Айкеԯӑт - Новости

Ай кєр тыӆӑщ 9-митн Югра мўв ӑшколайн вәнӆтыйӆты няврємӑт пӑта рәт ясӊӑт щирн олимпиада вєр ӆэщӑтсы. Кўтэӆн 9-11-мит классӑтн вәнӆтыйӆты няврємӑт онлайн щирн кӑссӑт. 

Иса хӑнты ясӑӊӑн 13 няврєм вәс, вухаӆь ясӑӊӑн – 5 хуят. Хӑнты ясӑӊ әхтыйн Нуви сӑӊ­хум, Сўмӑтвош, Сәрханӆ, Нижневартовской райо­нӑт эвӑӆт айӆат ёх кӑссӑт. Вухаӆь  ясӑӊӑн –  Октябрь­ской па Кондин­ской рай­о­нӑт эвӑӆт няврє­мӑт хӑншсӑт.

Ай кєр тыӆӑщ 2021-мит оӆн «Югра» нємпи айкеӆӑт ӑкӑтты хотн мир мӑӆты вєр тәты округ департамент кәща хә Алексей Добровольский, Ёмвош округ пәӆьница кәща нє Елена Кутефа, сӑм омӑсты хирург Сергей Сафронов па хӑннєхә ӆўвӆаӆ-сомӆаӆ омӑсты вєр тәты хә Михаил Скоробогатов пиӆа вәйтантупсы вәс. Мойӊ ёх путӑртсӑт, хутыса Югра мўвевн хӑннєхәя кӑшаң сӑм кана веӆщи ӑнтәма вум хуят эвӑӆт тӑԯаң сӑм омӑссы. Щи ӆавӑрт вєр нӆ муӆтас щос 13 вән па ай тохтурӑт тәсӑт. 

Ропхӑӊ кўрк тыӆӑщн «Хӑтӆ» нємпи Ас-угорской театр хуща рәпитты ёх йиӆуп ванӆтупсы мира аӆьсӑт. «Поединок» нємуп ванӆтупсы ӆыв хӑнты мир писатель Еремей Айпин хӑншум «Подвиг военфельдшера. Реквием сентября» нємуп путӑр посн ӆэщӑтсэӆ.

Вантэ, щи путӑр ӆаӆь хӑрн мир лекщитум айӆат нє Елена Артеева оӆӑӊӑн. Щи нє Сўмӑтвош район Саранпауль вош эвӑӆт вәс. 

Хӑнты мир пи­сатель Еремей Айпин киникайн хӑншман:

Йиӊк-мўв ӆавӑӆты «Самаровский чугас» тӑхи 2001-мит оӆн вєрса. Тӑм йиӊк-мўв ӆавӑӆты нумӑс мєт сыри 1984-мит оӆн тывӑс, щирн Тюменской область народной депутатӑт исполнительной комитет поступсы вєрӑс, Ёмвош хонӑӊӑн вәӆты мўв, щит 420 га йиӊк-мўв, памятника вєрты. Щи ут нємӑтса «Ханты-Мансийские холмы», ӆўв тәп 15 оӆ мӑра вєрӑнтыйӆса. Тӑм хӑтӆ вәӆты йиӊк-мўв ӆавӑӆты парк щӑӆтаса щи тывӑс.

Тәнӆуп тыӆӑщ сухӑнтты еӆпийн Ёмвошн шуши мир няврємӑт вәнӆтӑты тӑхийн (ин ДЭКОЦ, сыры оӆӑтн щи тӑхи «Ӆыӆӑӊ союм» нєм тӑйс) «Рәт мирєм ясӑӊ…» нємпи «ӊта пӑсан» вєрӑнтсы. Щив Ёмвош кәща ёх, арсыр оса тӑхет эвӑӆт хӑннєхуятӑт, «Хӑнты ясӑӊ» па «Луима сэрипос» редакцияев эвӑӆт па няврємӑт пиӆа рәпитты хуятӑт вәсӑт. 

