Айкеԯӑт - Новости

Югра мўв вәнт шушийн па хўв тӑхийн омӑсты ай кәртӑтн вәӆты шуши мирӆўва коронавирус мәш эвӑт пуртән оньщты вєр оңитсы. Щи оӆӑӊӑн мир мӑӆты па лекщитты вєрӑт вантман тӑйты департамент кәща Алексей Добровольский интернет щирн Insnagram хуща айкеӆ тәс. 

Ай кєр тыӑщ 23-27-мит хӑтӑтн Ниж­невартовск вошн округ ӆуваттыйн няврємӑт вәнтӑты па авӑты хуятӑт кўтн «Педагог года Югры – 2021» нємпи вән кӑсупсыя ӑк­тӑщийӆсӑт. Иха ӆўӊӑтты ки, округ арсыр вошӑт эвӑт 70 вәнӆтӑты вєрӑт тәты хӑннєхә кўтэӆн нивӑӆ вєр хўват кӑссӑт. 

Тӑм ванӑн ай кєр тыӆӑщн 25-мит хӑтӑӆн «Югра» айкеԯӑт ӑкӑтты хотн вәйтантупсы вәс. Тыв Югра мўв Росгвардия Управления кәща хә, полиция полковник Евгений Симаков юхтӑс па путӑртӑс.

2020-мит оӆн Уральской федеральной округ ху­ща Югра Росгвардия уп­равления кӑсупсыйн ки­мӑт тӑхи ёша павтӑс, иса тӑм хурасуп хәт тӑхи эваӆт ёх кӑссӑт.

Устав поступсы щирн, «Титул» нємуп акционерной тӑхи кәща ёх 2021-мит оӆн вән кєр тыӆӑщ 26-мит хӑтӑӆн вән мирхот ӆэщӑтты вўтьщӑӆӑт.

Щи мирхотн кәщайт путӑртӆӑт:

- Муй щирн па хуты тӑм юхи хӑщум оӆ мӑр ӆыв рәпитсӑт, муй щирн ӆыв вухӑт аршӑка вєрсӑт, мӑта тӑхета вух сухуптӑсӑт.

- Аудитор хә йиӆпа пириты вєр оӆӑӊӑн.

Тӑм ванӑн «Югра» айкеԯӑт ӑкӑтты хотн государственной инспекция ёх пиԯа вәйтантупсы вәс. Тыв инспекция кәща хә Максим Новичков, рәпата закон щира ӆэщӑтты ӆӑӊкӑр нє Ольга Ионкина, рәпата вєрӑт м щира ӆэщӑтты ӆӑӊкӑр хә Андрей Ульянов юхтыйӆсӑт. Ӆыв путӑртсӑт, муй вўрн тӑм мӑнум оӆн округев хуща рәпата вєрӑт вантман тӑйсайт.

Ай кєр тыӆӑщ 11-митн Москва хон вошевн арсыр ясӊӑт вәнӆтӑты научной институт хуща мўӊ кӑтӊӑӆўв Ирина Молданова па Римма Потпот (Тользина) диссертация нєпекңӑԯӑн ванԯтӑсӊӑн. 

Ай кєр тыӆӑщ 25-митн Ёмвошн округ дума 50-мит мирхот вәс. Депутатӑт 22 вєр нух вантсӑт.

Щи еӆпийн 23-мит хӑт­ӆӑн шуши мирӑт ассамблея депутатӑт ищи мирхота ӑктӑщийӆсӑт. Ӆыв айӆат ёх пӑта вє­рум йи­ӆуп поступсы оӆӑ­­ӊӑн пу­тӑртсӑт. Щӑӆта округ ад­во­катской палата кәща хә Валерий Филатов ясӑң тәс, хутыса ӆыв мӑнум оӆн рәпитсӑт. 

Югра мўвевн 678 адвокат рәпитӆ, ӆыв иса хуятӑта па щи кўтн шуши мирева мосты вєрӑтн нётӆӑт. 

Тәнӆуп тыӆӑщн айкеӆӑт ӑкӑтты ёх Нягань вошӑӊ «Патриот» тӑхи кәща хә Игорь Илык, округев рўтьщӑты тӑхет кәща кана промышленность департамент хуща вәӆты нє Юлия Резчикова па Югра мўв Губернатор грант вух ёша павтум хә Александр Коломиец пиӆа вәйтантыйӆсӑт. 

Тәнӆуп тыӆӑщ 28-мит хӑтӆӑн Ёмвошн няврємӑт вәнԯтӑты этнокультурной образователь­ной центр хуща вәйтантупсы вәс.  Ёх ха ӑкумсӑт А.Н. Лоскутов оӆӑӊӑн путӑртты пӑта, тӑм хӑннєхә 115 оӆ юхӆы сєма питӑс. Тӑм путӑртты тӑхия вәна вум вән найӊӑн М.К. Волдина па Е.А. Нёмысова юхӑтсӑӊӑн. Щи киньща няврємӑт вәнӆтӑты ёх па айӆат ёх вәсӑт.  

Тәнӆуп тыӆӑщ 26-28-мит хӑтӆӑтн Москва хон вошевн Россия мўвев ӆуваттыйн няврємӑт рәт па рўщ ясӊӑта вәнӆтӑты 60 хуят вән мирхота ӑктӑщсӑт. 

Тӑм оӆ щи мирхот мўвтєӆ мир нєм тӑйты питӑс, вантэ, щӑта Белоруссия, Луганской па Донецкой Народной Республикайӊӑн учителят вәсӑт.