Шуши мирев культура - Культура обско-угорских народов

Муй щирн па хуты «Тыӆӑщ поры» Югра мўвев ӆуваттыйн постӑты питса, щи вєр пӑта тӑта мосвӑнӑн нємасыя «Торум Маа» йис пурмӑсӑт шавиты хотэвн  научной рәпатнека вәӆты нє Наталья Евгеньевна Краснопеева (Новьюхова) пиӆа вәйтантыйӆсум па путрємӑсум. 

- Наталья Евгеньевна, муй щирн «Тыӆӑщ поры» йис вўш эвӑӆт мўӊ хуятӆўв вєрсӑт па хуты тӑм йисн округ мўвев ӆуваттыйн ӆўв шуши мирӑтн постӑӆы?

Увӑс мирев йис вәӆупсыйн вухаӆь ёх па хӑнтэт йис нумӑсн тухӆӑӊ войт вєра ар митра, ар пищ тӑйӆӑт. Тӑм мўв мирев йис ясӑӊӑн, йис путрӑтн, йис арӑтн иса пўш тухӆӑӊ войт пойкщуман вәӆӆӑт. Йис ёхӆўвн ӆыв «тухӆӑӊ войта», «тухӆӑӊ ар сота» аӆьщӑсыйт. Арӑт па моньщӑт хуща ӆыв «Тухӆӑӊ ар сот, кўрӑӊ ар сот», «Рахӆа шашпи тухӆӑӊ ар сот», «Хӑтӆ суй єтты пєлкиевна вәӆты тухӆӑӊ ари сот, нәмӑӆта ӆатты тухӆӑӊ ари сот» па па ар щира арисайт-путӑртсайт.

Щимӑщ нєм кӑсупсы тӑйс, мӑта ут тәняӆ мўӊ редакцияев ӆэщӑтӑс. Тӑмхӑтӆ мўӊ нынӑна, няврємӑт, нын ӆуват эвет-пухӑт оӆӑӊӑн хӑншӆўв. Ӆыв айтєӆн йис путрӑт, моньщӑт хәӆӑнт­ты па хурӑт хӑншты мосман тӑйӆӑт. Кӑсман ӆыв нух питсӑт.

6-12 оӆ ӆуват нух пи­тум няврємӑт:
1-мит тӑхи – Лев Суль­манов, Ёмвош;
2-мит тӑхи – Лев Горлов, Мегион вош;
3-мит тӑхи – Кирилл Плеханов Ёмвош.

Ёмвошн «Торум Маа» нємуп музей хуща лыпӑт тыӆӑщн 3-мит хӑтӆ эвӑӆт 7-мит хӑтӆ вәнта няврємӑт па айӆат ёх пӑта «Таксар Махум» нємуп ӑктупсы вәс. Щит музей хуща ӆўӊ тәрумн вєрты проект, тыв арсыр нәптӑӊ няврємӑт па айӆат ёх юхтыйӆӆӑт, 6 оӆа вум няврємӑт па 18 оӆа вум айӆат ёх ищи юхӑтты каш ки тӑйӆӑт, юхтыйӆӆӑт. Тӑмӑщ ӑктупсы кашӑӊ ӆўӊ вєрӑнтӆа, 2015-мит оӆ эвӑӆт вєрты оӆӊитса.

Мўӊ хущева тӑм мєт оӆӑӊ проект, тӑмӑщ вухӑӊ вєр мўӊ мєт оӆӑӊ пўш ёша павӑтсўв, щит Югра кәща грант мухты вєрты вєрев. Мўӊ «Арт-мастерская» нємуп тӑхев хуща няврємӑт ха ӑкӑтӆӑӆўв па хӑнты хӑншет вєрты хущӆӑӆўв. Щиты щи йис ёх вєрӑта, хӑншӑӊ вєрӑта интернат хуща вәӆты, ӑшколайн вәнӆтыйӆты няврємӑт айӆта кєрӑтӆӑӆўв.

Вән кєр тыӆӑщ 25-мит хӑтӑӆн «Торум Маа» йис пурмӑсӑт тӑйты хот йитн  Ёмвошн иха ӑктӑщум шуши мир хӑннєхуятӑт литературной вәйтантупсы ӆэщӑтсӑт. Щи етнхот ӆыв Прокопий Ермолаевич Салтыков – хӑнты мирев поэт шәӊӑт 90-мит оӆа вум хӑтӆа постӑсӑт. 

«Вўща вәӆа, хӑнум», – щиты хӑнтэтн тӑм поэт хәев катра пурайн аӆьщӑсы.

Вуӆаӊ Победа хăтӆ постăты вўраӊăн Увӑс мўв, Сибирь па Дальний Восток шуши мирӑт Ассоциация ёх нумса юхăтсăт «Победа хăтӆ» нємпи ар увăс мирăт ясӊăта тулмащтăты, ӆәӆн щит рәт ясӊăтн ариты. Щиты ӆыв мўвтєӆ акция хуща пиӆтăщсăт, мăта ут Россия мўв ӆуваттыйн 2020-мит оӆн «Победа хăтӆа нётты ёх» нємпи оса тăхи ӆэщăтсы.

Москва вошн ВДНХ хуща «Рабочий и колхозница» хотн «Трудовые династии» нємпи ванӆтупсы пўншсы. Щӑта Ёмвош округевн ар оӆ мӑр тәса рәпитты рәтӑт мира ванӆтӑсыйт. Ӆыв кўтэӆн шуши ёх ищи вәӆӆӑт. Щит Россия мўвев кәща Владимир Путин поступсы щирн вєрӑнтсы.

Касум мўвн ар хуят вәӆ, хуйтат арсыр м па мосты вєрӑт вєрӆӑт, щӑта вәӆ­ты музея нётӆӑт. Лариса Алек­сеевна Ерныхова ищи Касум музей хотн волонтёра вәӆ. Ӆўв щӑта мӑӊхӑтӆӑт пурайн нётыйӆ. Тӑм пўш Вўӆєӊ ёх мӑӊхӑтӆ пурайн «Моньщ хот» тӑхийн хӑнты моньщӑт моньщӑс. 

Тӑта мосванӑн вән кєр тыӆӑщ 18-мит хӑтӑӆн Ёмвош Государственной киникайт ӆўӊӑтты хот йитн ар пєлӑк эвӑӆт иха юхтум вошӑӊ хӑннєхуятӑт ӑктӑщийӆсӑт. Щи етнхотэӆ вєрум пурайн юрн мир шәӊӑт поэт хә «Юрий Вэӆӆа. Избранное» нємуп йиӆпа хӑншум киникаеӆ ванӆтупсы нємасыя щи ӆэщӑтсы.