Тӑм ванӑн Ёмвошн РИЦ «Югра» нємуп айкеӆӑт ӑкӑтты тӑхийн Росгвардия лицензионно-разрешительной тӑхи кәща хә Михаил Клепалов па государственной контроль тӑхи кәща хә Николай Горбатенко путӑртсӑт, муй щирн тӑм юхи хӑщум оӆӑтн ӆыв арсыр государственной контроль па лицензионно-разрешительной вєрӑт тўӊщирӑӊа па тәса ӆэщӑтсӑт. 

Вантэ, тәнӆуп тыӆӑщ 12-мит хӑтӑӆн Рос­гвардия тӑхийн рәпитты ёх мӑӊхӑтӆэӆ постӑсӑт. Госконтроль муй па ли­цензия вєрӑт артаӆӑты хӑннєхуятӑт юхи хӑщум оӆӑтн сыр-сыр вәӆупсы щирӑт Россия мўвев за­конӑт щирн тўӊщирӑӊа тәӆӑт. 

Тӑта мосванӑн 2021-мит оӆ Россия хон пєлӑк мўвев ӆуваттыйн Наука па технологияйт оӆа кантсы. Щи тумпийн округев ӆыпийн тӑм оӆэв «Кашӑӊ вєр вәйтты оӆа» постӑсы, рўщ щирн ки луптыя, Знания оӆа йис. 

Щи пӑта Югра мўвев Государственной биб­лиотека хот йитн Наука па  технологияйт оӆэв иха ӑктӑщум айӆат ёх пиӆа тәнӆуп тыӆӑщ нивӑӆмит хӑтӑӆн иса киникайт ӆў­ӊӑтты хотн рәпитты нєӊӑт пўншсӑт.
Сыры иха ӑктӑщум хӑннєхуятӑт еӆпийн щи нєӊӊӑн тӑмиты лупсӑӊӑн:  

Рәт ясӊӑт хӑтӆ постӑты вўраӊӑн мўӊ «Хӑнты ясӑӊ» па «Луима сэрипос» газетайӊӑӆўв єсӑӆты тӑхия округ дума депутат па ӛращты хә Руслан Проводников вохӑнтсўв. Ӆўв мўӊева депутат рәпатайӆ оӆӑӊӑн путӑртӑс.

Руслан Проводников Сўмӑтвошн сєма пи­тӑс па єнмӑс, щӑта ӑш­колайн вәнӆтыӆӑс. Ӑӊкеӆ – вухаӆь нє, ащеӆ – рўщ хә. Яӊ тӑӆ ӆуваттыйн ащеӆн ӛращты бокса мӑсы. Щи тӑхийн ӛращман ӆўв Россия мастер спорта нєм па па арсыр вуӆаӊ нє­мӑт па мойӆупсэт ёша павтыӆӑс.  

Кашӑӊ оӆ 1999-мит оӆ вўш эвӑӆт тәнӆуп тыӆӑщ 21-митн мўӊ мўвев хўваттыйн рәт ясӑӊ мӑӊхӑтӆ постӑӆы. Щи хӑтӆӑн Югра мўвевн 2015-мит оӆ вўш эвӑӆт шуши мирӑт хӑнты, вухаӆь па юрн ясӊӑтн диктант хӑншӆӑт.

Тәнӆуп тыӆӑщ 5-митн Ёмвошӑӊ хурӑт вантты хотн округ кәща нє Наталья Комарова коронави­рус мәш мӑӆты ёха Россия мўв государственной па округ эвӑӆт ишӑкты нєпекӑт мойӆӑс.

Щи пурайн ӆўв ӑктӑ­щум ёха лупӑс: «Нын иса муй вєрӆӑты, ӆәӆн округев, Россия мў­вев ӛрӑӊа па тащӑӊа ат йис».