Кәща ёх вєрӑт - Политика

Ван хăтӆуп тыӆăщ 14-мит хăтӆăн Россия мўв кәща ики Владимир Путин айкеӑт ӑкӑтты ёха тăм оӆн тывум арсыр вєрăт оӆӑӊӑн путӑртӑс. Нӆ щос па нӆ минута мӑр Россия ӆуваттыйн рәпитты окружной, республиканской па федеральной айт ӆэщăтты тăхет эвӑт юхтум ёх кәщаев эвăӆт 67 арат вєр оӆӑӊӑн иньщӑссăт.

Щиты вуӆаӊ кәщаев лупăс, 2023-мит оӆн Россия мўв хўват­тыйн рәпата ӑн тăйты ёх 2,9 процент арат тәп нух хăншман вәӆ. Щит вєра вән амăт, вантэ, и­ха катӆăсман тăм нўша тўӊматты вєритсы.

2024-мит оӆн рәпитты хăннєхә тыӆăщ мăр ёша вўты вух нивӆ процента єнумӆ.

Оӆэв хуӆаты еӆпийн Ёмвошн кӑт ӑктупсы вәс. Ван хӑтӆуп тыӆӑщ 13-мит хӑтӆӑн Югра дума хуща вәӆты ассамблея 21-мит ӑктупсы вәс. Ӛхӑт хӑтӆ па ищи ван хӑтӆуп тыӆӑщн 14-мит хӑтӆӑн округ дума 27-мит ӑктупсы вєрӑнтсы.

Щи оӆӑӊӑн округ рәпата вєрӑт тәты департамент кәща хә Роман Белкин онлайн щирн ӆэщӑтум мирхот пурайн ястӑс. Щит округ вәӆупсы ӆэщӑтты тӑхи редактор нє Альбина Волкова тәс. Роман Белкин лупӑс, муй щирн округев хӑннєхуятӑта рәпата мӑты вєр ӆэщӑтман вәӆ:

 Тӑм оӆ Югра мўвевн рәпата ӑн тӑйты ёх шим­ӆа йис – 0,29%, щиты Рос­сия мўвев ӆуваттыйн мўӊ нӆмит тӑхийн вәӆӆўв. Щи вєр мўвтєӆ мир рәпата ӆэ­щӑтты тӑхи ёх щирн, мўӊ округев 10-мит тӑхийн вәӆ. Интӑм «Работа в России» портал хуща 23 щурӑс рәпата оӆӑӊӑн хӑншман вәӆ.

Ас потты тыӆӑщ 28-мит хӑтӆӑн вәнӆтӑ­ты вєрӑт тәты департамент кәща хә Алексей Дренин онлайн щирн рәпата вєр­ӆаӆ оӆӑӊӑн путӑртӑс, округ мир иньщӑсупсэта ястӑс.

Оӆӊӑӆн ӆўв путӑртӑс, хутыса 2023-мит оӆ мӑнӑс, муйсӑр йиӆуп вє­рӑт тӑм оӆн тывсӑт:

Ас потты тыӆӑщ 23-мит хӑтӆӑн он­лайн щирн Югра социальной развития де­партамент тӑхи кәща ӆӑӊкӑр нє Светлана Круглова пиӆа вәйтантупсы вәс. Ӆўв тӑм оӆ мӑнты рәпатаеӆ оӆӑӊӑн путӑртӑс. 

Щи оӆӑӊӑн вән мирхотн уша павӑтсўв, хута округ кәща нє Наталья Комарова путӑртӑс, хутыса правительстваев тӑм 2023-мит оӆн рәпитӑс, муйсӑр йиӆуп вєрӑт тӑм оӆн округевн тывсӑт. Мирхот Ас потты тыӆӑщ 28-мит хӑтӆӑн округ дума 26-мит мирхот пурайн вәс.

Щи мирхот еӆпийн округ кәщаев Юг­ра мўвев хўваттыйн иса вошӑта ӊхӑс, мир пиӆа вәйтантыӆӑс. Щӑта уша павтум вєрӑт оӆӑӊӑн ӆўв интӑм мирхотн путӑртӑс. Округ мир пӑта щит шєӊк мосты вєрӑт.

Ас потты тыӆӑщ 27-мит хӑтӆӑн округ дума Ассамблея ёх мирхота ӑктӑщийӆсӑт па 29-мит хӑтӆӑн дума кӑт мирхотӊӑн вәсӊӑн. Щи пурайн йиӆуп оӆа округ бюджет вўсы па па арсыр мосты вєрӑт нух вантсыйт. 

Ас потты тыӆӑщ 23-мит хӑтӆӑн Москва хон вошн ВДНХ тӑхийн «Россия» вуӆаӊ хӑрн Ёмвош округев вєрӑт ванӆтӑсыйт. Тӑм вуӆаӊ хӑрн иса Россия 89 мўвӑт ӆыв тәс вєрӆаӆ ванӆтӑӆӑт. Мўӊ Югра мўвев оӆӑӊӑн округ кәща нє Наталья Комарова путӑртӑс. 

Щив юхтум мира вў­ща ясӊӑт Уральс­кой федеральной округ кәща хә Владимир Якушев лупӑс. 

- Урал мўв мўӊ Россия мўвев пӑта так шӑнш пєлӑк, Югра па Ямал мўвӊӑн, щит энергетической сӑмӊӑн. Тӑм мўвӊӑн хущи ӑнтә тәп мўв иӆпи тащ нух вў­ӆы, тӑта хурамӑӊ вошӑт омӑсӆыйт па ӑӆ мир пӑта мосты вєрӑт ӆэщӑтӆыйт, – лупӑс В. Якушев.

Тӑм ванӑн Югра мўвевн Росгвардия айкеӆӑт ӑкӑтты тӑхи хуятӑт «Россия мўвев таксар ёх!» вєрн ясӑӊ тәсӑт, муй пӑта Советской вошн и вош хўлы младший сержант Александр Бузин нємн пунса. Ӆўв мєт оӆӑӊ мўӊ мўвевн «Золотая звезда» нємуп вуӆаӊ мевӆ посн мойӆӑсы. 

Кәща ёх па ӆўв пиӆэӆа рәпитты хуятӑт ӑк­тӑщ­сӑт па Валентина Ва­лентиновна Бузина ӑӊкеӆ ими, рәт ёхӆаӆ, вәйтты ёхӆаӆ пиӆа вәйтантсӑт, ӆыв ӆәмӑтты сухӆаӆ па ӆўв хӑншум пищмайӆаӆ вантсӑт па Картопья тӑ­хийн ӆўв нємӑӆн пунум вош хўлыя ӊхсӑт.

Ас потты тыӆӑщ 30-мит хӑтӆӑн Югра мўвев кәща нє Наталья Комарова мир ещаӆт, округ дума депутатӑт па оса вєрӑт тәты ёх ещаӆт ясӑӊ тәты питӆ. Ӆўв путӑртӑӆ, хутыса 2023-мит оӆ мӑнӑс, муйсӑр м вєрӑт щи оӆн вәсӑт, муйсӑр вєрӑт әхтыйн кәща ёхӆўв еӆӆы питты 2024-мит оӆн кӑпӑртты питӆӑт.