Шуши мирев культура - Культура обско-угорских народов

Мегион вошн вәйт ӆор тыӆӑщ 22-мит хӑтӆ эвӑӆт 24-мит хӑтӆ вўша «Хӑтӆые» нємуп X-мит ӑктупсы вәс. Кашӑӊ оӆ тӑм ӑктупсы «Экоцентр» тӑхи ёх ӆэщӑтӆӑт. Ӆывеӆа «Торум Маа», «Мўв-авӑт па Хӑннєхә» музейӊӑн па «Дворец искусств» тӑхетн рәпитты хуятӑт нётӆӑт. Тӑм мирхот вєрты пӑта округ кәща грант мухты вух ёша павӑтсӑт. Щӑӆта па Югра дума депутатӊӑн Еремей Айпин, Татьяна Гоголева, Тюменской областной дума депутат Анатолий Чепайкин, округ мир творчества хот па «Нъёхэс» («Соболь») тӑхеӊӑн ёх вухн нётсӑт.

Тӑм пўш вәйт ӆор тыӆӑщ 22-24-мит хӑтӆӑтн Нижневартовской район Мегион вошн «Хӑтӆые» («Қӓтӆәли») нємпи яӊмит мӑӊхӑтӆ вәс. Тӑм фестиваль мӑнты пурайн «Югра – диалог поколений» научно-практической конференция вєрсы.

Тӑмӑщ вән мирхота Новосибирск, Екате­ринбург, Нижневартовск, Ханты-Мансийск вошӑт эвӑӆт ар учёной ёх, эт­нографӑт, археологӑт, линг­вистӑт  юхтыйӆсӑт.

Новосибирск вош эвӑӆт филологической наукайт доктор нє Наталья Борисовна Кошкарёва ясӑӊ тәс, муй пура вўш эвӑӆт хӑтӆ єтты пєлӑкн «Пўпи як хот» оӆӑ­ӊӑн учёной ёх нєпека хӑншты питсӑт.

Ас нопӑтты тыӆӑщ 19-мит хӑтӆ вўш эвӑӆт па 23-мит хӑтӆ вәнты Югра мўвев ӆуваттыйн III-мит финно-угорской мир писателят вәйтантупсы вәс. Сырыя киникайт хӑншты хӑннєхәйт Ёмвошн рәпитсӑт, еша ӛхӑтшӑк «Силава» нємуп этнопарк тӑхи ванттыя Кондинской района тәсыйт. 

Ёмвошн 2017-мит оӆ вўш эвӑӆт Округ творчества хот хуща пўпи якты ӑшкола вәӆ. Щит вєрӑс па оӆӑӊ ух тәты хәя Тимофей Алексеевич Молданов вәс. Тәнӆуп тыӆӑщн 2025-мит оӆн ух тәты хәя Пётр Тимофеевич Молданов павӑтса.

Щимӑщ нєм тӑйс етнхот, мӑта ут Мўвтєӆ шуши мир мӑӊхӑтӆ пурайн, вәйт ӆор тыӆӑщ 9-мит хӑтӆӑн, «Торум Маа» нємпи йис пурмӑсӑт ӆавӑӆты тӑхийн ӆэщӑтман вәс. Тыв Ёмвошӑӊ ёх па мойӊ мир юхтыйӆсӑт.

Мєт сыры хәӊхэп хў­ват шәшман хурӑӊ ванӆтупсы шиваӆӑсум. Щит, нєш, Ёмвошӑӊ хур вєрты ими Наталья Пру­тяну вєрум хурӆаӆ. Ӆўв Ёмвошн арсыр шуши мир мӑӊхӑтӆӑтн па кӑсупсэтн нємасыя хӑнты, вухаӆь па юрн хӑннєхуятӑт хурӑт вўс. Ин щитӑт вантсўв.

Арсыр увӑс мирӑт кўтн ар щимӑщ хуят вәӆ, хуйтат сыр-сыр вєрӑт тәса вєрты хошӆӑт. Итәх хӑннєхуятӑт ма хурӑт хӑншӆӑт, тәса па хурамӑӊа ариӆӑт, якӆӑт, шўкщӑӆӑт, ёнтӑсӆӑт, әмӑщ пурмӑсӑт вєрӆӑт. 
Саха (Якутия) мўвн ищи щимӑщ хӑннєхә вәӆ, щит хурӑт хӑншты хә Юрий Спиридонов. Тӑм оӆ тови сухӑнтты еӆпийн Ас нопӑтты тыӆӑщн Санкт-Петербург вошн, хән Увӑс мирӑт институт 95 оӆ постӑсўв, ӆўв пиӆэӆа вәйтантупсы вәс. 

Тӑта мосванӑн, вәйт ӆор тыӆӑщ 9-мит хӑтӆ вўш эвӑӆт па 10-мит хӑтӆ вәнты, Ёмвошн Югра мўвев Ремёслайт хотн наука щирн щи тӑхи кәщайт нємасыя вәйтантупсы вєрсӑт, мӑта ут пурайн иха арсыр кәртӑт па вошӑт эвӑӆт ӑктӑщум хӑннєхуятӑт вой ӆўвӑт эвӑӆт сыр-сыр пурмӑсӑт эвӑтты вәнӆтӑсыйт.

Сўмӑтвошн рәпатам щирн вәӆмємн шуши мирӑт тӑхи кәща нє Калерия Акрамовна Супрун пиӆа вәйтантыйӆсум па уша вєрсум, хуты ӆыв рәпитӆӑт. Мосӆ лупты, хуты Калерия Супрун юхи хӑщум оӆӑтн ӑнтә тәп шуши нєӊӑт ёнтӑсты па вєрӑнтты тӑхи кәща нєӊа вәӆ. Ӆўв ясӑӊӆаӆ эвӑӆт уша павӑтсум, муй щирн Сўмӑтвош район ӆуваттыйн ӆэщӑтум «Югра ӆыӆӊуптӑты» па «Рәт махум» нємуп некоммерческой тӑхеӊӑн хуща ищиты кәща кана сыр-сыр рәпата тўӊщирӑӊа па мсыева кашӑӊ оӆ мӑр арсыр хӑннєхуятӑт пиӆа вєрӆ.

Вәщ тыӆӑщ 23-мит хӑтӆӑн 45 оӆ юхӆы Мегион кәрт эвӑӆт воша йис. Щит пӑта 26-мит хӑтӆӑн мӑӊхӑтӆ ӆэщӑтсы. Щи пурайн ар оӆ вошн рәпитум ёх Мегион вош кәща хә Алексей Петриченко эвӑӆт ишӑкты нєпекӑт па мевӆ посӑт ёша хоӆумсӑт. Щиты хӑнты ими, «Ветеран труда» нєм тăйты нє, «Югра ӆыӆӊуптӑты» оса тӑхия ӆуӊты ими Мария Константиновна Туркина «Почётный житель города Мегиона» йис.

Щиты лупӑс якут мир вәна пєлка вум ими Диана Гаврильевна Павлова. Ма ӆўв пиӆэӆа Санкт-Петербург вошн Увӑс мирӑт имет оӆӑӊмит форум-мирхот пурайн вәйтантыйӆ­сум па путӑртсум.

Диана Гаврильевна, еша нӑӊ оӆӊенӑн путӑрта!