Айкеԯӑт - Новости

Нижневартовской район Варьёган кәрт шуши мир пурмӑсӑт шавиты хотн методиста рәпитты нє Зоя Спиридоновна Казамкина:

 – Ма хӑнты мир кўтн сєма питсум, єнумсум, Ёмвошн ыв пиӑа институтн вәнтыйсум, ин па ыв пиӑа рәпитум. Йиуп о емӑңхӑт вўраңӑн ма пиӑма вәнтыум эвета, пухӑта, Варьёган кәртӑң мира па иса хӑнты хуятӑта ям па хошум ясңӑт лупты ӑңхаум.

Сўмӑтвошн няврємӑт хӑт мӑр авӑты хотн лекщитты нєңа рәпитты ими Ксения Ивановна Юрьева:
– Тӑм ванӑн Сўмӑтвош районэв 95 оа йис, щирн Сўмӑтвошн вәты хуятӑта вўща ясӑң китум. Щи тумпи ывеа, Нуви сӑңхум район Ваньщавӑт кәртӑн па округ уваттыйн вәты хӑнты мирева Йиуп 2019-мит о емӑңхӑт пиа ям па хошум ясӑң лупты ӑңхаум, ән йиуп о ывеа ар амӑт ат тәс. Кашӑң хота уй ат уңӑ. Иса хуятӑт уяңа, тӑаңа, яма ат вәӑт! 

Ирина Кузьминична Фирсова, Нуви сӑңхум вош, Россия мўв народной мастер:
– Нуви сӑңхум районӑн вәты шўкщӑты имиета Йиуп 2019-мит о пиа хошум вўща ясңӑт китум! Тӑаңа-уяңа вәаты, ән йиуп он аршӑк ям па хурамӑң пурмӑс ат вєрсӑты. Вєрӑнтты вєрӑн сӑм вўш эвӑт ат йи. ән тыйты, ёнтӑсты йинтпӑн унтасн арсыр хурамӑң па әмӑщ пурмӑсӑт ат тывӑт. ән нын вәупсӑн мосты щирн ат мӑнӑс. Нын тыюм, ёнтум, вєрум хурамӑң пурмӑсӑн рәт ёхӑна, әхӑсӑна амӑт па уй ат тәӑт.
 

Светлана Ивановна Рандымова, Касум кәрт, киникайт ўңӑтты хотн рәпитты нє: 

– Вўща вәаты, «Хӑнты ясӑң» газетайн  рәпитты ёх! Мос лупты, газетайн  рәпитты мир, хӑншты ёх вән вєр вєрӑт, мўң хӑнты ясңев сӑмӑңа тӑйэ, рәт ясңев еы тәэ. Шуши мирев вәупсы олӑңӑн айкеӑт хӑншӑт.

Зоя Ильинична Сандрина (Ребась), Ямал мўв, орвош район, Муши вошӑң буркайт ёнтӑсты нє:
– Мўң, хӑнтэт, йистєн хў, вой вепӑсуман, вўы тащ авӑман вәўв, щирн ӑңхаум, ән йиуп он аршӑк хў, вой ат вәс, вўы тащӑтн ар пєши сєма ат пит. 
Ма – ёнтӑсты нє, вўы кєп эвӑт хошум хӑншӑң буркайт ёнтум. Хӑнты хӑншет – щит йис вәупсэв вўш эвӑт хӑщум хурамӑң хурӑт. Вўєң ёх эвӑт кєпӑт әтум, щирн шєңк ӑңхаум, ән вўы тащӑт вәншӑка ат йисӑт. 

Вера Николаевна Айваседа, Покачи вош пўңӑн вўт кәртӑн вәты па ёнтӑсты нє:

– Ма Покачи вош пўңӑн вўт кәртӑн вўы тащєм авӑман вәум. Ма – вўєң нє, щирн шєңк ӑңхаум, ән вўєң ёх тащӑт вәна ат йиӑт.

Понавӑт вошн вәты нє Альбина Матвеевна Фирсова: 
– Вўща вәаты, «Хӑнты ясӑң» газетайн рәпитты ёх! Йиуп 2019-мит о емӑңхӑт епийн ма ӑңхаум нынана, әхсӑңа вәты хуятӑта, ям ясңӑт лупты. Ма ӑңхаум нынана тӑаңа вәты, таксара рәпитты! Нєпекӑн мўң иса пурайн авӑўв па ўңӑтўв. Нын газетайн мухты Югра мўвев иса мира ищи хошум ясңӑт лупум. Мўң – хӑнты мир – округев арсыр вошӑтн, кәртӑтн рәт ёх, вәтаң ёх тӑйўв. Мўң – и вән семья! Иса хуятӑта тӑаңа, уяңа, яма вәты ӑңхаум!  Кашӑң югорской семья уяңа-пищӑңа ат вә!

«Почётный житель города Нефтеюганска» нєм тӑйты хӑнты ими Ольга Ефимовна Скакунова: 
– Хӑнты ясӑң» газетайн рәпитты хуятӑта, Ёмвош, Ваньщавӑт, Понавӑт, Касум вошӑтн вәты рәт ёхама па әйңӑама Йиуп о емӑңхӑт пиа ям вўща ясӑң китум. Тынӑң хӑнты ёх, йиуп о нынана уй, амӑт ат тә. Муй нын ӑңхаты, иса ат тыв. Хўв нәпӑтн вәаты! Тӑаң ёш, тӑаң кўр!

Сәрхан мўвн Им лор пўңӑн вәнт кәртӑн юкан вўыеа авӑман Сергей Васильевич Кечимов вә. ўв йис щирн юх анӑт, ыйт, әхӑт, нарӑсъюхӑт, торсапъюхӑт па па утӑт тәса вєрты хош. Щи тумпи тӑм ики Пўпи якты хот арӑт, ўңӑтупӑт, моньщӑт, йис путрӑт вәэ. ўв айат ёх пиа ванкўты вәйтантый. Ин йиуп 2019-мит о юхтум хӑтӑтн нынана вўщайң ясңӑт сәрхан хӑнты ики Сергей Васильевич Кечимов китӑс:
– Ешӑк хӑнты мирєм, йиуп о пиа нынты!
Вой тӑйты, вўы авӑты ёхам 
Хорӑң тащӑн, войң тащӑн ат єнумӑт,

 «Хӑнты ясӑң» газета ўңӑтты тынӑң ёх! Ин округ мирев Йиуп о емӑңхӑт епийн ям па хошум ясңӑт мўңева китсӑт па иса хӑнты мирева 2019-мит он тӑаң, ям, уяң, тащӑң вәупсы ӑңхаӑт. Ин щитӑт ўңтаты.
Округ Дума депутат, шуши мирӑт Ассамблея кәща хә Еремей Данилович Айпин: 
– Рәт мўвн вәты тынӑң мир!  Йиуп 2019-мит о па Рождество емӑңхӑтӊӑн пӑта сӑм вўш эвӑт йиты хошум ясңӑт китум!
Тӑм мӑнум он арсыр әмӑщ вєрӑт па йиуп щирӑт тывийсӑт. 
Йиуп о нынана уй ат тә, Рождество хӑтӑтн рәт ёхӑн пиа сӑмӑңа вәаты.