Айкеԯӑт - Новости

«Языки и культура народов Арктики как полиэтнического региона в условиях глобализации» нємуп мирхотн российской, па хон пєлӑк вән нєпекӑң ёх, щӑта Югорской университетн вәнтыйты айат хуятӑт ияха ӑктӑщийсӑт. Щӑта ня хот йитн нумсӑң путрӑт путӑртсыйт.

Щи оӑңӑн округ мир ямӑты вєр тәты департамент кәща хә Алексей Добровольский айке тәс:
– Югра мўвевн ар няврєм сєма пит па шим хуят ӑнтәма йи. Интӑм округев уваттыйн пәьницайт ар тӑм йис мосты пурмӑс әтсӑт. Юхи хӑщум хәум о мӑр мәшӑң хуята 27 вєрӑк, Ёмвош леккар хотн яң вєрӑк омӑссы.
2019-мит он Сәрхан вошн «Ӑңкет па няврємӑт хот» омӑсты етшӑы. Ёмвошн мєт ар участковой леккар хот вә, щит шєңк ям.

Васы мӑнты тыӑщ 26-митн Ёмвошн Югорской государственной университетн «Языки и культура народов Арктики как полиэтнического региона в условиях глобализации» нємпи I мўвтє мир научной мирхот вәс. Тыв па хон пєлӑк Венгрия, Финляндия, Россия мўвев эвӑт арсыр учёныйт юхтыйсӑт.

Ас потты тыӑщ 15-мит хӑтӑн Ёмвош округ ух нє Наталья Комарова айкеӑт ӑкӑтты ёха арсыр вєр оӑңӑн путӑртӑс. Хәум мутас щос мӑр кәртӑт, вошӑт па окружной, федеральной 64 редакция эвӑт ўв 53 арат вєр оӑңӑн иньщӑссы. Щи ропӑхн мирхот мӑнум хот йитн соткєм хуят омсӑс. Имухты щи вєр интернетн кина иты па мира вантӑсы, щит Югра правительства сайтӑн, ОТРК «Югра», «ВКонтакте», «Открытый регион» па па тӑхетн. 

Тӑм ванӑн Ёмвошн Югра Общественной палата кәща нє И. Максимова  па Общественной па внешней связят департамент кәща юкана вәты хә К. Репин айке ӑкӑтты ёх пиа мирхот вєрсӑңӑн. 

Югра мўвн итәх вәнтӑт, орӑт па юханӑт нємасыя авӑман тӑйайт. Щиты «Сибирские увалы» нємуп ут ай тӑхет потты тыӑщ 15-мит хӑтӑн 1998-мит он Нижневартовcкой мўвн вєрса. Тӑм ут нємасыя така сӑра авӑман тӑйа 20 о. Иса хәум щурӑс мутас километра кєма вәнььман тӑйты мўв вєрман вә. 

Россия мўвев правительства кәщайт тӑм йисн якты-ариты, тәса арсыр пурмӑсӑт вєрты,  хурамӑң әмӑтсухӑт ёнтты па айат хӑннєхуятӑт ямсыева щимӑщ вєрӑта еы вәнтӑты ёхўва муй нєңўва сыр-сыр мойупсэт нємасыя эщӑтсӑт. Кашӑң атэт мир эвӑт щи ёх ўв єпӑн вәты хуятӑтн шєңк сӑмӑңа па мосман тӑйыйт.

Щимӑщ нємуп мирхот Ёмвошн ай тӑхет потты тыӑщ 19-21-мит хӑтӑтн мӑнӑс. Щӑта апӑтсот мутас хуят вәс па арсыр мирхотӑт, еңта пӑсанӑт, вантупсэт, якты-ариты хӑрӑт вєрӑнтсыйт. Щи ут эщӑтсы, ән Россияйн арсыр ясңуп мирӑт кўтэн әхсӑңа ат вәӑт. Щи вєр кәща хотӑтн рәпитты ёх, нўм мўв мир тӑхетн, әңха эвӑты хотӑтн па каш вєрты тӑхетн рәпитты мир нух тўңматӑт. Щи ёх мирхотн ияха ӑкумсӑт па әхсӑңа вәты вєр оӑңӑн путӑртсӑт. Мос лупты, вошӑң па кәртӑң кәщайт, ӑ рәпатнекӑт пӑты нємасыя кӑсупсы вєрсы, ән уша павӑтты, хуйтат әхсӑңа вәты вєр мєт яма эщӑтӑт. 

Советской Союз Коммунистической партия айат ёх комсомол тӑхи васы мӑнты тыӑщ 29-мит хӑтӑн 1918-мит он вєрса. Щӑта 1924-мит он тӑм ут В.И. Ленин нємн пунса. Ӛхӑт ай кєр тыӑщн 1926-мит он тӑм ут нємӑтса Всесоюзной Ленинской Коммунистической айат ёх тӑхия. Щи пӑта тӑм тӑхи 100 оа ювум емӑңхӑт єпн Ёмвошн шуши мир Ассамблея кәща ики Еремей Айпин Комсомол ёх мирхот вєрӑс. Тыв ӑктӑщум хуятӑт нәмӑмӑсэ, муй иты ыв айата вәмен вуаң комсомолец нєм тӑйсэ. 

Ёмвошн арсыр ёх вәйтантупсы вәум пурайн Югра мўв оса тӑхи  «Ассамблея народов России» нємасыя мирхот вєрӑнтӑс.
Щи ут кәща нє Елена Исламуратова ай павтӑс:
– Югра мўвн арсыр хӑннєхәйт кєша пўншум оса тӑхев хуна оа ӑн йис, тәп сыр-сыр вєрӑт эщӑтсўв. Мўң арсыр оса тӑхет ёх пиа ияха рәпитўв. Мєт шопӑң мос, арсыр мир кўтэн яма па әхсӑңа ат вәӑт. Щӑта Ёмвошн па Сәрхан вошн оса вєрӑт тәты хуятӑта нётты утӑт эщӑтты рӑх. Щив арсыр мир яңхты питӑт. Щӑта, вантэ, сыр-сыр айке уша вєрты рӑх.