәща хә Игорь Илык пиӆа вәйтантыйӆсӑт.

Щи оӆӑӊӑн Россия мўвев кәща хә Владимир Путин лупӑс. Тӑм айкеӆ округ дума кәща хә Борис Хохряков Югра мўвев вошӑт кәщайт па округ дума депутатӑт 27-мит координационной мирхот пурайн тәс. 

- Россия мўвев кәща хә Владимир Путин ястӑс – нумсӑӊ айӆат ёх арсыр мосты вєрӑта вәнӆтӑты па нётты мосӆ. Тӑм йис айӆат хуятӑта нух питум ёх эвӑӆт рәт мўвев сӑмӑӊа тӑйты вәнӆтыйӆты мосӆ, – еӆӆы округ дума кәща хә Борис Хохряков ястӑс. 

Мӑнум оӆ юхи хӑщум хӑтӆӑтн Ёмвошн округ дума 41-мит мирхот вәс. Депутатӑт щи мирхотн арсыр мосты вєрӑт оӆӑӊӑн путӑртсӑт па мосты поступсэт вўсӑт. 

Тӑм мирхотн «О взаи­модействии ор­ганов государственной власти Ханты-Мансийского ав­тономного округа – Юг­ры с Ассоциацией «Со­вет муниципальных образований Ханты-Мансийского автоном­ного округа – Югры» поступсы вўсы. Щит ок­руг правительства за­конодательной ини­циа­тива щирн тывӑс. Округ кәща хә Руслан Кухарук щи оӆӑӊӑн лупӑс:

Ёмвошн ван хӑтӆуп тыӆӑщн 18-мит хӑтӆӑн округ шуши мирӑт Ассамблея хәӆумъяӊмит ӑктупсы вәс. Щӑта кӑт вєр оӆӑӊӑн путӑр мӑнӑс. И вєр щит муй арат вух па оӆн округев тӑйты питӆ па муй тӑхия щи вухӑт мӑнӆӑт. Кимӑт вєр – муй вўрн мўв иӆпи тащӑт пиӆа рәпитты ёхӆўв вєрӑт Югра хуща па щирашӑк вєрты.